Chi Bibliaba panau ɓuu

 Ẽbẽra bautizaburuuɗe baniaɗe akawa taatai baraa. a Chi Bibliaɗe eɗa bautizapeɗaaɗa ʉ̃rʉbena ãrĩã jara ɓua (Hechos 2:41). Maarãɗebena Jesús basii, ichi do Jordán abadauɗe taatapeɗaaɗa (Mateo 3:13, 16). Maaɗakare, mukĩra puuru Etiopiaɗebena ichi bautizasiɗau bania nuɓuumaa jãu o wãbadauɗe noɓoosia (Hechos 8:36-40).

 Jesusba jaradeɗekasia ichiɗe discípulo bai baita bautizai baraa (Mateo 28:19, 20). Mauɗe apóstol Pedro biɗa ara maka jarasia (1 Pedro 3:21).

Nau articuloɗe, nauɗebena kawabudau:

•  ¿Kãareba mau bautizaburuu?

•  ¿Bibliaba jaradea ɓuẽ wãwa cheke boro eayuɗebena?

•  ¿Kãareba mau bautizaɗayu Dachi Akõre trʉ̃ɗeeba, chi Warr trʉ̃ɗeeba, mauɗe Dachi Akõre Jauriɗeeba?

•  ¿Waya bautizayu mau kachirua ɓubaaka?

•  Bibliaɗe jara ɓuu junebenarã bautizapeɗaaɗaɗebena

•  Ãyaa jara duanuu cristianorã maarã bautizabadauɗebena

 ¿Kãareba mau bautizaburuu?

 Ẽbẽra bautizaburuuɗe waabenarãmaa unubi kuɓua pekaoɗebena arrepentisii, maabea Dachi Akõre ome comprometeɗa baɗa. Dachi Akõreba kʉ̃ria níturu aseyua chaarea ɓuu adua. Dachi Akõredu ũripeɗa Jesús siɗa jomauɗe ũri nibayua. Ẽbẽrarã biuwẽa panaɗayua naa bautizaɗai baraa.

 Baniaɗe eɗa taataburuuɗe unubiyua ichi naeɗe nibaɗa mau ɓuisii. Bibliaba jara kuɓua bautizaburuu kĩrabara biuɗa baɗa ʉaɗe adoeruu kĩra (Romanos 6:4; Colosenses 2:12). Baniaɗe eɗa wãaruu, jãka ẽbẽra biuruu kĩra ɓua, akawa ɓuibariiɗeeba chi naeɗe nibaɗa. Baniaɗebena awara wãaruuɗe, waya eaburu viviiruu kĩra ɓua chi cristiano Dachi Akõre ome comprometesii baerã.

 ¿Bibliaba jaradea ɓuẽ wãwa cheke boro eayuɗebena?

 Bibliaba jaradea ɓuuwãe wãwa cheke boro eayu baita. b Bibliaba jaradea ɓuura, bautizai naeɗe, naa chi Dachi Akõre Beɗeaɗebena kawaɗai baraa chi nabena mauɗe ara jari ɓʉ kuɓuu kĩra nibaɗayua. Maubapeɗa pekao ase nibaɗaɗebena arrepentiɗapeɗa, maabea ʉtaa wiɗiiruu Dachi Akõremaa ichi ome comprometeɗayua (Hechos 2:38, 41; 8:12). Wãwa cheke ɓiɗĩi ãrĩã kiruu naka aseebayua.

¿Kãareba mau bautizaɗayu Dachi Akõre trʉ̃ɗeeba, chi Warr trʉ̃ɗeeba, mauɗe Dachi Akõre Jauriɗeeba?

  Jesusba ichi kaaɗe tʉa nureerãmaa naka asia: “Jaradeaɗe wã́sturu mʉ kaaɗe duanabii baita [...]. Bautizakuásturu Dachi Akõre trʉ̃ɗeeba, Warr trʉ̃ɗeeba, mauɗe Dachi Akõre Jauriɗeeba. Ãchimaa jaradeábaɗa biʼia aseyu mʉa jaraɗa baɗa kĩraka” (Mateo 28:19, 20). Bautizaɗayu trʉ̃ɗeeba mau jara ɓuu chi ẽbẽra bautizaburuuba kuitaa nii kai chi Akõre mauɗe kai chi Warr, mauɗe kãareba Dachi Akõre Jauri. Chi apóstol Pedroba curayu kuɓuuɗe mukĩra jʉ̃rʉ bʉʉ nii, ichia naka jaraɗa basia: “¡Jesucristo Nazaretɗebena trʉ̃ɗeeba jiradrupeɗa nibaɗease!” (Hechos 3:6, Biblia Chamí WPS.). ¿Sakayua maka jarasaa? Ichia kuitaa nibasia Cristo poder ãrĩã bara nii mauɗe ichia jarasii Jesusɗeeba, ichiɗiwãe, maka aseburuu.

•   Chi “Akõre” mau Jeowabʉ Dachi Akõrebʉ c. Ichia dachi waukaɗa baɗa, dachi chokaebia ɓuu, mauɗe ichi Joma Poder Bara ɓuu. Ichíturu chibaria (Génesis 17:1; Apocalipsis 4:11).

•   Chi “Warr” mau Jesucristobʉ, ichi biuɗa baɗa dachi kakua (Romanos 6:23). Dachirã biuɗawẽa panaɗayua importante ãrĩã ɓuu kawaɗapeɗa ijãaɗayua ichiɗe. Dachi Akõreba Jesusɗeeba ẽbẽra kareba ɓuu baerã (Juan 14:6; 20:31; Hechos 4:8-12).

•   “Dachi Akõre Jauri” mau Dachi Akõre poderbʉ. Ichiɗeeburu joma ase nia d. Dachi Akõreba ichi Jauriɗeeba joma waukaɗa baɗa, ẽbẽrarã, animararãɗeeɗa chokae nureabii baita, profetarã ome beɗeayua mauɗe junebena ẽbẽrarã ome biɗa, maabae chaarea nureapeɗa poder deayua ãchirãba ichia kʉ̃ria níturu asebiayua (Génesis 1:2; Job 33:4; Romanos 15:18, 19). Ichi Jauriɗeeba ichi kʉ̃risia niiɗebena ẽbẽrarãmaa jarakuapeɗa maabea ãchia Bibliaɗe ɓʉ panasii (2 Pedro 1:21).

¿Waya bautizayu mau kachirua ɓubaaka?

  Ẽbẽrarã ãrĩã ãchi religión aɓa ɓuuɗe nureapeɗaaɗa, kawawẽeɗe junebena religionɗaa adaubadau. Chi nii bautizasiibʉrã, ¿kachirua ɓubaaka waya bautizayu junebena religionɗe? Chi nureeba maka ɓuu aɗai ɓuu, leaɗapeɗa ãyaa kʉ̃risiabadauɗeeba Efesios 4:5ɗe, Biblia Chamí WPS, jara ɓuuɗebena, jãuɗe naka a ɓuu: “Dachi Mechiu Jesús ara aɓaburu nii. Dachiba araɓau Jesusɗe ijãa panuu. Mauɗe araɓau trʉ̃ɗeeba” bautizasiɗau. Cha nau versiculoba jara ɓuuwãe, ẽbẽra maucha bautizaabayu. ¿Saka kuitaa panaa?

 Kãare ʉ̃rʉbena beɗea ɓoosaa apóstol Pabloba. Chi apóstol Pablo Efesios 4:5 naeɗe, ichia jaramaa ɓuu biʼia ɓuu ãbua duanaɗaiɗebena. Chi cristiano ariɗe nureerãba araɓauɗe ijãa nureaɗayua (Efesios 4:1-3, 16). Ãbua koɓooyu baita ãda nureaɗayua ara aɓa nii Señor kaaɗe, jaraibʉrã Cristo Jesús, ara aɓa ɓúturu ijãaɗayua Bibliaba jara ɓuu kĩra, mauɗe aseɗai baraa chi Bibliaba jara ɓúturu bautizaɗayua.

 Chi Apóstol Pabloba jaraɗa chi nuree bautizapeɗaaɗa baɗa waya maucha bautizaɗaiɗebena. Chi jãarã ẽbẽrarã bautizapeɗaaɗa ãchia kawawẽa nureeburu Jesusba jaradeaɗa baɗa (Hechos 19:1-5).

 Dachi Akõreba kʉ̃ria ɓuu dachi bautizaɗai baita ara nakaburu. Chi nii ẽbẽra bautizaburuuɗe Dachi Akõreba mau biʼia unuyua, jãu ẽbẽraba biʼia kawa nibai baraa chi Bibliaba jara ɓuu (1 Timoteo 2:3, 4). Chi nii ẽbẽra bautizasiibʉrã ijãa kuɓuuɗe chi Bibliaɗe eɗa ɓʉ kuɓuuwãe, Dachi Akõre baita ichi bautizaɗaɗebena jãu jãka biʼiwãe ɓuu (Juan 4:23, 24). Jãu ẽbẽraba ichi corazonɗeeba aseɗa baɗabʉrã, maka ɓumina “Dachi Akõreba kʉ̃ria ɓuu ʉ̃rʉbena biʼiwãe kʉ̃risia panuu” asesiɗau (Romanos 10:2, Biblia Chamí WPS.). Dachi Akõre daaɗe biʼia nibayua, jãu ẽbẽra kawa nibai baraa chi ariɗe ɓúturu Bibliaɗebena aseyu, chi kawaɗa baɗa Dachi Akõre ome comprometepeɗa waya bautizayu. Makarã, jãu pekaowãema, ariɗe ɓua.

Bibliaɗe jara ɓuu junebenarã bautizapeɗaaɗaɗebena

  Chi Jesús kaaɗe nureabariirãba bautizabachiɗau baniaɗe eɗa taataburuu mauɗe Bibliaɗe biɗa jara ɓuu junebenarã bautizapeɗaaɗaɗebena, maamina diwara ɓeaɗa. Ochiaɗaika chi ɓeerãɗebena:

 Juan el Bautista abadauba bautizakuabachii ẽbẽrarã. e Aɓa judío baɗa maebʉrã judiowãe basii waya judío baɗa, mau Juanmaa wãbachiiɗe bautizabiyua, mau ichi arrepentiɗa baɗa ichia ũribasiiɗeeburu chi ley Dachi Akõreba jaraɗa baɗa israelitarãmaa Moisesɗeeba. Juanba bautizaburuuɗe chi ẽbẽrarã aiɗabachia ãchia kawaɗapeɗa kai Mesías basii, maabae ichiɗe ijãaɗayua, jaraibʉrã chi Jesús Nazaretɗebena (Lucas 1:13-17; 3:2, 3; Hechos 19:4).

 Jesús bautizaɗa. Juan el Bautista abadauba chi Jesús bautizaɗa baɗa. Jãu ãrĩã diwara ɓoosia junebenaɗeeba. ¿Sakaẽra? Mau Jesús jipa nibasiiɗeeba pekao akawa asewẽa nibaɗaa (1 Pedro 2:21, 22). Ichi bautizaabasii arrepenti kʉ̃riasiiɗeeburu, maebʉrã “wiɗiyua Dachi Akõremaa ichi kʉ̃risia jipa nibai baita” (1 Pedro 3:21). Ichi bautizasiiɗe unubisii Dachi Akõremaa ichia aseyua ichia jaraburuuɗe ichi Cristo basiiɗeeba. Ichia chi Akõre ũrisii dachi kakua biusiiɗe (Hebreos 10:7-10).

 Bautizaaruu chi Dachi Akõre Jauriɗeeba. Juan el Bautista abadau Jesucristo omeeba beɗeapeɗaaɗa baɗa bautizaaruu Dachi Akõre Jauriɗeeba (Mateo 3:11; Lucas 3:16; Hechos 1:1-5). Dachi Akõre Jauriɗeeba bautizaburuu diwara ɓua Dachi Akõre Jauri trʉ̃ɗeeba bautizaburuu ome (Mateo 28:19). ¿Sakaẽra?

 Chi Jesucristo kaaɗe nureabariirã ɓiɗĩikaburu nurea bautizabadau Dachi Akõre Jauriɗeeba. Cha naarã cristianorã jʉrʉbadau chi Dachi Akõre Jauriɗeeba ʉtʉ bajãaɗa wãɗapeɗa Cristo ome traja nureayua, rey mauɗe sacerdote nuree kĩraka nau Iujãa ʉ̃rʉ f (1 Pedro 1:3, 4; Apocalipsis 5:9, 10). ¿Maarãba kairã gobernabudau? Chi ãrĩãrã Cristo kaaɗe nureabarii nau iujãa biuɗawẽa nureabudau chi iujãa kĩrawãreaɗe baɗakare (Mateo 5:5; Lucas 23:43).

 Bautizayu Cristo Jesusɗeburu mauɗe ichi biuɗaɗe bautizayu. Chi bautiza nuree Dachi Akõre Jauriɗeeba maarã siɗa bautiza nuree “chi Cristo Jesusɗeeba” (Romanos 6:3). Chi gobernaɗayu Jesús ome bajãaɗe, ãchirã bautizabadau Cristo Jesusɗe. Makaburu congregación baara duanabadau chi jʉrʉkuaɗa baɗarã: ichiturua chi boro kĩra nii mauɗe ãchirã, ichi kakua kĩra (1 Corintios 12:12, 13, 27; Colosenses 1:18).

 Chi cristianorã jʉrʉpeɗaaɗarã bajãaɗe duanaɗai baita maarã siɗa bautiza nurea Jesús biuɗaɗe (Romanos 6:3, 4). Ara jãka Jesús kĩraka, Dachi Akõre ũri nurea, ãchi biuɗawẽa nureaɗayu kʉ̃risia nureaɗa nau iujãaɗe akawa ɓuibadaa. Ãchi biupeɗaaɗakare mauɗe piradrubudauɗe chi bajãaɗe vivi nureaɗayua, bajãaɗebena kakua. Nau naka pasaburuuɗe mau bautizaaruu kĩra (Romanos 6:5; 1 Corintios 15:42-44).

 Bautizaaruu auko kuɓuuɗeeba. Juan el Bautista abadauba naka jarasia: “Ichiba Dachi Akõre Jauri deai. Maamina ijãaɗawẽebʉrã kastikakuai. Ichi juaɗe uru ɓuuba chi trigo ʉtaa jirakuabarii chi jãra ãyaa jãripuabii baita. Maabae chi trigo taa jãripuapeɗaaɗa chi pebariimarẽ pe nuɓui maamina chi jãra tʉbʉchia kiikauɗe baai” (Mateo 3:11, 12, Biblia Chamí WPS.). Nama jara ɓuu auko kuɓuuɗeeba bautizaburuu mauɗe Dachi Akõre Jauriɗeeba bautizaburuu ome diwara ɓea. ¿Saka jara kʉ̃ria ɓoosaa Juanba?

 Chi trigo mau Jesús ũribadau kĩra ɓuu. Ãchi Dachi Akõre Jauriɗeeba bautizaɗai ɓuu. Chi jora mau Jesús ũriɗakau kĩra ɓua. Maarã bautizaɗayu auko kuɓuuba, maarã kenakuapeɗa maabera akawa wãʼãe bayua (Mateo 3:7-12; Lucas 3:16, 17).