Dachia chi kachirua asepeɗa maebʉrã kʉ̃risia ɓoosiiɗe Dachi Akõre baita jãu pekao ɓuu (1 Juan 3:4; 5:17). Bibliaba jara ɓuu pekao chi aseburuu kachirua ɓuu Dachi Akõre daaɗe maebʉrã chi biʼia ɓúturu asewẽeɗe (Santiago 4:17).

 Chi beɗea Bibliaɗe eɗa jara kuɓuuba “pekao” a ɓoosiiɗe, chi ukiɗa sirutaburuuɗe kakuamaa chebiwẽe kĩraka ɓuu. Por ejemplo, chi Bibliaba jara ɓuu yataɗeeɗa chi ɓee kokoroarã Israelɗebenaba caucheraba bataburuuɗe “ariɗe chebibachii”. Ãchirã pekaɗakaa kĩraka basiɗau (Jueces 20:16). Dachia Dachi Akõre busta ɓuudu aseɗawẽeɗe, dachi ariɗe chebiɗakau kĩraka ɓuma.

 Dachi Akõreba waukabarii baerã, ichi autoridad bara nii dachirãmaa jarai baita saka nureaɗayua (Apocalipsis 4:11). Dachia joma aseɗa baɗaɗebena jaraɗayu Dachi Akõre daaɗe (Romanos 14:12).

¿Dachi akawa pekaoswẽa nureaɗai ɓuka?

 Makawẽma, Bibliaba jara ɓuu “jomaurãba kachirua waubadauɗeeba, Dachi Akõre biʼia niiɗebena awara nuree” (Romanos 3:23 Biblia Chamí, WPS.; 1 Reyes 8:46; Eclesiastés 7:20; 1 Juan 1:8). ¿Sakãera pasa kuɓua?

 Dachi Akõreba Adán Eva ome ara ichi kĩra waukasii bẽrã ãchia pekao aseɗaabasia, jipa nureasiɗau (Génesis 1:27). Maka ɓumina, ãchia Dachi Akõre beɗea ũriɗaabasiiɗeeba jipa nureaɗawẽe kopaneesiɗau (Génesis 3:5, 6, 17-19). Ãchia pekao asepeɗaaɗa baerã, chi warrarã adausiɗauɗe ara ãchi kĩraka pekao iɗaa duaneesiɗau, jipa nureaɗaabasii chi akõrerã kĩra (Romanos 5:12). Davidba jara ɓoosii kĩra: “Mʉ nasesiiɗe mʉ culpa bara ɓoosii chi errorɗebena” (Salmo 51:5).

¿Sãu pekao audeara kachirua ɓua?

 Bibliaba jara ɓuu ẽbẽra Sodomaɗebenarã kachirua ãrĩã nureapeɗa, chi ase nureerã aude kachirua ɓoosii (Génesis 13:13; 18:20). Kawaɗaika chi õbea ɓuuɗebena pekao aude kachirua ɓuu.

1.   Pekao choroma ɓuu. Bibliaba jara ɓuu chi ẽbẽrarã ãchi kakuaɗe kachirua ase nurea, santorã wiɗibadaurã, orroabadaurã, itua ãrĩã dobadaurã, chi perabi orroabadaurã, junebenarã beatabadaurã, jaibanarãba jai waubadau, mauɗe ẽbẽrarãba jaibanarãmaa wãbadau, Dachi Akõre baita jãu pekao choroma ɓuu, jãka aseɗaabayua (1 Corintios 6:9-11; Apocalipsis 21:8). Bibliaba jara ɓuu cha naarã pekao choroma ɓuu jãu ome aɓau ɓuuwẽe dachi junebena pekao aseburuu kawayuswẽa ase nii kĩra, por ejemplo, dachia jarapeɗa aɓabena nomaabi ɓuuɗe (Proverbios 12:18; Efesios 4:31, 32). Bibliaba jara ɓuu dachia pekao asebadauɗe kawa kʉ̃risiabaraaɗai june pekao choroma aseɗaamaaba (Mateo 5:27, 28).

2.   ¿Sakayua pekao choroma asebaraa? Chi nureeba Dachi Akõre kãarea asei bustabarii aduaɗeeba pekao choroma asebadaa (Hechos 17:30; 1 Timoteo 1:13). Chi ẽbẽrarã kuitaa nimina Dachi Akõre bustabariiɗebena chi kachirua asebarii ase kʉ̃ria ɓuuɗeeba, Bibliaba jara ɓua jãu ara aɓau ɓuuwẽe (Números 15:30, 31). Bibliaba jara ɓuu ẽbẽra aɓa niiba Dachi Akõre bustabariiɗebena kuitaa kuɓuuɗe kachirua aseburuubʉrã, jãu ichi corazón kachirua niiɗeeburu ase nia (Jeremías 16:12).

3.   Pekao choroma kapichia ase nii. Bibliaba jara ɓuu pekao aseburuuɗe bes aɓaburu ara aɓau ɓuuwẽe ara jãu pekao kapichia aseburuuɗe (1 Juan 3:4-8). Dachi Akõreba jarabarii dachi chi biʼia ɓuu kuitaa nureeɗe, chi kachirua ɓuu ase kʉ̃ria panuubʉrã ichia kastikakuayu (Hebreos 10:26, 27).

 Chi ẽbẽraba kuitaaburuuɗe chi pekao choroma asesii kakua ichi nomaa sentiyua. Chi rey Davidba ãrĩã kʉ̃risiaɗa baɗa chi pekao asesiiɗeeba, jãu ichi baita chikʉa ãrĩã ɓuu atauruu kĩra ɓoosia (Salmo 38:4). Bariarã, nau naka ɓumina Bibliaba jara ɓuu: “Ẽbẽra kachirua nibaɗaba chi o ɓuiyua mauɗe ẽbẽra kachiruaba ichi kʉ̃risia; Jeowamaa waya neeyua, ichia chi chuburia unubiyua, Dachi Akõremaa waya neei, ichia kʉ̃ria iɗaa perdonayua” (Isaías 55:7).