Ẽbẽrarã aribiaurãba mau ʉ̃rʉbena kapichia kʉ̃risiabadau. Chi ɓee naka wiɗibadaa: “¿Sakayua nau iujãaɗe duanuka? ¿Sakayua dachirã wausiɗaa?”. Bibliaba jara ɓuu dachi waukaɗa baɗa Dachi Akõre ome amiko nibaɗai baita. Kawaɗaika Bibliaba kãare jara ɓuu mauɗebena.

•   Dachi Akõreba joma waukasii. Bibliaba jara ɓuu: “Dachi Akõreba dachirã waukasii ara dachi du aɓa wauɗaabasia” (Salmo 100:3; Apocalipsis 4:11).

•   Dachi Akõreba kuitaa ɓuu kãare baita joma waukaɗa baɗa mauɗe dachirã kãarea wauɗa baɗa (Isaías 45:18).

•   Dachi Akõreba dachirã waukasii ichi ʉ̃rʉbena kawaɗai baita, mauba kuitaabii ɓuu kãarea dachirã waukaɗai baita (Mateo 5:3). Dachi Akõreba kʉ̃ria ɓuu dachirãba kawaɗapeɗa mauɗe kĩrajʉʉ nureaɗai baita (Salmo 145:16).

•   Dachia Dachi Akõre ʉ̃rʉbena kawa nesita panuu bẽrã berekabadau ichi ʉ̃rʉbena aude kawaɗapeɗa ichi amiko nureaɗai baita. Mauɗeeba Bibliaba naka jara ɓuu: “Dachi Akõre ome kaita nureásturu ichi siɗa machi ome kaita nibayua” (Santiago 4:8; 2:23).

•   Dachi Akõre amiko nibaɗai baita dachia joma ichi asebi kʉ̃ria ɓuuɗebena asebaraai. Bibliaba naka a ɓuu: “Respetayua chi Dachi Akõre ariɗe nii mauɗe ũriyua joma ichia jara kuɓuuɗebena, jãturua chi ẽbẽra niiba joma asebaraai” (Eclesiastés 12:13).

•   Ɓoapeɗa Dachi Akõreba chi kachirua dachi sufribi ɓuuɗebena acabapeɗa mauɗe ichi kaaɗe jipa ãdabadaurãmaa biuɗawẽa nibabiburuuɗe Dachi Akõreba kʉ̃ria ɓooɗa ẽbẽrarã baita jãu joma cumpliyua (Salmo 37:10, 11).