¿Kairã ʉtʉ bajãaɗaa wãɗaiba?
Chi Bibliaba panau ɓuu
Dachi Akõreba jʉrʉɗa baɗa chi nuree ẽbẽra bia nureerã ãchi biuɗakare ʉtʉ bajãaɗaa wãuribiyua (1 Pedro 1:3, 4). Bariara Dachi Akõreba jʉrʉsmina ãchi fe chaarea nureaɗapeɗa mauɗe jipa ãda nureaɗayu cha nau adauɗai baita, jãka aseɗaibʉrã wãɗayua bajãaɗaa (Efesios 5:5; Filipenses 3:12-14).
¿Kãare kakuaba bajãaɗaa wãɗayua?
Ãchirã reyrã mauɗe sacerdoterã nibaɗayua mil año Jesús jʉ̃kaa (Apocalipsis 5:9, 10; 20:6). Chi Kobierno chiwiɗi baɗayua maebʉrã Bibliaba jara ɓuuɗe “bajãa wiɗi”, ãchirãba gobernaɗayua chi ẽbẽrarã maebʉrã “iujãa wiɗi”. Naarã reyrãba jipa nureabiɗayua Jeowaba kʉ̃ria ɓuu kĩraka(Isaías 65:17; 2 Pedro 3:13).
¿Sãabe ʉtʉ bajãaɗaa wãɗayua?
Chi Bibliaba jara ɓuu 144.000 ẽbẽrarã biupeɗaaɗa baɗa waya chokaebiɗayua ʉtʉ bajãaɗe nureaɗai baita (Apocalipsis 7:4). Chi apóstol Juanmaa mau unubisii “chi Oeja kaebea nii [Jesucristo waya piradrusiiɗe] aka nuɓuu mode Sionɗe ichi baare 144.000” (Apocalipsis 14:1-3; Juan 1:29; 1 Pedro 1:19). Mode Sión aburuuɗe chi autoridad Dachi Akõreba Jesusmaa deaɗa baɗa mauɗe chi 144.000 ẽbẽrarãmaa ichi baara gobernaɗayua(Salmo 2:6; Hebreos 12:22).
Jesusba “iukuapeɗa jʉrʉ adaukuasii” ichi baara bajãaɗe gobernaɗai baita, naka biɗa jara ɓuu “oejarã ara ɓiɗĩikaburu duanuu” (Apocalipsis 17:14, Biblia Chamí, WPS.; Lucas 12:32). Nauba jara ɓuu chi jʉrʉpeɗaaɗa baɗa baara gobernaɗayu ɓiɗĩikaburu ɓuu Jesús kaaɗe ãda nuree kãyabãra (Juan 10:16).
Chi ãyaa kʉ̃risia duanuu waabenarã ẽbẽrarãba kairãba ʉtʉ bajãaɗaa wãɗayua ʉ̃rʉbena
Chi nureeba ãyaa jarabadau: Chi ẽbẽra bia nureerã joma bajãaɗaa wãɗayu.
Chi ariɗe ɓuu: Dachi Akõreba jara ɓuu ãrĩã ẽbẽrarã bia nureerã nau iujãaɗe nureaɗai (Salmo 37:11, 29, 34).
Jesusba naka jara ɓoosii: “Aɓa biɗa bajãaɗaa wãkau” (Juan 3:13, Biblia Chamí, WPS.). Nauba jara ɓuu ẽbẽrarã biarã biupeɗaaɗa ichi neei naeɗe Abrahán, Moisés, Job mauɗe David, jãarã bajãaɗaa wãɗaabasia (Hechos 2:29, 34). Jãarãba kʉ̃risiabachiɗaa ãchi piradrubudauɗe iujãaɗe nureaɗayu (Job 14:13-15).
Chi bajãaɗe piradrubudauɗebena Bibliaba naka jara ɓuu “naa chokae jiradubiaruu” (Apocalipsis 20:6, Biblia Chamí, WPS.). Makarã maucha piradrubudau, nau iujãaɗe bayua.
Chi Bibliaba jara ɓuu Dachi Akõre Kobiernoba gobernaburuuɗe “biui baɗa waa unuɗaabai” (Apocalipsis 21:3, 4). Cha nau nama iujãaɗeburu bayua, bajãaɗe biuɗakauɗeeba.
Chi nureeba ãyaa jarabadau: Aɓaaɓaarãba jʉrʉɗayu ʉtʉ bajãaɗe maebʉrã nau iujãaɗe nureaɗayu.
Chi ariɗe ɓuu: Dachi Akõreba kʉ̃risiayua kairã bajãaɗaa wãuriɗayu jã́turua bajãaɗe nureabiburuu (Filipenses 3:14). Cha nau pasaabayu chi ẽbẽraba kʉ̃ria ɓuuɗeburu bari Dachi Akõre ichia kʉ̃ria ɓuuɗeburu pasayua (Mateo 20:20-23).
Chi nureeba ãyaa jarabadau: Chi bajãaɗe nureabudaurã aude biʼia nureerã iujãaɗe duaneebudaurã kãyabãra.
Chi ariɗe ɓuu: Dachi Akõreba chi ẽbẽrarã nama iujãaɗe biuɗawẽa nureaɗayuɗebena naka jara ɓua “mʉ puuru”, “mʉa jʉrʉ adauɗa baɗa” mauɗe “ichia bendecikuaɗa baɗa” (Isaías 65:21-23). Ãchia aseɗayu Dachi Akõre kʉ̃ria ɓooɗa ẽbẽra baita, biuɗawẽa nureaɗayu nama iujãa mipitaa kiruuɗe (Génesis 1:28; Salmo 115:16; Isaías 45:18).
Chi nureeba ãyaa jarabadau: Apocalipsisba jara ɓuuɗe chi 144.000 ʉ̃rʉbena, nau número ariɗe ɓuuwẽe.
Chi ariɗe ɓuu: Apocalipsisba jara ɓuuɗe chi numerorã ʉ̃rʉbena, chi ɓeerã ariɗe ɓuu mauɗe junebena ariɗe ɓuuwẽe. Por ejemplo, Bibliaba jara ɓuu chi trʉ̃rã 12 apostolerã chi Corderoɗebena (Apocalipsis 21:14). Kawaɗaika sakayua kuitaa panuu chi número 144.000 ariɗe ɓuu.
Bibliaba jara ɓuu “Dachi Akõre sello uru panuu [chi jʉrʉ adaupeɗaaɗa ʉtʉ bajãaɗaa nureaɗai baita] sãabe panuu: 144.000 basii”, “ẽbẽrarã kabanaa kuɓuu mʉa unusia, ẽbẽraba poyaa juasiibai ɓuu”. Cha naarã “ẽbẽrarã kabanaa” karebakuayua (Apocalipsis 7:4, Biblia Chamí, WPS.; Apocalipsis 7:9, 10). Chi número 144.000 ariɗe ɓuuwẽebʉrã aduaɗai kairãɗebena jara ɓuu. a
Chi 144.000 ẽbẽrarãɗebena Bibliaba jara ɓuu ãchi “neɗopeɗaaɗa baɗa chi ẽbẽrarãɗebena chi naa kuɓuuɗebena” (Apocalipsis 14:4). “Chi naa kuɓuuɗebena” a ɓuuɗe ãrĩã barauɗebena ɓiɗĩikaburu jʉrʉbaria kawabi ɓuu. Mauɗeeburu nau beɗeaba jara ɓuu chi ẽbẽrarã jʉrʉpeɗaaɗa baɗa gobernaɗayua bajãareeba Jesús omeeba chi ẽbẽrarã ãrĩã nau iujãaɗe nureaɗayu (Apocalipsis 5: 10).
a Chi profesor Robert Thomasba chi 144.000 ʉ̃rʉbena naka jara ɓoosii: “Cha nau versiculoɗe kawa panuu sãabera mauɗe chi versículo 7:9ɗe adua sãabe. Kʉ̃risiaɗaibʉrã nau número ariɗe ɓuuwẽebʉrã joma chi numerorã Apocalipsisba jara ɓuuɗebena naarã siɗa ariɗe ɓuuwẽe jara ɓua” (Comentario exegético de Revelación 1-7, página 474ɗe).
Nau siɗa bustai ɓua buchia
ENSEÑANZAS IMPORTANTES DE LA BIBLIA
¿Kãareba Dachi Akõre Kobierno?
Jesús nama iujãaɗe jaradea nibasiiɗe ichia Dachi Akõre Kobiernodu ãrĩã beɗeabachia. Yataɗeeɗa ichiɗe ijãa nureeba wiɗi duanua chi mau Kobierno neei baita.
