Chi Bibliaba jara kuɓuu dachia ira panuuɗebena waabenarãmaa deaɗayu mauɗe sõɗeeba maka aseɗayua. Waabenarãmaa deabudaubʉrã, dachi kĩrajʉʉ panaɗai mauɗe chi mau adaubudaurã siɗa maka panaɗai (Proverbios 11:25; Lucas 6:​38). Jesusba naka jarasii: “Ãrĩãdu kĩrajʉʉ ɓuu dearuuba adauruu kãyabãra” (Hechos 20:35).

•  ¿Kãare momentoɗe biʼia ɓuu waabenarãmaa deaɗayu?

•  ¿Kãare momentoɗe deaɗayu biʼiwẽe ɓua?

•  Texto Bibliaɗebenarãba waabenarãmaa deayu ʉ̃rʉbena jara koɓeerã

 Sõɗeeba deabudaubʉrã, biʼia ãrĩã ɓua. Chi Bibliaba naka jara ɓuu: “Machi aɓaaɓaa asébaɗa machi corazonɗeeba kʉ̃risiapeɗaaɗaɗebena, mia kʉ̃riawẽe kĩraka mauɗe obliga ɓuu kĩra aserã́baɗa, Dachi Akõreba kʉ̃ria nii chi kĩrajʉʉ ãrĩã deabadaurã” (2 Corintios 9:7).

 Dachi Akõreba kʉ̃ria ɓuu ichi kʉ̃riabadaurãba sõɗeeba waabenarãmaa deaɗayu (Santiago 1:​27). Chi ẽbẽra aiɗaɗai nesita keɗee aiɗabudaubʉrã, Dachi Akõre aiɗaaruu kĩra ɓua, waabenarã aiɗabudauɗe ichi dachirã ome deuda baraa ɓeebarii kĩra ɓua (Proverbios 19:17). Chi Bibliaba jara kuɓuu Dachi Akõreba aude deaburua (Lucas 14:12-​14).

 Miadaa ɓuu kakua dea kʉ̃riabudauɗe:

•   Waabenarãmaa dachi ẽbẽra biʼia nii unubiai baitaburu (Mateo 6:2).

•   Ara jari bichia deaɗa kĩra bichimaa deabiyua (Lucas 14:12-14).

•   Dachi salvabii baita (Salmos 49:6, 7).

 Dachi Akõreba bustakaa ɓuu mau waabenarãmaa asebibudauɗe. Miadaa ãrĩã ɓuu aɓaumaa chi nejarra deayu apostayua, maebʉrã itua biu ɓeeyua o makawẽe siɗa nejarr do nibayua (1 Corintios 6:9, 10; 2 Corintios 7:1). Mauɗe, biʼia ɓuuwẽe ẽbẽra trajai kʉ̃riawẽa niimaa chi nejarra deayu (2 Tesalonicenses 3:10).

 Waabenarãmaa deaɗai naeɗe naa dachi deɗabenarãmaaburu deaɗayua. Chi Bibliaba jara kuɓuu chi deɗabena ochia ua kuɓuuba chiko, ropa jʉ̃yua, joma deai baraa ichi deɗabenarãmaa (1 Timoteo 5:8). Biʼia ɓuuwẽe dachi deɗabenarãmaa deai baɗa waabenarãmaa deaburuu. Jesusba iadaaɗa baɗa chi ẽbẽrarã ãchi akõre chõra chekerãmaa naka jara nuree: “Joma mʉʉba uru ɓuu Dachi Akõremaa deasiiɗeeba mʉʉba machi poyaa aiɗaabai” (Marcos 7:9-13, Biblia Chamí, WPS.).