Jeowa ɗebena Jaranũrẽrãba ãrĩãdu berekabadau chi dachi deɗabena mauɗe ara dachi jʉ̃kaa bibi kirureerã baara ãchi deɗe biʼia duanaɗai baita. Ãrĩãdu kʉ̃riabadaa deɗabenarã Jeowaba nau aseɗaɗeeba (Génesis 2:21-24; Efesios 3:14,15). Bibliaɗe ɓʉsia konsejorã ãrĩã deɗeka ɓua ẽbẽrarã joma iujãaɗebenarãmaa aiɗayua biʼiaburu kimabaraapeɗaaɗarã baɗa ãbua panaɗai baita.

 Daiba berekabadaa chi Bibliaba jara ɓuu aseɗai baita, jãuba ũkuru kima bia mauɗe akõre bia babia ɓuuɗeeba (Proverbios 31:10-31; Efesios 5:22-6:4; 1 Timoteo 5:8). Mauɗe Bibliaba ũkuru aiɗai ɓua religionɗe deɗabenarãba ara aɓa ɓuu ijãaɗakau bẽrã (1 Pedro 3:1, 2). Ochiaɗaika saka duanuu chi nuree ẽbẽrarãba ãchi kima Jeowa ɗebena Jaranũrẽrãba ɓeeɗakare:

•   “Chi 6 años kimabaraapeɗaaɗakare ãrĩãdu peleasiɗau mauɗe nomaa akʉ paneebasiɗaa dai. Maamina mʉ wẽra Ivete Jeowa ɗebena Jara nii baɗakare ichia ãrĩãdu kʉ̃ria ɓeepeɗa mauɗe isa kĩrukaraa ɓeesii. Ichia kambiasiiba aiɗabasia dai deɗabena” (Clauir, Brasilɗe).

•   “Mʉ kima Chansa, Jeowa ɗebena Jaranũrẽrã ome kawa ɓeeɗakare, mʉa ãrĩã bustawẽe basii, mʉa kʉ̃risia ɓoosii jãarãba deɗabenarã ãbua duanuu dañabadau aseɗa. Maamina chi tiempo wãsiiba jaradeasia mʉʉmaa Bibliaba ariɗe dachi deɗabena aiɗa ɓoosii” (Agness, Zambiaɗe).

 Mauɗe dairãba jʉ̃kaa bibi nureemaa jaradea duanuu bẽrã, ãchirãmaa jaradea panua Bibliaba saka aiɗai ɓuu deɗabenarã:

•   Kima bia jʉrʉɗai baita

•   Ʉ̃rãburu kimabaraapeɗaaɗarã aiɗai baita

•   Pakõrerã ome biʼia ãrĩã nibai baita

•   Chi nejarra biʼia manejayu

•   Chĩo ãrĩã panaɗa baɗa iɗa ɓuɗai baita

•   Perdona kawaɗai baita

•   Warrarãmaa biʼia jaradeɗekai baita

 Ɓesesɗe jãu ariɗe pasabaria. Chi empresa Sofresba 1998ɗe jãuɗebena ɓʉɗa basia maabea naka asia, kimabaarapeɗaaɗarã 20ɗebenarãba aɓa problema iɗaa ɓoobarii chi kima maebʉrã chi wẽra, religión Jeowa ɗebena Jaranũrẽrã bapeɗaaɗa kakua.

 Jesusba jaraɗa basia chi nuree ichi kaaɗe ãda duanuurã problemarã baraaɗayu ãchi deeɗaa (Mateo 10:32-36). Will Durant nebʉrʉbadaurãɗebena waa ichia jarasia chi Imperio Romano diarãɗe “chi cristianorã kulpa bara duanasia deɗabenarã chĩobiɗai baita”. a Iɗibea ẽbẽrarã aribiaurãba ara jãka jarabadau. Maamina ¿Jeowa ɗebena Jaranũrẽrãba ãchiaburu chĩobiɗayua berekaɗabaaka?

 Nau ʉ̃rʉbena chi Tribunal Europeo de Derechos Humanos jãuɗebenaba naka asia, chi deɗabenarã Jeowa ɗebena Jaranũrẽrãwẽe nureerãburu problema ira panua ãchirãba “unuɗawẽeɗeeba chi derecho baraa kuɓuu ichi religión ausii kakua”. Chi Tribunalba maucha nau ʉ̃rʉbena jarasia: “Nau pasabaria joma deɗabenarã religión ãyaa ɓuu ira panuu bẽrã; Jeowa ɗebena Jaranũrẽrãmaa biɗa naka pasabaria”. b Waabenarã ẽbẽrarãmaa dai religión bustakaɗamina dairã Jeowa ɗebena Jaranũrẽrãba berekabadaa nau beɗea Bibliaɗe jara ɓuu aseɗai baita: “Berekábaɗa peleaɗawẽa duanaɗai baita jomaurã ome” (Romanos 12:17, 18).

 Dai Jeowa ɗebena Jaranũrẽrãba kawa ũribadaa chi Bibliaɗe jara kuɓuu kimabaraaɗai baita “Jeowa ɗebena Jaranũrẽrã omeburu”; jaraibʉrã, kimabaraaɗai ara dachi kĩra ijãabarii nii ome (1 Corintios 7:39). Nau aseeruuba ãrĩãdu aiɗa ɓua dachi. Chi artículo kartaɗebenaba Journal of Marriage and Family 2010ɗe jara ɓoosii “chi kimarã ara aɓa ɓuu religión baraa niɗau chi aɓa ɓuu ijãaɗapeɗa niɗau” ãchi aude meraa nibabadaa. c

 Maamina, chi Jeowa ɗebena Jaranũrẽrãba waarãmaa jaradeaɗakaa chi kima amaayu ichi Jeowa ɗebena Jaranũrẽrãwẽe niiɗeeba. Bibliaba naka a ɓua: “Aɓa niiba chi wẽraba ijãakau niibʉrã, mauɗe ichi mau ome bibi kʉ̃ria niibʉrã makarã ɓuirã́ba; mauɗe chi wẽra ichi kimaba ijãakau niibʉrã, mauɗe chi mukĩra ichi ome bibi kʉ̃ria niibʉrã makarã ichi kima ɓueebayu” (1 Corintios 7:12, 13). Dairã biɗa kawa ũribadaa chi Jeowaba jara ɓuu.