1 Corintios 10:1-33
10 Ãbarã, mʉʉba kʉ̃ria ɓuu machiba Moisés ewariɗe makaɗa kĩrabaɗawẽa panaɗai. Mau ewariɗe joma dachi nabẽraeɗebenarã Moisés baara nibapeɗaaɗa Dachi Akõreba bʉiɗa jʉ̃rʉara ekare nibasiɗau mauɗe Mar Purrɗe kĩaraa wãsiɗau.*
2 Mau marɗe mauɗe jʉ̃rʉara ekare joma ãchi Moisés ome ãbua panasiiɗeeba Moisés trʉ̃ɗeeba boro eapeɗaaɗa kĩra panasiɗau.
3 Jomaurãba chi araɓau chiko Dachi Akõreba bajãaɗebena bʉiɗa kobachiɗau.*
4 Jomaurãba araɓau bania Dachi Akõreba eakarrɗebena eaɓaribiɗa dobachiɗau.* Mau eakarr Cristo jara ɓuu, ãchi wãaduucha Cristo jauriɗeeba ãchi ome ɓuasiiɗeeba.
5 Maamina Dachi Akõreba ãchiɗebena ãrea biꞌiwãe unusii, ichi ome kachirua wausiɗauɗeeba. Mauɗeeba drua sirua wãꞌãe ɓuuɗe kinisiɗau.
6 Mau ewariɗe makaɗaba dachimaa kuitaabi ɓuu kachirua kʉ̃riaɗaabai panuu ãchiba kʉ̃riapeɗaaɗa kĩra.
7 Juaba ne kapeɗaaɗaɗe ijãarã́sturu waabenarã chi nureeba ijãapeɗaaɗa kĩra.* Dachi Akõre beɗeaɗe ãchi ʉ̃rʉbena naka ɓʉ kuɓuu: «Ẽbẽrarã akʉ paneeɗapeɗa kĩrajʉʉ ãbua ko duanasiɗau mauɗe itua do duanasiɗau. Mau maaɗakare jiraduɗapeɗa ãchi kakuaba wau kʉ̃ria ɓuu wau duaneesiɗau».*
8 Dachi kakuaba barikia kachirua wauɗaabai panuu waabenarãba waupeɗaaɗa kĩra. Ãchiba maka wau panuu kakua ara ewari aɓaɗe 23.000 kinisiɗau.*
9 Cristoba saka waui kuitaai dachiba kachirua wauɗaabai panuu waabenarã ãchiba waupeɗaaɗa kĩra. Mauɗeeba chi nuree damaba kaakuapeɗa kinisiɗau.*
10 Kĩrajʉʉwẽa panuuɗeeba Dachi Akõre ʉ̃rʉbena kachirua berrearã́sturu waabenarã chi nureeba waupeɗaaɗa kĩra. Mauɗeeba chi ángel dachi kinibibariiba ãchi ãrea kinibiasii.*
11 Joma ãchi makaɗaba unubi ɓuu saka Dachi Akõreba kachirua kastikabarii. Mau Dachi Akõre beɗeaɗe ɓʉ kuɓuu dachi nau kaaɗearebena ewariɗe nureerãba ara mau kĩra waurãaɗamera.
12 Mauɗeeba aɓauba ãrea ijãa ɓuu kʉ̃risia ɓuubʉrã, ara ichi du aɓa kauwa ɓuai ɓuu kachiruaɗe ida ɓaebiamaaba.
13 Ɓeseɗe dachi sõɗe kʉ̃risiabadau kachirua wauɗai baita, jomaurãba maka kʉ̃risiabadau kĩra. Mau poyaa dauchia jãadua panaɗawẽebʉrã, Dachi Akõreba dachimaa maka kʉ̃risiabiabai. Mauɗe dachiba maka kʉ̃risia paneeduuɗe ichiba aiɗai dauchia jãadua panaɗamera, ichiba jara ɓuu kĩra ewaricha waubariiɗeeba.
Juaba ne kapeɗaaɗa ida ɓuɗai panuu ʉ̃rʉbena
14 Mauɗeeba mʉ ãbarã mʉa kʉ̃riakuabarii, Dachi Akõre kuenda juaba ne kapeɗaaɗa ida ɓústuru.
15 Mʉʉba machimaa berrearuu kʉ̃risia kuitaa nureerãmaa berrearuu kĩra. Ãrea kʉ̃risiásturu mʉʉba jara ɓuu biawãra kuitaai.
16 Dachi Mechiu kĩraba panuuɗe dachiba uva ɓaa basuɗe ɓuu ʉ̃rʉbena Dachi Akõremaa ichíturu kiɗibai aɗapeɗa dobadau. Mau dooduuɗe unubibadau dachi Cristo oaɗeeba ichi ome ãbua panuu. Mauɗe pan ɓʉakuaɗa kooduuɗe unubibadau Cristo nau kakuaɗe ãrea biꞌiwãe ɓuasiiɗeeba dachi ichi ome ãbua panuu.
17 Dachiba pan aɓa ɓuu ãrea ɓʉakuapeɗa kobadau. Ara mau kĩra dachi ãrea panumina kakua aɓa ɓuu kĩra nuree.
18 Israelɗebenarãba waubadau ʉ̃rʉbena kʉ̃risiásturu. Ãchiba ãnimara Dachi Akõremaa baa deaduuɗe mau kiuruɗebena kobadau. Mau kooduuɗe unubibadau Dachi Akõreɗe ijãa panuu. (Ara mau kĩra aɓauba Dachi Akõre kuenda juaba ne kapeɗaaɗamaa kiuru baa deaɗaɗebena kooruubʉrã, unubii mau juaba kapeɗaaɗaɗe ijãa ɓuu).
19 Maamina mʉʉba jarawẽa ɓuu chi Dachi Akõre kuenda juaba ne kapeɗaaɗa biawãrabʉ. Chi maarãmaa kiuru deaɗaɗebena kiuru kĩra ɓuu.
20 Maamina Dachi Akõreɗe ijãaɗakaurãba kiuru ãchi juaba ne kapeɗaaɗarãmaa deaduuɗe biawãra jai kachiruarãmaa dea panuu. Dachi Akõremaa dea panuuwãema. Machiba mau kiuru kooduubʉrã, unubiɗai jai kachiruaɗe ijãa panuu. Mau mʉʉba kʉ̃riawẽma.
21 Jauri kachiruamaa deaɗa basuɗe ɓuu machiba dooduubʉrã, Jesucristo oa kĩrabaɗai baitabena basuɗe ɓuu doɗaabai panuu. Jai kachiruamaa ãnimara kiuru deaɗa machiba kooduubʉrã, Dachi Mechiu kĩrabaɗai baitabena kobadau koɗaabai panuu.
22 Maka wauduubʉrã ¿Dachi Mechiu kĩrubiɗaabaika? ¿Dachi ichi audeara meserãa nuree kĩra?
Joma wáusturu ãbarãba biꞌia kʉ̃risiaɗamera
23 Waabenarãba jara panuu «Cristoɗe ijãa ɓuuɗeeba mʉʉba kʉ̃ria ɓuu kĩra joma waui ɓuu». Maamina mʉʉba jaraaruu: ne joma waui ɓumina joma dachiba wau kʉ̃ria ɓuuba dachi aiɗakau. Biawãra joma dachiba wau kʉ̃ria ɓuu waui ɓumina joma mauba ãbarã aiɗakau.
24 Aɓau biɗa ara ichi biꞌia ɓuai jʉrʉ ɓuabai ɓuu, maumaarã waabenarã biꞌia nureaɗamera jʉrʉ ɓuai ɓuu.
25 Kiuru nedobʉibadaumare nedobʉiɗa joma koɗai panuu. Maamina iɗirã́sturu mau kiuru chi Dachi Akõre kuenda juaba ne kapeɗaaɗamaa deapeɗaaɗa baɗa kuitaaɗai baita, mau biꞌiwãe ɓuu a kʉ̃risia panuuɗeeba.
26 Nau iujãa mauɗe ne joma nau iujãaɗe ɓuu Dachi Mechiuba wausii. Mauɗeeba ne joma koɗai panuu.
27 Chi Jesusɗe ijãawẽa ɓuuba machi koɗamera iuruubʉrã mauɗe wã kʉ̃riaduubʉrã, wã́sturu. Ichiba dearuu kósturu. Iɗirã́sturu mau chiko Dachi Akõre kuenda juaba ne kapeɗaaɗamaa deapeɗaaɗa baɗa kuitaaɗai baita, mau biꞌiwãe ɓuu a kʉ̃risia ɓuuɗeeba.
28 Maamina aɓauba «nau kiuru Dachi Akõre kuenda juaba ne kapeɗaaɗamaa deapeɗaaɗa» aaruubʉrã, mau korã́se ichiba mau biꞌiwãe ɓuu a kʉ̃risiai ɓuuɗeeba.*
29 Mʉʉba jarawẽa ɓuu machiba mau kiuru koɗakau panuu. Maumaarã mʉʉba jara ɓuu chi aɓáuburu maka kʉ̃risia ɓuu.
Aɓauba naka kʉ̃risiai: Mʉʉba wau kʉ̃ria ɓuu wauruuɗe aɓauba kachirua a kʉ̃risiaruubʉrã, ¿mau poyaa waukau ɓuka? ¿Mʉʉba wau kʉ̃ria ɓuu kĩra waubai ɓuka?
30 Mʉʉba chiko ʉ̃rʉbena Dachi Akõremaa ichíturu kiɗibai aaruubʉrã, ¿sakãe waabenarãba mʉʉba chiko kooruu ʉ̃rʉbena kachirua berreaɗai panuma? Kachirua jaraɗaabai ɓuu.
31 Maamina mʉʉba jaraaruu: machi komaa panuuɗe mauɗe waumaa panuuɗe joma wáusturu ẽbẽrarãba Dachi Akõre ʉ̃rʉbena biꞌia jaraɗamera.
32 Machiba wau panuuɗeeba judiorã, judiowãerã mauɗe ẽbẽrarã Dachi Akõreɗerã kachiruaɗe ɓaebirã́sturu.
33 Ara mau kĩra mʉʉba wau ɓuuɗeeba jomaurãmaa biꞌia kʉ̃risiabiai kʉ̃ria ɓuu. Aɓaburu mʉ biꞌia ɓuai baita jʉrʉkau, maumaarã ẽbẽrarã ãrea biꞌia nureaɗamera jʉrʉbarii. Maka mʉʉba wau ɓuuɗeeba ãchiba Cristoɗe ijãaɗai Dachi Akõreba karibamera.
