1 Corintios 12:1-31
12 Ãbarã, mʉʉba kʉ̃ria ɓuu Dachi Akõre Jauriba waubi ɓuu ʉ̃rʉbena machiba ãrea kuitaaɗayu.
2 Machiba kuitaa panuu Dachi Akõreɗe ijãaɗakaurã nureasiɗauɗe, barikia ʉ̃rʉbena kʉ̃risiabachiɗau. Dachi Akõre kuenda juaba ne kapeɗaaɗaɗe ijãabachiɗau. Chokae nureewãeɗeeba berreaɗakau.
3 Mauɗeeba mʉʉba kʉ̃ria ɓuu machiba nau kuitaaɗayu: Chi Dachi Akõre Jauriɗeeba berrea ɓuuba «Jesús kachirua nii» akau. Mauɗe chi Dachi Akõre Jauriɗeeba berreawẽa ɓuuba «Jesús jomaurã Mechiu» akau.
4 Dachi Akõre Jauri aɓa niiba dachimaa dea ɓuu ne diwaraa wauɗamera.
5 Dachi Mechiu aɓa nii baita ne diwaraa waubadau.
6 Dachi Akõre aɓa niiba dachimaa ne diwaraa waubi ɓuu. Ichiaburu dachiɗeeba mau joma waubarii.
7 Dachi Akõre Jauriba dachicha ne waubiabarii ãbarã jomaurã aiɗaɗamera.
8 Dachi Akõre Jauriba waabenarã chi nureerãmaa dea ɓuu ichi kʉ̃risia kuitaaɗeeba poyaa berreaɗamera. Dachi Akõre Jauri ara aɓa niiba chi nureemaa dea ɓuu ichiɗeeba kuitaapeɗaaɗa poyaa jaradeaɗamera.
9 Dachi Akõre Jauri ara aɓa niiba chi nureemaa dea ɓuu poyaa ãrea ijãa panaɗamera. Mauɗe Dachi Akõre Jauri ara aɓa niiba chi nureemaa dea ɓuu ẽpermo nuree poyaa aribiabiaɗamera.
10 Mauɗe Dachi Akõre Jauriba chi nureemaa dea ɓuu ẽbẽrarãba ne poyaa wauɗakau poyaa wauɗamera. Chi nureemaa dea ɓuu poyaa Dachi Akõre baita berreaɗamera. Chi nureemaa dea ɓuu poyaa kuitaaɗamera aɓauba Dachi Akõre Jauriɗeeba berrea ɓuu maebʉrã jai kachiruaɗeeba berrea ɓuu. Mauɗe chi nureemaa dea ɓuu dachiba ũriɗakau chi beɗea didiwaraa berreaɗamera. Mauɗe chi nureemaa dea ɓuu dachiba kauwa ũriɗakau beɗeaɗe jaraɗa kuitaa jaraɗamera.
11 Ara Dachi Akõre Jauri aɓa niiba joma mau waubi ɓuu. Ichiba dachicha waubi ɓuu ichiba kʉ̃ria ɓuu kĩra.
12 Dachi kakua aɓa ɓumina dachi kakuaɗe joma uru panuu. Cristo ichi ijãabadaurã ome ara mau kĩra panuu.
13 Chi nuree dachiɗebena dachi judiorãbʉ, chi nuree dachiɗebena judiowãerãbʉ, chi nuree dachiɗebena chi chibari baita bari trajabadaurãbʉ, chi nuree dachiɗebena chibariswãe nureerãbʉ. Maamina Dachi Akõre Jauri ara aɓa niiba dachi jomaurã kakua aɓaɗe ɓusii.* Joma dachiba Dachi Akõre Jauri araɓau nii adausiɗau.
14 Dachi kakuaɗe joma uru panuu. Maamina chi dachi kakuaɗe nuree araɓauɗe nureewãema.
15 Dachi jʉ̃rʉba jaraaruubʉrã: «Mʉ chi juawãeɗeeba nau dachi kakuaɗebenawãema», mauɗeeba ¿biawãra dachi kakuaɗebenawãeka?
16 Mauɗe dachi kʉʉrʉba jaraaruubʉrã: «Mʉ chi dauwãeɗeeba nau dachi kakuaɗebenawãema», mauɗeeba ¿biawãra dachi kakuaɗebenawãeka?
17 Dachi kakuaɗe aɓaburu dau basirã ¿kãareba ũrii basma? Dachi kakuaɗe aɓaburu kʉʉrʉ basirã ¿kãareba ʉ̃i basma?
18 Dachi Akõreba dachi kakuaɗe joma ɓusii ichiba kʉ̃ria ɓuaɗa kĩra.
19 Dachi kakuaɗe duanuu joma araɓau basirã kakua wãꞌãe bai basii.
20 Dachi kakuaɗe ne joma uru panumina dachi kakua aɓa nii.
21 Mauɗeeba dachi dauba chi juamaa poyaa jaraabai: «Bichiwãe mʉ biꞌia ɓuai». Mauɗe dachi boroba chi jʉ̃rʉmaa poyaa jaraabai: «Machiwãe mʉ biꞌia ɓuai».
22 Biawãra nau kakuaɗe nuree, chi nuree dachimaarã biꞌiwãe nureebʉ. Maamina maarãswãe dachi kakua biꞌia ɓuakau.
23 Mauɗe chi dachimaarã nau kakuaɗe ãrea balewẽa ɓee biꞌia nubadau biꞌia unuɗamera. Mauɗe nau kakuaɗe chi nuree dachiba unubiɗaabai panuu kauwa merabadau.
24 Maamina dachi kakuaɗe kĩrawãrea nuree meraɗakau. Dachi Akõreba dachi kakuaɗe nuree joma araa ãbua wausii. Chi dachiba unubiɗakau wausii biꞌia nuɗamera.
25 Maka wausii dachi kakua kachirua ɓeerãamera, maumaarã dachi kakuaɗe nuree chiya nu panaɗamera.
26 Dachi kakuaɗebena aɓa puꞌuaruubʉrã, chi kakua joma puꞌuabarii. Ara mau kĩra dachi kakuaɗebena aɓa biꞌia jaraaruubʉrã, joma kĩrajʉʉbadau.
27 Ara mau kĩra machi joma ara chi Cristo kakua kĩra nuree. Machi ichi kakuaɗebenarãbʉ.
28 Dachi Akõreba ãbarã tãeɗe chi Jesucristoba bʉiɗarã naa ɓusii. Mawãare ichi baita berreabadaurã ɓusii. Mawãare ichi beɗea jaradeabadaurã ɓusii. Mawãare waabenarã ɓusii ẽbẽrarãba ne poyaa wauɗakau poyaa wauɗamera, chi nuree ɓusii ẽpermo nuree poyaa aribiabiaɗamera, chi nuree ɓusii ãbarã aiɗaɗamera, chi nuree ɓusii chi ãbarã tãeɗe saka wauɗai kuitaa panaɗamera, mauɗe chi nuree ɓusii barikiu dachiba ũriɗakau beɗeaɗe berreaɗamera.
29 Makarã ¿jomaurã Jesucristoba bʉiɗarãka? ¿Jomaurã Dachi Akõre baita berreabadaurãka? ¿Jomaurã Dachi Akõre beɗea jaradeabadaurãka? ¿Jomaurãba ẽbẽrarãba ne poyaa wauɗakau poyaa waubadaurãka?
30 ¿Dachi Akõreba jomaurãmaa deasika ẽpermo nuree poyaa aribiabiaɗamera? ¿Dachi Akõreba jomaurãmaa deasika dachiba ũriɗakau beɗeaɗe poyaa berreaɗamera? ¿Jomaurãba dachiba ũriɗakau beɗeaɗe jaraɗa poyaa kuitaa jaraɗai panuka?
31 Dachi Akõre Jauriba waubi ɓuuɗebena chi dachi aude aiɗa nuree jʉrʉ́sturu.
Jãabae mʉʉba machimaa kuitaabiai saka ne joma poyaa aude biꞌia wau panaɗayu.*
Notas
^ 12:13 Ɓusii. Griego beɗeaɗe naka ɓʉ kuɓuu: boro easii. Nau versiculoɗe mau beɗeaba jarawẽa ɓuu baniaɗe boro eaɗa ʉ̃rʉbena, maumaarã jara ɓuu Dachi Akõre Jauriba Cristoɗe ijãa ɓuu ichi ome ãbua ɓuɗa ʉ̃rʉbena.
^ 12:31 Saka ne joma poyaa aude biꞌia wau panaɗayu. Griego beɗeaɗe naka ɓʉ kuɓuu: chi o aude bia ɓuu unubiai.
