1 Corintios 13:1-13
13 Mʉ nau iujãaɗebenarã beɗeaɗe berrearuubʉrã mauɗe ángel beɗeaɗe berrearuubʉrã mauɗe waabenarã ẽbẽrarã kʉ̃riawẽa ɓuubʉrã, mʉ jiorr wauɗa jĩwabarii kĩra maebʉrã campana jĩwabarii kĩra nii.*
2 Mʉ Dachi Akõre baita berrearuubʉrã, Dachi Akõreba kʉ̃risia kuitaabiwẽa ɓuaɗa joma kuitaa ɓuubʉrã, Dachi Akõre kʉ̃risia kuitaa joma kuitaa ɓuubʉrã, mauɗe sõɗeeba biawãra ijãa ɓuuɗeeba ea poyaa ãyaa ɓuuruubʉrã, mauɗe waabenarã kʉ̃riawẽa ɓuubʉrã, mʉ baleswãe nii kĩra nii.
3 Joma mʉʉba uru ɓuu chi wãꞌãe nureemaa dearuubʉrã mauɗe Dachi Akõre baita ara michi kakua ida baa deabiiruubʉrã, maamina waabenarã kʉ̃riawẽa ɓuubʉrã, mʉ baleswãe nii kĩra nii.
4 Chi waabenarã kʉ̃riabariiba joma jãadua ɓuu, waabena kĩra chuburiabarii, waabenaba uru ɓuu uru ɓuai kʉ̃riakau, waabena audeara biꞌia nii jarakau mauɗe maka nii kʉ̃risiakau.
5 Chi waabenarã kʉ̃riabariiba waabenarã wapeadee ua ɓuabarii, ara ichi báitaburu ɓuu kʉ̃risiakau, bari au kĩrukau, waabenaba ichi kachirua wauɗa kĩrabakau.
6 Kachirua kakua kĩrajʉʉkau, maumaarã biawãra kakua kĩrajʉʉbarii.
7 Waabenaba kachirua wauɗa joma jãaduabarii, jomaɗe ijãabarii, waabenaba joma biꞌia waumera eseɗaubarii mauɗe ne jomaɗe jãadua ɓuabarii.
8 Ẽbẽrarã kʉ̃riai wãꞌãekau. Maamina ewari aɓa Dachi Akõre baita berreabadau waa berreaɗaabai, dachiba ũriɗakau beɗeaɗe berreabadau waa berreaɗaabai, Dachi Akõre Jauriɗeeba kuitaapeɗaaɗa jaradeabadaurãba waa jaradeaɗaabai.
9 Mauɗeeba iɗibae dachiba ɓaꞌãraburu kuitaa panuu mauɗe Dachi Akõre baita ɓaꞌãraburu berreabadau.
10 Maamina chi bibuara ɓuu neeruuɗe mau ɓaꞌãra ɓuu wãꞌãe bai. Mauɗe joma kuitaaɗai.
11 Mʉ wabiɗa kaebe nibasiiɗe warr cheke kĩra berreabachii mauɗe warr cheke kĩra kʉ̃risiabachii. Maamina sĩbãra basiiɗe warr cheke kĩra ɓuaɗa ida ɓusii.
12 Ʉ̃rauɗe dachiba Dachi Akõreɗebena tõroroa kĩra unu panuu chi kĩra ichiabadauɗe. Maamina ewari aɓaɗe dachiba joma ʉ̃ɗaa unuɗai mau saka ɓuu. Ʉ̃rauɗe mʉʉba ɓaꞌãraburu kuitaa ɓuu, maamina ewari aɓaɗe joma kuitaai Dachi Akõreba mʉ ʉ̃rʉbena kuitaa ɓuu kĩra.
13 Nau õbea panuu wãꞌãekau: ne jomaɗe biꞌia ijãa ɓuai, eseɗau ɓuai joma biꞌia neemera mauɗe waabenarã kʉ̃ria ɓuai. Mau õbeaɗebena, aɓau kʉ̃ria ɓuai chi aude bibuara ɓuu.
Notas
^ 13:1 Mʉ jiorr wauɗa jĩwabarii. Pabloba jara ɓuu chi ẽbẽrarã ãrea berreabadaurã jiorr jĩwabarii kĩra nuree. Mau ãrea jĩwaarumina, ne jara kʉ̃riawẽa ɓuu.
