1 Corintios 3:1-23
3 Ãbarã, mʉ machimaa wãsiiɗe, chi Dachi Akõre Jauriɗeeba nibabadaurãmaa jaradea ɓuu kĩra poyaa makaabasii. Maumaarã chi nau kakuaba wau kʉ̃ria ɓuu kĩra waubadaurãmaa mauɗe chi ea Cristoɗe ijãapeɗaaɗarãmaa jaradea ɓuu kĩra jaradeasii.
2 Mʉʉba Cristo ʉ̃rʉbena beɗea chaareawãe ɓuu jaradeasii wãwamaa ju ɓaa dobi ɓuu kĩra. Chiko kobi ɓuu kĩra, mʉʉba chaareawãe ɓuu jaradeabasii, machiba kauwa ũriɗaabasiiɗeeba. Mauɗe wabiɗa kauwa ũriɗawẽa panuu.
3 Machi wabiɗa nau kakuaba wau kʉ̃ria ɓuu kĩra nibabadau: waabenarãba uru panuu kakua, kachirua kʉ̃risiabadau mauɗe oa kachirua berreabadau. Maka nureeɗeeba ¿nau kakuaba wau kʉ̃ria ɓuu kĩra nureewãeka?
4 Aɓauba jarabarii: «Mʉ Pauloɗebʉ». Waya aɓauba jarabarii: «Mʉ Apolosɗebʉ». Machiba maka jarabadauɗeeba nau iujãaɗebenarã kĩra nuree.
5 Maamina ¿Pablo kaima? ¿Apolos kaima? Dai Dachi Akõre baita bari trajabadaubʉ. Daiɗeeba machiba Dachi Mechiuɗe ijãasiɗau. Dachi Akõreba daicha waubiaɗa kĩra wausiɗau.
6 Ne uuruu kĩra mʉʉba machimaa Jesús ʉ̃rʉbena naa jaradeasii. Maabae mʉʉba uuɗaɗe bania earuu kĩra Apolosba Dachi Akõre beɗea biꞌia jaradeasii. Maamina Dachi Akõréburu aiɗasii machiba ijãaɗamera chi ne uuɗa waribiiruu kĩra.
7 Mauɗeeba chi ne uubarii chi aude mechiuwãema. Chi bania eabarii siɗa chi aude mechiuwãema. Dachi Akõre chi aude mechiubʉ. Ichiaburu ne uu nuɓuu waribibarii.
8 Chi ne uubarii mauɗe chi bania eabarii siɗa Dachi Akõre daaɗe araɓauɗe nuree. Ichiba dachicha ne biꞌia deai, dachiba wau panaɗa kĩra.
9 Mʉʉba Apolos ome araɓauɗe Dachi Akõre traju wau panuu. Machi siɗa Dachi Akõreɗe ne uu nuɓuu iujãabʉ.
Mau awara machi Dachi Akõreba de wau ɓuu kĩra nuree.
10 Mʉ chi de waubarii bia kĩra nii. Dachi Akõreba ichi sõbiaɗeeba mʉʉmaa deaɗaba, de jʉ̃rʉ ãrea iɗu ʉyaasii. Waabenarãba mau ʉ̃rʉ de waubadau. Maamina dachicha kauwa panaɗai ɓuu saka mau ʉ̃rʉ waui ɓuu.
11 Jesucristo chi de jʉ̃rʉ baerã, june ãyaa poyaa nuɓuuɗaabai.
12 Aɓauba mau ʉ̃rʉ de bia wauruubʉrã, ichiba wau ɓuu nee, parata maebʉrã mo doɗaa mipitaa ãrikau kĩra ɓuu. Maamina aɓauba mau ʉ̃rʉ de biawãe wauruubʉrã, ichiba wau ɓuu bakuru, kiruu maebʉrã sia kiruuba waupeɗaaɗa kĩra ɓuai.
13 Cristoba dachi nebʉra ichiai ewariɗe dachicha waupeɗaaɗa tʉbʉchiaba ichia chaai, ãrea dauchia jãadua ɓuai kuitaai baita. Mauba unubii dachiba waupeɗaaɗa saka ɓuasii.
14 Dachiba wauɗaba mau tʉbʉchiaɗe dauchia jãadua ɓuubʉrã Cristoba chi wau ɓuaɗamaa ne biꞌia deai.
15 Maamina chi dachiba wauɗa baawãaruubʉrã chi wau ɓuaɗaba ne aɓa biɗa adaubai. Dachi Akõreba ichi karibarumina de baawãaruuɗebena awara wãaruu kĩra ɓuai.
16 ¿Adua panuka Dachi Akõre Jauri machi sõɗe ɓuu? ¿Adua panuka machi Dachi Akõre de?
17 Aɓauba Dachi Akõre de ãriiruubʉrã Dachi Akõreba ãrea kastikai, ichi de ichi baitabena ɓuuɗeeba. Machi mau deebʉ.
18 Ara machi du aɓa setaa kũruarã́sturu. Aɓauba chi nau iujãaɗebena kʉ̃risia kuitaa kĩra ne kuitaa ɓuu kʉ̃risia ɓuubʉrã, waa maka kʉ̃risiabai ɓuu. Maumaarã chi biawãra kʉ̃risia kuitaa uru ɓuai baita nau iujãaɗebenarã daaɗe ne adua ɓuu kĩra ɓuai ɓuu.
19 Dachi Akõremaarã, nau iujãaɗebena kʉ̃risia kuitaa biꞌiwãe ɓuu. Dachi Akõre beɗeaɗe naka ɓʉ kuɓuu: «Dachi Akõreba chi nau iujãaɗe ne kuitaa nuree ara ãchi kʉ̃risia kuitaaɗeeba unubibarii ne kuitaa panuuwãe».*
20 Mauɗe naka ɓʉ kuɓuu: «Dachi Mechiuba kuitaa ɓuu chi nau iujãaɗe ne kuitaa nuree kʉ̃risia, mau kʉ̃risiaswãe bari ɓuu».*
21 Mauɗeeba kʉ̃risiarã́sturu ẽbẽra aɓa baara wãaduuɗeeba, mau waabenarã audeara biꞌia nii. Dachi Akõreɗeeba machiba ne joma uru panuu biꞌia nureaɗai baita.
22 Machiba mʉ, Apolos mauɗe Pedro uru panuu. Joma nau iujãaɗe ɓuu siɗa uru panuu. Chi iɗibaebena mauɗe nubena uru panuu. Dachi chokae panuubʉrã maebʉrã biuduubʉrã Dachi Akõreɗeeba ne joma uru panaɗai biꞌia nureaɗai baita.
23 Joma machi Cristoɗerãbʉ. Mauɗe Cristo Dachi Akõreɗebʉ.
