1 Juan 2:1-29
2 Ãbarã, machi mʉ warrarã kĩra nuree. Mʉʉba mau ɓʉmaa ɓuu machiba kachirua waurãaɗamera. Maamina aɓaba kachirua wauruubʉrã, aɓa uru panuu Dachi Bajãaɗebena Akõremaa dachi baita chi chuburia iɗimera. Mau chi chuburia iɗibarii Jesucristobʉ. Ne joma jipa waubarii.
2 Ichi biusii Dachi Akõreba dachi kachirua perdonamera. Dachi kachirua báitaburu biubasii, maumaarã biusii joma nau iujãaɗe panuurã kachirua baita biɗa.
3 Dachi Akõreba waubi ɓuu beɗea dachiba mau wau panuubʉrã, unubiaɗai panuu ichi biawãra unu panuu.
4 Aɓauba jaraaruubʉrã: «Mʉʉba ichi unu ɓuu», mauɗe ichiba waubi ɓuu beɗea wauwẽa ɓuubʉrã, mauba setaa jara ɓuu. Chi biawãra beɗea adua ɓuu.
5 Maamina chi Dachi Akõre beɗea wau ɓuuba Dachi Akõre biawãra kʉ̃ria ɓuu. Chi Dachi Akõre ome ɓuu a ɓuu Jesucristo nibaɗa kĩra nibai ɓuu. Dachi maka nibaaduubʉrã, kuitaa panuu biawãra ichi ome panuu.
6 —.
Dachi Akõreba waubi ɓuu beɗea wiɗi
7 Ãbarã, mʉʉba machi baita ɓʉwẽa ɓuu chi Dachi Akõreba waubi ɓuu beɗea wiɗi, maumaarã ɓʉ ɓuu ichiba chi naeɗe waubi ɓuu beɗea jaraɗa.* Mau waubi ɓuu beɗea machiba Cristoɗe ijãapeɗaaɗaɗeeɗebena kuitaa panuu. Mau nabẽraeɗebena beɗea chi ichiɗebena ũripeɗaaɗabʉ.
8 Maamina chi mʉʉba ɓʉmaa ɓuu chiwiɗi kĩra ɓuu Cristoba wausiiɗeeba mauɗe machia biɗa biawãra wau panuuɗeeba. Chi nau wiɗi pãriu wãꞌãe kãrii kĩra ɓuu, mauɗe chi biawãra beɗea ʉ̃ɗaa kãrii kĩra ɓuu.
9 Aɓauba ʉ̃ɗaaɗe ɓuu aaruubʉrã, maamina ichi ãba kĩramaa ɓuubʉrã, wabiɗa pãriuɗe ɓuu.
10 Chi ichi ãba kʉ̃riabarii ʉ̃ɗaaɗe ɓuu mauɗe ichi sõɗe wãꞌãe kachiruaɗe ɓaebii baita.
11 Maamina chi ichi ãba kĩramaa ɓuu pãriuɗe ɓuu. Pãriuɗe niiɗeeba adua ɓuu samaa wãi, pãriuba ichi dau berrea ɓuuɗeeba.
12 Warrarã, mʉʉba nau karta machi baita ɓʉ ɓuu Dachi Akõreba Cristoɗeeba machi kachirua perdonasiiɗeeba.
13 Chõrarã, mʉʉba nau karta machi baita ɓʉ ɓuu chi araɓaeɗeeɗe nibaɗa wabiɗa nii, mau unubadauɗeeba.Kũudrãarã, mʉʉba nau karta machi baita ɓʉ ɓuu jʉbawãe nii poyaasiɗauɗeeba.Warrarã, mʉʉba nau karta machi baita ɓʉ ɓuu Dachi Bajãaɗebena Akõre unusiɗauɗeeba.
14 Akõrerã, mʉʉba nau karta machi baita ɓʉ ɓuu chi araɓaeɗeeɗe nibaɗa wabiɗa nii, mau unubadauɗeeba.Kũudrãarã, mʉʉba nau karta machi baita ɓʉ ɓuu ãrea ijãa panuuɗeeba, Dachi Akõre beɗea machi sõɗe ɓuuɗeeba, mauɗe jʉbawãe nii poyaasiɗauɗeeba.
15 Nau iujãaɗebena kʉ̃risia mauɗe ne joma nau iujãaɗebena kachirua kʉ̃riarã́sturu. Chi nau iujãaɗebena kachirua kʉ̃ria ɓuuba Dachi Bajãaɗebena Akõre kʉ̃riawẽa ɓuu.
16 Nau iujãaɗebena kachirua naubʉ: dachi kakuaba kachirua wau kʉ̃ria ɓuabarii, dachi dauba unu panuu kʉ̃ria panabadau, mauɗe dachiba uru panuu kakua maebʉrã wau panuu kakua ara dachi waabenarã audeara aude nuree kʉ̃risia panaɗai. Joma mau Dachi Bajãaɗebena Akõreɗebenawãe, maumaarã nau iujãaɗebenabʉ.
17 Nau iujãa kachirua mauɗe joma chi kachirua ẽbẽrarãba wau kʉ̃ria panuu wãꞌãe bai. Maamina chi Dachi Akõreba jara ɓuu beɗea wau ɓuu ewaricha ichi ome chokae ɓuai.
Cristo kĩramaabarii
18 Mʉ warrarã, nau kaaɗebena ewari wãꞌãeburuu. Machiba ũrisiɗau Cristo kĩramaabarii neei.* Cristo kĩramaabadaurã iɗibae barau. Mauɗeeba dachiba kuitaa panuu nau Dachi Akõre beɗea ewari wãꞌãeburuu.
19 Maarã dachi baara panaɗa wãsiɗau, maamina biawãra dachiɗebenawãe basii. Maarã biawãra dachiɗebena basirã, dachi baara wabiɗa ãbua panaɗai basii. Maamina mau makasii biꞌia kuitaaɗamera joma dachiɗebenawãe nuree.
20 Maumaarã machiba Dachi Akõre Jauri Cristoba deaɗa uru panuu. Ichiɗeeba joma chi biawãra beɗea kuitaa panuu.
21 Mʉʉba nau karta ɓʉwẽa ɓuu machiba chi biawãra beɗea adua panuuɗeeba maumaarã ɓʉ ɓuu kuitaa panuuɗeeba. Mauɗe kuitaa panuu chi seta biawãraɗebenawãe.
22 ¿Chi setaa jarabarii kaima? Chi Jesús Dachi Akõreba deai jaraɗa dachi karibabariiwãe a ɓuubʉ.* Mau chi Cristo kĩramaabariibʉ. Mauba Dachi Bajãaɗebena Akõre mauɗe Dachi Akõre Warr kʉ̃riawẽe.
23 Chi Dachi Akõre Warr kʉ̃riawẽa ɓuuba Dachi Bajãaɗebena Akõre uru ɓuuwãe. Chi Jesús Dachi Akõre Warr a ɓuuba Dachi Bajãaɗebena Akõre siɗa uru ɓuu.
24 Mauɗeeba machiba ijãasiɗauɗeeɗebena chi Cristo ʉ̃rʉbena ũri panuu machi sõɗe nu uru panásturu. Maka machi Dachi Bajãaɗebena Akõre ome mauɗe ichi Warr ome ãbua panaɗai.
25 Maka ãbua panuubʉrã, Cristoba dachimaa biawãra jarasii ewaricha Dachi Akõre ome chokae panaɗai.
26 Mʉʉba mau ɓʉsii waabenarãba machi setaa kʉ̃ria panuuɗeeba.
27 Maamina machiba Dachi Akõre Jauri Cristoba deaɗa uru panuu. Mauɗeeba jʉrʉɗaabai panuu waabenarãmaa machi jaradeabiayua. Dachi Akõre Jauriba machimaa ne joma jaradea ɓuu. Ichiba jaradea ɓuu setawãe, maumaarã biawãrabʉ. Mauɗeeba Cristo ome ãbua panásturu Dachi Akõre Jauriba machimaa jaradeaɗa kĩra.
28 Mʉ warrarã, Cristo ome ãbua panásturu. Maka ichi neeruuɗe wapeaɗawẽa mauɗe kĩra nejasiaɗawẽa nureaɗai ichi daaɗe.
29 Machiba kuitaa panuu Jesucristo jipa nii. Mauɗe kuitaa panuu chi joma jipa wau nuree, Dachi Akõre warrarãbʉ.
