1 Pedro 3:1-22
3 Wẽra kima barau nuree, machi kima beɗea ijã́sturu. Maka chi nuree machi kimaɗebenarãba Dachi Akõre beɗea ijãaɗawẽa panumina machi kĩra jipa nuree mauɗe Dachi Akõre wapea nuree unuɗapeɗa ijãaɗai. Machiba machi kimamaa ijãaɗamera jaraɗawẽa panumina machiba biꞌia wau panuuɗeeba ijãabiɗai.
2 —.
3 Machi kĩrawãrea chi ʉ̃rʉbenáburu ɓuabai ɓuu; buɗa biꞌia irupeɗa ãrea kãajʉ̃ ɓuabai ɓuu, nee wauɗa kapipia jʉ̃ ɓuabai ɓuu, paru aude mipitaa ɓuu jʉ̃ ɓuabai ɓuu.
4 Maumaarã machi kĩrawãrea sõɗéburu ɓuai ɓuu; sõbia ɓuuɗeeba mauɗe jirukaraayuwãe ɓuuɗeeba ɓuai ɓuu. Mau kĩrawãrea wãꞌãekau mauɗe Dachi Akõreba biꞌia unu ɓuu.
5 Ara mau kĩra nabẽraeɗebena wẽrarã Dachi Akõre baita nureaɗa kĩrawãrea nureasii. Dachi Akõreba waui jaraɗa ãchiba sõɗeeba biawãra ijãa panabachiɗau mauɗe ãchi kima beɗea ijãabachiɗau.
6 Saraba Abraham beɗea ijãabachii mauɗe «mʉ mechiu» abachii. Ne wapeawẽa machiba ne joma biꞌia wau panuubʉrã, Sara kau nureaɗai.
7 Mukĩrarã wẽra barau nuree, kʉ̃risia biaɗeeba machi wẽra ome biꞌia panásturu. Machi wẽra biꞌia ɓuabii kʉ̃ria panuuɗeeba ãchi biꞌia nu panásturu, wẽra mukĩra aude meserãaswãe niiɗeeba mauɗe machi omea ãbua Dachi Akõre sõbiaɗeeba ichiba chokae panabiasiiɗeeba. Maka wauɗawẽebʉrã, machiba ʉtaa iɗiiduu Dachi Akõreba biꞌia ũriibai.
Biꞌia wau panuuɗeeba nebʉraɗe paneeɗai ʉ̃rʉbena
8 Mau awara ãbarã, araɓau kʉ̃risiaɗeeba joma machi ãbua biꞌia duanásturu. Waabenarã aiɗaɗai kʉ̃risia panásturu. Ãbarãɗeeba chiya kʉ̃riásturu. Chiya kĩra chuburiásturu mauɗe waabena audeara biꞌia nuree kʉ̃risiarã́sturu.
9 Aɓauba machi kachirua wauruubʉrã ara mau kĩra waurã́sturu. Kachirua jaraaruubʉrã ara mau kĩra kachirua jararã́sturu. Maumaarã ʉtaa iɗísturu Dachi Akõreba mau aiɗamera. Kuitaa panuu Dachi Akõreba machi adausii maka nureaɗamera. Maka nureebʉrã, Dachi Akõreba machi siɗa aiɗai.
10 Dachi Akõre beɗeaɗe naka ɓʉ kuɓuu:
«Aɓa kĩrajʉʉ ɓuai kʉ̃ria ɓuubʉrã, ichi kẽrame nui ɓuu kachirua berrearãamera.Ewari ãrea biꞌia ɓuai kʉ̃ria ɓuubʉrã, ichi okarr nui ɓuu, setaa jararãamera.
11 Jãuba ne joma kachirua ida ɓupeɗa biꞌia wau ɓuai ɓuu.Waabenarã ome jirukaraayuwãe ɓuai baita jʉrʉpeɗa maka ɓuai ɓuu.
12 Dachi Mechiuba ẽbẽra jipa nuree nu ɓuu. Ãchiba ʉtaa iɗiiduu biꞌia ũri ɓuu.Maamina chi kachirua waubadaurã kũriakau».*
13 Machiba biꞌia wau panuubʉrã, ¿kaiba machi kachirua wauima?
14 Maamina biꞌia wau panuuɗeeba ãrea biꞌiwãe duanuubʉrã, Dachi Akõre daaɗe ãrea biꞌia nureaɗai. Mauɗeeba chi machi kachirua wauduu wapearã́sturu. Ãrea jirukaraarã́sturu.
15 Cristo machi Mechiuɗeeba, sõɗeeba mau wapeásturu. Chi Cristoɗe adauɗai baita eseɗau panuuɗeeba mau ʉ̃rʉbena berreaɗayu panásturu. Maka aɓauba iɗiiruubʉrã, poyaa ijarra berreaɗawẽa arakʉɗe panauɗai.
16 Ara machi du aɓa kuitaa panásturu kachirua wauɗawẽa nuree. Maka machi Cristo kakua biꞌia nibabadau ʉ̃rʉbena kachirua berreabadaurã peraɗai.
17 Dachi Akõreba machi biꞌiwãe paneebiaruubʉrã, biꞌia ɓuu ãrea biꞌiwãe paneeɗai biꞌia wau panuuɗeeba ãrea biꞌiwãe panaɗai baɗamaarã kachirua wau panuuɗeeba.
18 Cristo jipa ɓumina kachirua kakua ɓes aɓa biꞌiwãe ɓuasii. Mauba dachi chi jipawãe nuree Dachi Akõre ome biꞌia ɓusii. Ichi beasiɗau, maamina Dachi Akõre Jauriɗeeba chokae jiradusii.
19 Mauɗe Dachi Akõre Jauriɗeeba chi jauri jʉ̃a duanuumaa wãsii. Wãpeɗa chi kachirua joma poyaasii, asii.
20 Maarã jaurirãba nabẽraeɗe Noé ewariɗe Dachi Akõre beɗea ijãaɗaabasii. Noeba jãba mechiu wau ɓuumisa Dachi Akõreba joma dauchia jãadua ɓuuɗeeba eseɗau ɓuasii ãchiba ijãaɗamera. Maamina ẽbẽra ɓaꞌãra bania biruɗaɗebena paneesiɗau. Biawãra jaraaruubʉrã, 8buru karibasii.
21 Mau baniaba nau ʉ̃rauɗe boro eabadau ʉ̃rʉbena jara ɓuu. Boro eaduuɗe Jesucristo chokae jiradusiiɗeeba dachi kariba ɓuu. Boro earuuba dachi kakua jayoa jeraakau, maumaarã maka waubadau dachi kʉ̃risia jipa ɓuuba, biawãra Dachi Akõre ome nibaɗai kʉ̃ria panuuɗeeba.*
22 Jesucristo chokae jiradupeɗa, bajãaɗaa wãpeɗa Dachi Akõre jua biare ɓuu. Joma angelerã, joma jai kachiruarã chi mechiurã mauɗe chi meserãa nuree ichi juaɗe uru ɓuu.*
Notas
^ Salmos 34:12-16.
^ 3:21 Maumaarã maka waubadau dachi kʉ̃risia jipa ɓuuba, biawãra Dachi Akõre ome nibaɗai kʉ̃ria panuuɗeeba. Waabenarãmaarã mau beɗeaba naka jara ɓuu: «Boro eaduuɗe dachiba Dachi Akõremaa ʉtaa iɗibadau dachi kachirua perdonakuamera».
^ 3:22 Cristoba nau jai kachiruarã poyaasii, chi Dachi Akõreɗe ijãabadaurã kachirua waubiabadaurã. Versículo 3:13ɗe ichiáse.
