1 Pedro 5:1-14
5 Machi chi ijãabadaurã nubadaurãmaa mʉʉba chi chuburia iɗiiruu, mʉ siɗa ijãabadaurã nubariiɗeeba. Cristo ãrea biꞌiwãe ɓuaɗa mʉʉba unusii. Mauɗe Dachi Akõreba Cristo chi mechiu nii unubiaruuɗe mʉ siɗa ichi ome ɓuai. Mauɗeeba naka chi chuburia iɗiiruu:
2 Dachi Akõreba ãbarã machi juaɗe ɓuɗa ãrea nústuru. Maka waurã́sturu waabenarãba maka waubi panuuɗeeba. Maumaarã nu kʉ̃ria panuuɗeeba maka wáusturu.* Chi nejarra kʉ̃ria panuuɗeeba nurã́sturu, maumaarã sõɗeeba nu kʉ̃ria panuuɗeeba maka wáusturu.
3 Chi machiba nu uru panuurã, machi baita bari trajabadaurã kĩra uru panarã́sturu, maumaarã machi nibaɗeeba unubiásturu saka nibaɗai panuu.
4 Maabae Cristo dachi Nubarii chi Mechiu neeruuɗe machi chi mechiurã babiai boro jũra ãrikau dearuu kĩra.
5 Kũudrãarã, chõrarãba jaraaduu ijã́sturu. Jomaurã chiya aiɗa nureaɗai panuu waabena audeara chi mechiu nii kʉ̃risiaɗawẽa. Dachi Akõre beɗeaɗe naka ɓʉ kuɓuu:
«Chi nejuakaya nuree Dachi Akõreba ida biꞌia ɓuabiakau.
Maamina chi mechiu kʉ̃risiawẽa nuree Dachi Akõreba ichi sõbiaɗeeba aiɗabarii».*
6 Mauɗeeba Dachi Akõre juaɗe panásturu, chi ne joma poyaa waubarii Ichi daaɗe chi mechiu kĩra nureewãe baita. Maka chi ichiba ɓui ewariɗe, machi chi mechiurã ɓui.
7 Machiba ãrea kʉ̃risia panuu Dachi Akõremaa joma jarásturu, ichiba machi nu ɓuuɗeeba.
8 Kauwa panásturu mauɗe kĩrabia panásturu. Jʉbawãe nii machi chi kĩramaabarii imama kĩra arraa niiba kai koi jʉrʉi.*
9 Maamina jʉbawãe nii ijãarã́sturu. Cristoɗe ãrea ijãa panásturu, kuitaa panuuɗeeba machi ãbarã joma druacha nuree ara mau kĩra ãrea biꞌiwãe panuu.
10 Machi ewari ɓaꞌãra biꞌiwãe panapeɗaaɗakare Dachi Akõreba ne jomaɗe biꞌia ɓui. Ichiba machi aiɗai biꞌia ijãaɗamera, joma jãaduaɗamera mauɗe chaarea nureaɗamera. Dachi Akõreba ichi sõbiaɗeeba ne jomaɗe aiɗabarii. Ichiba machi Jesucristoɗeeba iusii ichi ome ewaricha chi mechiu nureaɗamera.
11 Biꞌia ɓuu ewaricha ne joma ichi juaɗe uru ɓuai.* Biꞌia ɓuu maka ɓuai.
Pedroba nau kartaɗe aanama ɓʉɗa
12 Ãba Silvanoba nau karta cheke aiɗa ɓʉsii. Mʉʉba kuitaa ɓuu ara ichiba jara ɓuu kĩra joma waubarii. Nau kartaɗeeba mʉʉba machi aiɗa kʉ̃ria ɓuu biꞌia ijãaɗamera. Mauɗe kuitaabiai kʉ̃ria ɓuu biawãra Dachi Akõreba ichi sõbiaɗeeba aiɗa ɓuu. Mau ijãa panásturu.
13 Ãbarã Babiloniaɗebenarãba jarabʉi panuu machi biꞌia panaɗai.* Machi jʉrʉ adauɗa kĩra ãchi siɗa Dachi Akõreba jʉrʉ adausii. Mʉ warr kĩra nii Marcos biɗa jarabʉi ɓuu machi biꞌia panaɗai.
14 Biawãra kʉ̃riaɗeeba chiya irsibiɗai panásturu.* Mʉʉba kʉ̃ria ɓuu joma machi, Jesucristo ome nuree jirukaraayuwãe nureaɗai.*
Notas
^ 5:2 Griego beɗeaɗe chi ɓee kartaɗe nau siɗa ɓʉ kuɓuu: Dachi Akõreba kʉ̃ria ɓuu kĩra.
^ Proverbios 3:34.
^ 5:8 Kai koi jʉrʉi. Mau jara ɓuu jʉbawãe niiba chi ãbarã kachiruaɗe ɓaebiai maebʉrã Dachi Akõre ida ɓubiai.
^ 5:11 Griego beɗeaɗe chi ɓee kartaɗe nau siɗa ɓʉ kuɓuu: ẽbẽrarãba ichimáburu biꞌia berreaɗai panuu.
^ 5:13 Babiloniaɗebenarã. Pedro ewariɗe ãbarãba Roma puuru «Babilonia» abachiɗau.
^ 5:14 Biawãra kʉ̃riaɗeeba chiya irsibiɗai panásturu. Griego beɗeaɗe naka ɓʉ kuɓuu: kʉ̃riaɗeeba ʉ̃yásturu chiya biꞌia nureaɗai aɗai baita
^ 5:14 Griego beɗeaɗe chi ɓee kartaɗe nau siɗa ɓʉ kuɓuu: biꞌia ɓuu maka ɓuai.
