1 Tesalonicenses 2:1-20
2 Ãbarã, machiba kuitaa panuu dai machimaa wã panasiɗauɗe bari wãɗaabasii.
2 Kuitaa panuu machimaa wãɗai naeɗe Filipoɗebenarãba dai kachirua jarasiɗau mauɗe kachirua wausiɗau.* Mau awara machimaa neesiɗauɗe ãreaba kʉ̃riaɗaabasii daiba jaradea panuu. Maamina Dachi Akõreba dachi sõbiabiasii ichi beɗea bia machimaa wapeawẽa jaradeaɗamera.
3 Daiba machimaa biawãrawãe jaradeabadau ijãarãaɗamera iɗiɗaabasii. Mauɗe machi tãeɗe setaɗeeba panuuwãe basii, machi setaa kũruaɗai baita.
4 Maumaarã Dachi Akõreba biꞌia unuɗaɗeeba dai iusii ichi beɗea bia jaradeaɗamera. Mauɗeeba daiba jaradeaduuɗe, makaɗakau chi ẽbẽrarãba daimaa ichiaɗapeɗa, kʉ̃riaɗamera. Bari jaradeabadau dai Dachi Akõre baara biꞌia panaɗamera. Ichiba dai sõ kʉ̃risia unubarii.
5 Machiba kuitaa panuu daiba setaɗeeba machi ẽbẽrarã biꞌia nuree aɗaabasii. Mauɗe chi nejarra adoeɗai baita setaɗeeba jaradeaɗaabasii. Mau Dachi Akõreba kuitaa ɓuu.
6 Daiba jʉrʉɗawẽa panasiɗau, machiba mauɗe waabenarãba dai ʉ̃rʉbena biꞌia jaraɗamera. Maumaarã dai Cristoba bʉikaɗaɗeeba daiba jaradea ua panaɗai panasiɗau machi tãeɗe. Maamina maka wauɗaabasii.
7 Maumaarã daiba kʉ̃ria panuuɗeeba machi kariba panasiɗau chi naweba chi warrarã nubarii kĩra.
8 Daiba machi ãrea kʉ̃ria panuuɗeeba bari chi Dachi Akõre ʉ̃rʉbena beɗea bia machimaa jaradeaɗakau, mauɗe machi ne jomaɗe aiɗaɗai baita panasiɗau.
9 Ãbarã, machiba kuitaa panuu ãyadaa mauɗe ẽsabuɗe kʉrrjĩruɗaabasii. Mau awara traju siɗa waubachiɗau chi nejarra adauɗai baita. Daiba chi Dachi Akõre ʉ̃rʉbena beɗea bia machimaa jaradea panasiɗauɗe, kʉ̃riaɗaabasii machiba daimaa ne kaebea dea panaɗayu, machi chiko ɓaꞌãra ɓeerãamera.
10 Machiba kuitaa panuu mauɗe Dachi Akõreba kuitaa ɓuu dai machi chi Cristoɗe ijãabadaurã tãeɗe biꞌia, jipa mauɗe kachirua jaraɗayuswãe nibasiɗau.
11 Mau awara kuitaa panuu chi akõreba ichi warrarã ome waubarii kĩra daiba machicha maka wau panasiɗau.
12 Daiba biꞌia jarasiɗau machi Dachi Akõreba kʉ̃ria ɓuu kĩra nibaɗamera. Ichiba machi iusii, ichi juaɗe ua ɓuai baita mauɗe ichi biaɗebena uru panaɗamera.
13 Daiba ewaricha machi baita Dachi Akõremaa ichíturu kiɗibai abadau. Machiba Dachi Akõre beɗea daiɗeeba ũrisiɗauɗe ẽbẽra kʉ̃risia kĩra ijãaɗaabasii. Maumaarã mau beɗea biawãra chi Dachi Akõre beɗea kuitaapeɗaaɗaɗeeba ijãasiɗau. Ara mau beɗeaba machi chi Cristoɗe ijãabadaurãmaa biꞌia waubia ɓuu.
14 Ãbarã, machiba ijãa panuu kakua ara machi druaɗebenarãba kachirua wau panasiɗau Dachi Akõreɗe ẽbẽrarã judiorã druaɗe makapeɗaaɗa kĩra. Aria Jesucristoɗe ijãabadaurã judiorã chi ijãaɗakaurãba kachirua wau panasiɗau.
15 Ara maarãba Dachi Mechiu Jesús mauɗe Dachi Akõre baita berreabadaurã siɗa beasiɗau. Mau awara dai ãyaa bʉisiɗau. Maarã Dachi Akõreba biꞌia unukau. Maarãba jomaurã kĩramaabadau.
16 Dachi Akõreba karibamera daiba judiowãerãmaa jaradea kʉ̃ria panuuɗe, maarãba daiba jaradeaɗai ida kabiɗaabasii. Maka aude kachirua wau panuuɗeeba Dachi Akõreba ichi oa kachiruaɗeeba maarã ãrea kastikai.
Pablo Tesalonicaɗebena ãbarã ichiaɗe wã kʉ̃ria ɓuaɗa
17 Ãbarã, ãrea bawẽa ɓuu, dai machi baara panaɗa ãyaa wãpeɗaaɗa. Nauɗe daiba machi unuɗawẽa panumina dai kʉ̃risiaɗe machi baara panuu. Daiba biawãra machi ichiaɗe wã kʉ̃ria panasiɗau maamina Satanasba ida ɓuubasii wãrãaɗamera. Mʉ biawãra ɓes ãrea machimaa wãi baita ɓuasii.
18 —.
19 Biawãra dai machi kakua kĩrajʉʉ panuu. Mau awara kuitaa panuu Dachi Mechiu Jesucristo neeruuɗe daiba machi jipa panuu ichimaa unubiɗai. Mauɗe ichi daaɗe machi kakua dai kĩrajʉʉ panaɗai.*
20 Biawãra machi dai nejuakayabʉ mauɗe kĩrajʉʉbʉ.
