1 Tesalonicenses 3:1-13
3 Daiba waa poyaa dauchia jãadua panaɗaabasiiɗeeba dai du aɓa Atenas puuruɗe panuumisa kʉ̃risiasiɗau dachi ãba Timoteo machimaa bʉiɗai. Dachi Akõre baita trajabarii Timoteoba dai ome araɓau beɗea bia Cristo ʉ̃rʉbena jaradeabarii.* Ara makʉɗe ichi bʉisiɗau Cristoɗe biꞌia ijãa panuuɗeeba dauchia jãadua panaɗamera,
2 —.
3 mauɗe machi ãrea biꞌiwãe panuuɗe, mau ãrea kʉ̃risiarãaɗamera. Machiba kuitaa panuu Cristoɗe ijãa panuu baita dachi ãrea nebʉraɗe panaɗai panuu.
4 Machi baara panasiɗauɗe daiba jarabachiɗau ẽbẽrarãba dachi ãrea nebʉraɗe panabiɗamera. Machiba kuitaa panuu biawãra makasii.
5 Mauɗeeba mʉʉba waa poyaa dauchia jãadua ɓuawẽeɗeeba Timoteo machimaa bʉisii, wabiɗa Cristoɗe ijãa panuu kuitaai baita. Mʉʉba kʉ̃risia ɓuasii jʉbawãe niiba machimaa Cristo ida ɓubia ɓuasii. Makaɗa basirã daiba machimaa Cristo ʉ̃rʉbena jaradeapeɗaaɗa bari ara jãka ɓuai basii.
6 Maamina Timoteo machimaa ɓuaɗa daimaa neesii. Machiba Cristoɗe ijãa panuu ʉ̃rʉbena mauɗe machi kʉ̃ria ʉ̃rʉbena ichiba biꞌia jaraɗe neesii. Ichiba jarasii machiba kʉ̃riaɗeeba wabiɗa dai kĩrababadau mauɗe unu kʉ̃ria panuu, daiba machi unu kʉ̃ria panuu kĩra.
7 Mauba ãbarã, daiba kuitaasiɗau machiba Jesusɗe wabiɗa ijãa panuu. Mauɗeeba dai ãrea nebʉra baraa panumina kĩrajʉʉsiɗau.
8 Jãabae dai biawãra sõbia paneesiɗau, kuitaa panuuɗeeba machi Dachi Mechiuɗe dauchia jãadua panuu.
9 ¿Saka ichíturu kiɗibai jaraɗaima, dai ãrea kĩrajʉʉ panuu Dachi Akõre daaɗe machi ʉ̃rʉbena?
10 Ãsaeɗe, ẽsabuɗaa biɗa daiba Dachi Akõremaa ʉtaa iɗibadau machi ichiaɗe wãɗai baita. Maka machiba Cristo ʉ̃rʉbena wabiɗa adua panuu daiba poyaa jaradeaɗai joma aude ijãaɗamera.
11 Daiba Dachi Bajãaɗebena Akõremaa mauɗe Dachi Mechiu Jesusmaa ʉtaa iɗi panuu machimaa waya wãbiaɗamera.
12 Daiba kʉ̃ria panuu Dachi Mechiuba machi aiɗa ɓuai jomaurã ome biꞌia chiya kʉ̃ria panaɗamera daiba machi ãrea kʉ̃ria panuu kĩra.
13 Mauɗe ʉtaa iɗi panuu Cristoba machi kariba ɓuai sõɗeeba ãrea ijãaɗamera. Maka Dachi Mechiu Jesús joma ichiɗirã baara neeruuɗe machi Dachi Bajãaɗebena Akõre daaɗe kachiruaswãe nureaɗai.
Notas
^ 3:1-2 Dachi Akõre baita trajabarii. Griego beɗeaɗe chi ɓee kartaɗe ɓʉ kuɓuu: Dachi Akõre baita bari trajabarii.
