1 Timoteo 2:1-15
2 Nau biꞌia jaraaruu: joma ẽbẽrarã baita ãbarãba Dachi Akõremaa chi chuburia iɗiɗai panuu, ichiba karibamera ʉtaa iɗiɗai panuu mauɗe ichíturu kiɗibai aɗai panuu.
2 Joma nau iujãaɗebena reyrã baita mauɗe jaradea ua ɓuabadaurã baita Dachi Akõremaa ʉtaa iɗiɗai panuu dachi jirukaraayuwãe panaɗai baita, apii panaɗai baita, Dachi Akõre wapea panaɗai baita mauɗe ne jomaɗe jipa panaɗai baita.
3 Maka ʉtaa iɗi panaɗai biꞌia ɓuu. Dachi Karibabarii Dachi Akõreba mau biꞌia unu ɓuu.
4 Ichiba kʉ̃ria ɓuu jomaurãba chi biawãra beɗea kuitaapeɗaaɗa kachiruaɗebena karibaɗai.
5 Dachi Akõre aɓaburu nii. Mauɗe chi ẽbẽrarã Dachi Akõre ome nebʉraɗe panaɗa mau biꞌia nibabiabarii aɓaburu nii. Mau ẽbẽra Jesucristobʉ.
6 Ara ichi ida beabisii ẽbẽrarã joma kariba ɓuai baita. Dachi Akõreba ɓuɗa ewariɗe mau kuitaabisii.
7 Mau baita mʉ ichi beɗea jarabarii ɓusii. Mʉ ichiba bʉiɗa ɓusii chi biawãra beɗea ichi ijãaɗai panuu ʉ̃rʉbena judiowãerãmaa jaradeaɗe wãmera. Mʉʉba biawãra jara ɓuu* mauɗe setawãe ɓuu.
8 Mauɗeeba, ãbarã araa ãbua imiiduucha mʉʉba kʉ̃ria ɓuu mukĩrarãba kʉ̃risia biaɗeeba ãchi jua ʉtaa jiraaduuɗe Dachi Akõremaa ʉtaa iɗiɗamera. Mauɗe kĩru panaɗaabai panuu mauɗe oa kachirua berrea panaɗaabai panuu.*
9 Mʉʉba kʉ̃ria ɓuu wẽrarãba paru arakʉɗe jʉ̃ɗamera, wẽrarã jipa nureeba jʉ̃badau kĩra. Ãchi buɗa ãrea kapipia meraa iruɗawẽa panaɗai panuu. Nee maebʉrã perla jʉ̃ɗawẽa panaɗai panuu. Mauɗe paru chi nejarr ãrea iɗibadau jʉ̃ɗawẽa panaɗai panuu.
10 Maumaarã Dachi Akõre wapea panuuɗeeba, wẽrarãba biꞌia wau panuuɗeeba ãrea biꞌia kapipia jʉ̃badau kĩra panaɗai panuu.
11 Ãbarã araa ãbua imiiduuɗe wẽrarãba chũpea ũriɗai panuu mauɗe chi ijãabadaurã nubadaurã wapea panaɗai panuu.*
12 Ãbua panuuɗe mʉʉba ida ɓukau wẽraba mukĩrarãmaa jaradea ɓuai maebʉrã mukĩra ichi juaɗe uru ɓuai. Maumaarã wẽrarãba chũpea ũri panaɗai panuu.
13 Maka ɓuai ɓuu Dachi Akõreba Adán naa wausiiɗeeba. Mawãare Eva wausii.
14 Mau awara jʉbawãe niiba Adán setaa kũruabasii, maumaarã wẽráturu setaa kũruasii. Maka setaa kũruasiiɗe wẽraba kachirua wausii.
15 Maamina wẽrarãba warr adaubadauɗeeba maarã karibai, Cristoɗe ijãa paneeduubʉrã, biawãra waabenarã kʉ̃ria uru paneeduubʉrã mauɗe Dachi Akõre baita biꞌia paneeduubʉrã. Joma mau kĩra jipa nureaɗai panuu.*
Notas
^ 2:7 Mʉʉba biawãra jara ɓuu. Griego beɗeaɗe chi ɓee kartaɗe naka ɓʉ kuɓuu: Mʉ chi Cristoɗebena biawãra jara ɓuu.
^ 2:8 Dachi Akõremaa ʉtaa iɗiɗamera. Mau ewariɗe ẽbẽrarãba jua ʉtaa jirabachiɗau Dachi Akõremaa ʉtaa iɗiiduuɗe. Mauɗeeba ɓeseɗe Dachi Akõremaa ʉtaa iɗiɗai jaraɗai baɗamaarã jarabachiɗau: «Jua ʉtaa jiraɗai».
^ 2:11 Chi ijãabadaurã nubadaurã wapea panaɗai panuu. Griego beɗeaɗe ɓʉ kuɓuuwãe kai wapea panaɗai panuu.
^ 2:15 Griego beɗeaɗe mau chaarea ɓuu biꞌia ũriɗamera. Dachi Akõre beɗea ãrea kuitaabadaurã baita, Pabloba kuitaabi ɓuasii wẽrarã chi jaradea ua ɓuabadaurãwãemina biꞌia nuree. Ichiba jaraabasii warrarã adauɗai panuu karibaɗai baita.
