2 Corintios 7:1-16
7 Ãbarã, Dachi Akõreba dachimaa mau joma waui asiiɗeeba nau kakuaba kachirua waubarii mauɗe dachi kʉ̃risiaɗeeba waubarii joma ida ɓuɗai panuu. Dachi Akõre ãrea wapea panuuɗeeba ichi baita biꞌia nureaɗai panuu.
Pablo Corintoɗebena ãbarã kakua kĩrajʉʉɗa
2 Sõɗeeba dai kʉ̃riásturu. Daiba aɓaumaa biɗa kachirua wauɗawẽa panuu, kachirua kʉ̃risiabiaɗawẽa panuu mauɗe setaa kũruaɗawẽa panuu.
3 Mʉʉba mau jarawẽa ɓuu machi ʉ̃rʉbena kachirua jarai baita. Mʉʉba naeɗe jara ɓuasii daiba machi sõɗeeba kʉ̃ria panuu. Mauɗe machi ome ãbua panuuɗe maebʉrã biuduuɗe maka kʉ̃ria panaɗai.
4 Mʉʉba machimaa biawãra berrea ɓuu mauɗe machi kakua mʉ kĩrajʉʉ ɓuu. Dai ãrea biꞌiwãe panuuɗe mʉ machi kakua sõbiaɗeeba ɓuabarii mauɗe ãrea kĩrajʉʉ ɓuabarii.
5 Macedonia druaɗe neesiɗauɗe dai poyaa kʉrrjĩruɗawẽa panasiɗau, maumaarã ne jomaɗe ãrea biꞌiwãe panasiɗau. Ẽbẽrarã dai ome oa kachirua berreabachiɗau mauɗe dai ne wapea nibabachiɗau.
6 Maamina Tito neesiiɗe dai kĩrajʉʉbiasii Dachi Akõreba chi kĩra nomaa nuree kĩrajʉʉbiabariiɗeeba.
7 Dai ichi neeɗa kakúaburu kĩrajʉʉɗaabasii, maumaarã machi kakua kĩrajʉʉsiɗau. Ichiba jarasii machi ome ɓuasiiɗe machiba ichi kĩrajʉʉbipeɗaaɗa. Mau awara nebʉrʉsii machiba dai unu kʉ̃ria panuu, kachirua waupeɗaaɗa kakua kĩra nomaaba jẽa panuu mauɗe kʉ̃riaɗeeba mʉ ʉ̃rʉbena kʉ̃risia panuu. Mauɗeeba mʉ ãrea kĩrajʉʉsii.
8 Mʉʉba karta naa ɓʉɗaba machi kĩra nomaabia ɓuasmina mʉ kĩra nomaawẽa ɓuu. Biawãra naeɗe kĩra nomaa ɓuasii. Kuitaasii machi awawarrea kĩra nomaa panasmina mau kartaɗeeba machi kĩra nomaabiasii.
9 Maamina jãabae mʉ kĩrajʉʉ ɓuu. Kĩrajʉʉ ɓuuwãe machi kĩra nomaabiasiiɗeeba, maumaarã kĩrajʉʉ ɓuu machiba kachirua wau panaɗa kĩra nomaaɗeeba ida ɓuɗapeɗa waya Dachi Akõremaa neesiiɗauɗeeba. Biawãra Dachi Akõreba kʉ̃ria ɓuu kĩra machi kĩra nomaa paneesiɗau. Maka daiba kastikapeɗaaɗa kakua machi kachirua nureaɗaabasii.
10 Aɓaba kachirua wauɗa kakua Dachi Akõreba kʉ̃ria ɓuu kĩra nomaa ɓeeruubʉrã, ichiba kachirua wauɗa ida ɓupeɗa Dachi Akõremaa neei. Maabae Dachi Akõreba ichi karibai. Dachi Akõre ome biꞌia ɓeesiiɗeeba mau kĩra nomaa ɓuaɗa kachirua kʉ̃risiakau. Maamina aɓaba nau iujãaɗebenarã kĩra nomaabadau kĩra nomaaruubʉrã, kachirua ida ɓuwẽeɗeeba biui.
11 Dachi Akõreba kʉ̃ria ɓuu kĩra machi kĩra nomaasiɗauɗeeba mau kĩra nomaaba machimaa jipa kʉ̃risiabiapeɗa jipa waubiasii. Mauɗeeba machiba jipa wau panuu jomaurãmaa kuitaabiai kʉ̃ria panuu. Ãbaba kachirua wauɗa kakua machi kĩrusiɗau mauɗe Dachi Akõreba kastikai baɗa wapeasiɗau. Mauɗeeba chi kachirua wauɗa ẽbẽra kastikaɗapeɗa ãyaa bʉisiɗau. Nejomaɗeeba machiba unubisiɗau mau kachirua wauɗa kakua nebʉraswãe panuu.*
12 Mʉʉba mau karta chi kachirua wauɗa ẽbẽra kastikai báitaburu ɓʉʉbasii. Mauɗe chi kachirua ɓeeɗa ẽbẽra aiɗai baita ɓʉʉbasii. Maumaarã ɓʉsii machiba ijãa panuuɗeeba Dachi Akõre daaɗe kuitaaɗamera biawãra dai ome panuu.
13 Joma mauba dai kĩrajʉʉbiasii.
Mau awara machiba Tito kĩrajʉʉbisiɗau. Ichi machimarebena kĩrajʉʉ neesiiɗeeba dai ãrea kĩrajʉʉsiɗau.
14 Tito machimaa wãi naeɗe mʉʉba machi ʉ̃rʉbena ichimaa biꞌia jarasii. Mʉʉba jaraɗa kĩra Titoba unuɗe wãsiiɗeeba mʉ machi kakua kĩra nejasiawẽa ɓuu. Joma daiba machimaa jaradeapeɗaaɗa biawãra basii. Ara mau kĩra joma daiba Titomaa machi ʉ̃rʉbena biꞌia jarapeɗaaɗa biawãra basii.
15 Titoba kĩraba ɓuabarii machiba ichi beɗea ijãapeɗaaɗa mauɗe wapea panuuɗeeba ichi biꞌia irsibisiɗau. Mauɗeeba machi ãrea kʉ̃ria ɓuu.
16 Jãabae mʉ siɗa kĩrajʉʉ ɓuu. Mʉʉba kuitaa ɓuu machiba biawãra jipa wau panaɗai.
Notas
^ 7:11 Chi nuree karta griego beɗeaɗe ɓʉ kuɓuu: mʉ unu kʉ̃ria panuu.
