2 Juan 1:1-13
1 Mʉ Chõrabʉ.* Mʉʉba nau karta ɓʉʉruu wẽra Dachi Akõreba jʉrʉ adauɗa baita mauɗe ichi warrarã baita biɗa. Mʉʉba machi biawãra kʉ̃ria ua ɓuu. Mʉaburu machi kʉ̃ria ɓuwãema, maumaarã joma chi biawãra beɗea kuitaa nureerãba machi kʉ̃ria panuu.
2 Maka kʉ̃ria panuu, chi biawãra beɗea dachi sõɗe ɓuuɗeeba. Mauɗe dachi sõɗe ewaricha ɓuai.
3 Mau biawãra beɗea ijãa panuuɗeeba mauɗe chiya kʉ̃ria panuuɗeeba, mʉʉba kʉ̃ria ɓuu Dachi Bajãaɗebena Akõreba, dachi Akõre Warr Jesucristo ome ãchi sõbiaɗeeba machi kariba panaɗai, kĩra chuburia panaɗai mauɗe jirukaraayuwãe panabiaɗai.*
Chiya kʉ̃ria panaɗai panuu
4 Mʉʉba bichi warrarãɗebena chi nuree unusii. Mʉ kĩrajʉʉsii ãchi chi biawãraɗe nibasiɗauɗeeba, Dachi Bajãaɗebena Akõreba jara ɓuu kĩra.
5 Neekau, mʉʉba chi chuburia iɗimaa ɓuu dachi chiya kʉ̃riaɗamera. Dachi Akõreba waubi ɓuu beɗea wiɗiwãebʉ, maumaarã mau dachiba araɓaeɗeeɗe ũri panasiɗau.*
6 Dachiba naka waabenarã kʉ̃ria panaɗai panuu: Dachi Akõreba waubi ɓuu beɗea wau panaɗai. Mau waubi ɓuu beɗea machiba araɓaeɗeeɗe ũrisiɗau. Mauba jara ɓuu kʉ̃riaɗeeba nibaɗai panuu.
7 Chi nuree setaa kũruabadaurã nau iujãaɗe ãrea nibabadau. Maarãba ijãaɗakau Jesucristo nau kakuaɗe dachi kĩra neesii. Chi maka ɓuu waabenarã setaa kũruabarii mauɗe Cristo kĩramaabʉ.
8 Kauwa panásturu machi setaa kũruabiarãaɗamera. Maka machiba chi Dachi Akõre baita wau panuu ichiba deai baɗa wãꞌãe bai, maumaarã joma adauɗai.*
9 Barikiuba Cristoba jaradeaɗa ãyaa jaradea nibaaruubʉrã, maebʉrã Cristoba jaradeaɗa ida ɓuuruubʉrã, mau Dachi Akõreswãe nii. Maamina barikiuba Cristoba jaradeaɗa ijãa niibʉrã, chi Akõre mauɗe chi Warr siɗa uru ɓuu.
10 Ẽbẽra machimaa wãaruuɗe Cristoba jaradeaɗa kĩra jaradeawẽebʉrã, mau machi deɗe biꞌia irsibirã́sturu mauɗe «biꞌia ɓuu bichi neesii» arã́sturu.
11 Chi «biꞌia ɓuu bichi neesii» a ɓuuba mau kachirua ichi ome ãbua wau ɓuu.
Juanba nau kartaɗe aanama ɓʉɗa
12 Mʉʉba machimaa ãrea jara kʉ̃ria ɓumina nau kartaɗe joma ɓʉwẽma. Mʉʉba machi ichiaɗe wã kʉ̃ria ɓuu. Mauɗe machi ome ãbua berreaɗai ãrea kĩrajʉʉɗai baita.
13 Bichi neekau warrarã Dachi Akõreba karibaɗaba kʉ̃ria panuu machi biꞌia duanaɗai.*
Notas
^ 1 Chõrabʉ. Waabenarãmaarã mau jara ɓuu «ijãabadaurã nubarii».
^ 3 Juan 1:14-18.
^ 5 Juan 13:34.
^ 8 Machiba chi Dachi Akõre baita wau panuu. Griego beɗeaɗe chi ɓee kartaɗe ɓʉ kuɓuu: daiba Dachi Akõre baita wau panabadau.
^ 13 Griego beɗeaɗe chi ɓee kartaɗe nau siɗa ɓʉ kuɓuu: amén. Mau jara ɓuu «biꞌia ɓuu maka ɓuai».
