2 Pedro 3:1-18
3 Ãbarã, nau chi ome karta mʉʉba machi baita ɓʉmaa ɓuu. Karta ome ɓʉɗaɗe mʉʉba chi biawãra beɗea kĩrababia ɓuu jipa kʉ̃risiaɗamera.
2 Mʉʉba kʉ̃ria ɓuu Dachi Akõre baita berreabadaurãba naa jarapeɗaaɗa machiba kĩrabaɗayu. Mauɗe kʉ̃ria ɓuu Jesucristo Dachi Mechiu, Dachi Karibabariiba jaraɗa kĩrabaɗayu. Mau ichiba bʉiɗarãba machimaa jaradeasiɗau.
3 Nau ãrea kuitásturu: kaaɗebena ewariɗe Dachi Akõre atua jarabadaurã baraai. Ãchi kakuaba kachirua wau kʉ̃ria ɓuu wau panaɗai.
4 Naka atua jaraɗai: «Cristo neei jaraɗa ¿kãare sãasma? Dachi nabẽraeɗebenarã joma biusiɗau. Maamina nau iujãa wausiiɗeeɗebena joma ara maka ɓuu».
5 Mau ẽbẽrarãba ijãa kʉ̃riaɗawẽa panuu nabẽraeɗe Dachi Akõre beɗeaba bajãa wausii, iujãa mar ekareɗebena neebisii mauɗe baniaɗebena maka wausii.*
6 Ara mau baniaba joma nau iujãaɗe chi mau ewariɗe panaɗa kinibisii mau bania ãrea chesiiɗeeba.
7 Ara mau kĩra Dachi Akõre beɗeaba nau iujãa mauɗe bajãa nu uru ɓuu mauɗe ichiba kastikai ewariɗe tʉbʉchiaɗe baai. Mau ewariɗe chi ichi kʉ̃riaɗakaurã nebʉra ichiapeɗa joma kastikai.
8 Maamina ãbarã, nau kĩraba panaɗa ida ɓurã́sturu: Dachi Mechiumaarã ewari aɓa 1.000 años kĩra ɓuu mauɗe 1.000 años ewari aɓa kĩra ɓuu.
9 Dachi Mechiu neei aɗa baɗa kãꞌãa ɓuuɗeeba waabenarãba kʉ̃risia panuu neebai. Maamina makawãema. Maumaarã machi kakua joma jãadua ɓuuɗeeba kãꞌãa ɓuu. Ichiba kʉ̃riawẽa ɓuu ẽbẽra aɓa biɗa ichiɗebena ãi ɓuai. Kʉ̃ria ɓuu jomaurãba kachirua ida ɓuɗapeɗa ichimaa neeɗai.
10 Dachi Mechiuba kastikai ewari bai nechiru neebarii kĩra.* Mau ewariɗe kachirua ãrea ʉrʉrʉapeɗa bajãa wãꞌãebii. Ne joma dachiba bajãaɗe unubadau baawãi. Mauɗe nau iujãa mauɗe ne joma nau iujãaɗe nuree baawãi.*
11 Ne joma wãꞌãe baiɗeeba machi Dachi Akõreba kʉ̃ria ɓuu kĩra jipa mauɗe kachiruaswãe nibaɗai panuu.
12 Dachi Akõreba kastikai ewari eseɗau panuumisa Dachi Akõreba kʉ̃ria ɓuu wau panásturu mau ewari isa bamera.* Mau ewariɗe Dachi Akõreba bajãa baai. Ne joma dachiba bajãaɗe unubadau mauɗe nau iujãaɗe unubadau wãsiaba dorraɓarii.
13 Maamina Dachi Akõreba bajãa wiɗi mauɗe iujãa wiɗi waui asii. Mau dachiba eseɗau panuu. Mama jomaurãba jipa wau nureaɗai.
14 Ãbarã, machiba joma mau eseɗau panuuɗeeba ne jomaɗe kĩra jipa nibásturu Dachi Akõreba machi biꞌia, kachiruaswãe, ichi ome jirukaraayuwãe panuu unumera.
15 Kĩrabásturu Dachi Mechiuba ẽbẽrarã karibai baita joma jãadua ɓuu. Ara mau kĩra dachiba kʉ̃ria panuu ãba Pablo biɗa kartaɗe machi baita ɓʉsii, Dachi Akõreba ichimaa deaɗa kʉ̃risia kuitaaɗeeba.
16 Mauba kartacha mau ʉ̃rʉbena ɓʉsii. Mau kartaɗebena kʉ̃risia ichiba ɓʉɗa chaarea ɓuu kuitaaɗai baita. Chi biawãra beɗea adua nureerãba mauɗe chi ãrea ijãaɗakaurãba mauba ɓʉɗa biꞌiwãe jaradeabadau, chi Dachi Akõre beɗea ɓʉpeɗaaɗa biꞌiwãe jaradeabadau kĩra. Mauɗeeba Dachi Akõreba ãchi nebʉra ichiai.
17 Ãbarã, machiba mau kuitaa panuuɗeeba kauwa panásturu ẽbẽra kachiruarãba biꞌiwãe jaradea panuuba setaa kũruarãaɗamera. Maka machiba ãrea ijãa panuu ida ɓuɗaabai.
18 Jesucristo Dachi Mechiu mauɗe Dachi Karibabarii ʉ̃rʉbena biꞌia kuitaa kãribásturu. Ichi sõbiaɗeeba warísturu. Iɗi mauɗe ewaricha ichimaa biꞌia berreaɗai panuu. Biꞌia ɓuu maka ɓuai.
Notas
^ 3:5 Baniaɗebena maka wausii. Griego beɗeaɗe mau chaarea ɓuu biꞌia ũriɗamera.
^ 3:10 Neebarii kĩra. Griego beɗeaɗe chi ɓee kartaɗe naka ɓʉ kuɓuu: ẽsabuɗe neebarii kĩra.
^ 3:10 Ne joma nau iujãaɗe nuree baawãi. Griego beɗeaɗe mau chaarea ɓuu biꞌia ũriɗamera. Waabenarãmaarã naka jara ɓuu: «Mauɗe Dachi Akõreba ẽbẽrarã nebʉra ichiaruuɗe maarãba nau iujãaɗe waupeɗaaɗa joma unubiai».
^ 3:12 Dachi Akõreba kʉ̃ria ɓuu wau panásturu mau ewari isa bamera. Mau beɗea poyaa naka ɓʉ kuɓuu: mau ewari isa neei kʉ̃riaɗai panuu.
