2 Tesalonicenses 2:1-17
2 Mau awara ãbarã, daiba chi chuburia iɗi panuu Dachi Mechiu Jesucristo neei ʉ̃rʉbena mauɗe dachi ichi ome ãbua panaɗai ʉ̃rʉbena ara makʉɗe adua panuu kãare kʉ̃risiaɗayu. Aɓauba Dachi Mechiuba kastikai ewari neesii aaruubʉrã, perarã́sturu. Barikiuba Dachi Akõre ʉ̃rʉbena berrea ɓuu kĩra maka jaraaruubʉrã, maebʉrã maka jaradearuubʉrã maebʉrã daiba kartaɗe maka ɓʉpeɗaaɗa aaruubʉrã, ijãarã́sturu.
2 —.
3 Aɓau biɗa aɓaumaa ida setaa kũruarã́sturu. Dachi Mechiuba kastikai ewari neei naeɗe ãrea ẽbẽrarãba Dachi Akõre ida ɓuɗai. Mauɗe chi ẽbẽra kachirua nii unubiai. Mau ẽbẽra Dachi Akõreba tʉbʉ aokoɗe jiratai.*
4 Ichiba Dachi Akõre mauɗe joma ẽbẽrarãba dachi akõre abadau kʉ̃riakau ɓuai. Ichiba joma mau audeara chi mechiu nii ai. Mauɗeeba Dachi Akõre de mechiuɗe akʉ ɓeepeɗa, ichíturu Dachi Akõre ai.
5 Machimaa ɓuasiiɗe mʉʉba ¿mau jarawẽa ɓuaska? ¿Kĩrabaɗawẽa panuka?
6 Mauɗeeba kuitaa panuu kãareba mau ẽbẽra ida neebiwẽa ɓuu. Maamina ichi ewari neeruuɗe neei.
7 Ʉ̃rauɗaa chi kachirua miru waumaa ɓuu, maamina chi ida ɓuwẽa ɓuuba mau ẽbẽra kachirua nii ida neebiwẽa ɓuu. Maka ɓuai aɓa Dachi Akõreba chi ida ɓuwẽa ɓuu ãyaa adoeruuɗaa.
8 Maabáeburu chi kachiruaɗebena ẽbẽra neei. Maamina Dachi Mechiu Jesús kĩrawãrea teɗechoa neeruuɗe ara berrearuuba mau ẽbẽra beai.*
9 Chi ẽbẽra kachirua nii Satanasba neebii. Mauba jʉbawãe nii poyaabariiba ẽbẽrarãba ne poyaa wauɗakau joma barikiu waukuai, ẽbẽrarãba Dachi Akõreba maka wau ɓuu kʉ̃risiaɗamera.
10 Ne barikiu kachirua wau ɓuuɗeeba ẽbẽrarã tʉbʉ aokoɗe ãrea biꞌiwãe panaɗai panuu, mauba setaa kũrai. Ãchiba chi biawãra beɗea kʉ̃riaɗakauɗeeba Dachi Akõreba karibaabai.
11 Mauɗeeba Dachi Akõreba ida setaa ijãabiai. Maka ara ãchi du aɓa ãrea setaa kũrua nureaɗai.
12 Mau ẽbẽrarã chi beɗea biawãra ijãawẽa nureerãba kachirua kʉ̃ria waubadauɗeeba Dachi Akõreba kastikai.
Dachi Akõreba ichi ijãabadaurã karibaɗa
13 Ãbarã, daiba ewaricha machi baita Dachi Akõremaa ichíturu kiɗibai abadau. Dachi Mechiuba machi kʉ̃ria ɓuu. Ichiba araɓaeɗeeɗe machi jʉrʉ adausii karibai baita. Machiba ichi beɗea biawãra ijãa panuuɗeeba mauɗe ichi Jauriba machi ichi baita biꞌia ɓuɗaɗeeba aiɗai.
14 Daiba beɗea bia Cristo ʉ̃rʉbena jaradea panuuɗeeba Dachi Akõreba machi iusii Dachi Mechiu Jesucristo bia niiɗebena adauɗamera.
15 Mauɗeeba ãbarã, dauchia jãadua panásturu. Daiba jaradeapeɗaaɗa mauɗe kartaɗe ɓʉpeɗaaɗa kĩrabarã́sturu.
16 Dachi Akõreba dachi kʉ̃riasii. Ichi sõbiaɗeeba sõbia nureabiasii ewaricha maka panaɗamera. Mauɗe kuitaabiasii biawãra ichiɗeeba ne bia adauɗai. Daiba kʉ̃ria panuu Dachi Mechiu Jesucristoba mauɗe Dachi Bajãaɗebena Akõreba* machi sõbiabiɗayu mauɗe dauchia jãadua panaɗayu. Maka machiba berrea panuu mauɗe wau panuu joma biꞌia ɓuai.
17 —.
