2 Timoteo 4:1-22
4 Jesucristo neei ichiɗirã ichi juaɗe ua ɓuai baita. Mauɗe ẽbẽrarã chokae nuree mauɗe biupeɗaaɗa nebʉra ichiai. Mauɗeeba Jesucristo daaɗe mauɗe Dachi Akõre daaɗe mʉʉba nau beɗea jaraaruu bichiba waumera:
2 Dachi Akõre Beɗea jaradea ɓuase. Ẽbẽrarãba ũri kʉ̃ria panuuɗe mauɗe ũri kʉ̃riaɗawẽa panuuɗe jaradeai baita ɓuase. Biꞌiwãe wau nuree jipa waui kuitaabiáse. Kachirua wau nuree iadaase. Mauɗe ãbarã aiɗase biꞌia ijãaɗamera. Joma jãadua ɓuuɗeeba, kauwa jaradea ɓuuɗeeba maka wause.
3 Ewari aɓa neeruuɗe ẽbẽrarãba biawãra beɗea ũri kʉ̃riaɗawẽa panaɗai. Maumaarã ara ãchiba kʉ̃ria panuu maka wauɗai. Mauɗeeba jaradeabadaurã ãrea jʉrʉɗai ãchiba ũri kʉ̃ria panuu jaradeaɗamera.
4 Chi biawãra beɗea ũriɗai ida ɓu panaɗai, mauɗe nabẽraeɗebena nebʉrʉbadau ijãaɗai.
5 Maamina bichi jomaɗe kĩra jipa ɓuase. Joma nebʉraɗe ɓuuɗe jãadua ɓuase. Beɗea biꞌia Cristo ʉ̃rʉbena jaradea ɓuase. Joma bichiba Dachi Akõre baita waui ɓuu jipa wau ɓuase.
6 Kãꞌãabariwãeɗe mʉ beaɗai.* Mʉ biui ewari ʉ̃rʉ ba ɓuu.
7 Mʉʉba Dachi Akõre baita waui ɓuaɗa joma wausii, pirabarii chi neei ɓuumaa neebarii kĩra. Joma jipa wausii biꞌia chĩoɗa kĩra. Mʉʉba Cristo ida ɓuwẽa ɓuu.
8 Mʉʉba jipa wau ɓuu baita Dachi Mechiuba mʉ baita boro jũra nu uru ɓuu. Ichiba jipa ichiabariiɗeeba mau boro jũra mʉʉmaa deai ichiba ichiaruuɗe. Maamina aɓaburu mʉʉmaa deabai, maumaarã joma ichi neei ewari unu kʉ̃ria nureerãmaa deai.
Pabloba jaraɗa Timoteo neemera
9 Isa mʉ ichiaɗe neese.
10 Dachi ãba Cresente Galacia druaɗaa wã ɓuasii. Tito Dalmacia druaɗaa wã ɓuasii. Mau awara ãba Demasba chi nau iujãaɗebena ãrea kʉ̃riasiiɗeeba mʉ ida ɓupeɗa Tesalónica puuruɗaa wãsii.
11 Aɓaburu ãba Lucas mʉ ome ɓuu. Bichi neeruuɗe ãba Marcos jʉrʉɗe wãpeɗa eneese.* Mʉʉba Dachi Akõre baita wau ɓuu mauba aiɗai ɓuu.
12 Ãba Tíquico mʉʉba Efesoɗaa bʉisii.
13 Bichi neeruuɗe mʉ paru ʉ̃rʉ jʉ̃barii eneese. Mau Troas puuruɗe, ãba Carpo deɗe ɓeesii. Mauɗe mʉ karta eneese. Mʉʉba aude kʉ̃ria ɓuu chi kartarã ãnimara eɗe ɓʉ kuɓuu.
14 Jiorrɗeeba ne waubarii Alejandroba mʉ kachirua wausiiɗeeba Dachi Mechiuba kastikai.
15 Ichi ome kauwa ɓuase. Dachiba jaradea panuu ʉ̃rʉbena ichiba ãrea kachirua jarasii.
16 Ara michi baita chi juez daaɗe berreasiiɗe aɓau biɗa mʉ kakua berreabasii, mʉ aiɗai baita. Maumaarã jomaurãba mʉ ida ɓusiɗau. Mʉʉba kʉ̃riawẽe mau ʉ̃rʉbena Dachi Akõre daaɗe maarã nebʉra baraa panuu ayu.
17 Maamina Dachi Mechiu mʉ ome ɓuasii. Mʉ poyaabarii deasii ichi beɗea jaramera. Maka joma judiowãerã aria panuuba ũrisiɗau. Mauɗe Dachi Mechiuba mʉ imama okarrɗebena karibasii.
18 Ichiba joma mʉ kachirua wauruuɗebena karibai. Mʉ biꞌia nupeɗa bajãaɗaa adooi, ichiɗirã ichi juaɗe ua ɓuuɗaa. Ewaricha ichimaa ãrea biꞌia berreaɗai panuu. Biꞌia ɓuu maka ɓuai.
Pabloba nau kartaɗe aanama ɓʉɗa
19 Ãba Aquilamaa mauɗe Priscamaa jarase mʉʉba jarabʉi ɓuu ãchi biꞌia panaɗai. Ara mau kĩra ãba Onesíforo deɗebenarãmaa jarase.
20 Ãba Erasto Corinto puuruɗe ɓeesii. Ãba Trófimo ẽpermo ɓuasiiɗeeba mʉʉba ichi Mileto puuruɗe ɓʉisii.
21 Kui chei ewari bai naeɗe isa neese. Ãbarã Eubuloba, Pudenteba, Linoba, Claudiaba mauɗe joma ãbarãba jarabʉi panuu bichi biꞌia ɓuai.
22 Mʉʉba kʉ̃ria ɓuu Dachi Mechiu Jesucristo bichi ome ɓuai mauɗe Dachi Akõreba ichi sõbiaɗeeba machi aiɗa ɓuai. Biꞌia ɓuu maka ɓuai.*
Notas
^ 4:6 Kãꞌãabariwãeɗe mʉ beaɗai. Griego beɗeaɗe naka ɓʉ kuɓuu: Mʉ uva ɓaa Dachi Akõre baita ea deaduu kĩra ɓuu. Mau beɗeaɗeeba Pabloba kuitaabi ɓuasii kãꞌãabariwãeɗe ẽbẽrarãba ichiba Cristoɗe ijãa ɓuuɗeeba beaɗai. Números 28:7.
^ 4:11 Marcos. Hechos 13:5,13; 15:36-40.
^ 4:22 Biꞌia ɓuu maka ɓuai. Griego beɗeaɗe chi ɓee kartaɗe mau wãꞌãe.
