Filemón 1:1-25
1 Mʉ Pablobʉ. Jesucristo kakua jʉ̃a ɓuu. Dachi ãba Timoteo nama ɓuu. Ãba Filemón, daiba bichi kʉ̃ria panuu. Bichiba dai kĩra Dachi Akõre traju wau ɓuuɗeeba mʉʉba nau karta bichi baita ɓʉʉruu.
2 Mauɗe ɓʉʉruu joma ãbarã bichi deɗe araa ãbua imibadaurã baita, dachi neekau Apia baita mauɗe dachi ãba Arquipo baita. Arquipo dai ome araɓauɗe Dachi Akõre traju wau ɓuabarii kokoroa kĩra.
3 Mʉʉba kʉ̃ria ɓuu Dachi Bajãaɗebena Akõreba* mauɗe Dachi Mechiu Jesucristoba ãchi sõbiaɗeeba machi aiɗa panaɗamera mauɗe jirukaraayuwãe panabiɗamera.
Ãba Onésimo baita Pabloba chi chuburia iɗiɗa
4 Mʉʉba Dachi Akõremaa ʉtaa iɗiiruucha bichi baita ichíturu kiɗibai abarii.
5 Mʉʉba ũrisii bichiba Dachi Mechiu Jesusɗe ijãa ɓuu mauɗe joma ẽbẽrarã Dachi Akõreɗerã kʉ̃ria ɓuu.
6 Mʉʉba Dachi Akõremaa ʉtaa iɗi ɓuu Cristoɗe ijãabadaurã ome bichi ãrea biꞌia ɓuamera.* Maka joma ne bia dachiba Jesucristoɗeeba uru panuu bichiba ãrea kuitaai.
7 Ãba, bichiba ẽbẽrarã Dachi Akõreɗerã kʉ̃ria ɓuuɗeeba kĩrajʉʉbiasii. Makaburu mʉ siɗa* kĩrajʉʉ nibabisii mauɗe ãrea dauchia jãadua sõbia nibabisii.
8 Mau baita bichimaa iɗiiruu mʉʉba jaraaruu waumera. Cristoɗeeba mʉʉba bichimaa poyaa waubii ɓumina mʉʉba waubiibai.
9 Maumaarã mʉʉba chi chuburia iɗiiruu bichi kʉ̃riaɗeeba maka waumera. Mʉ Pablo, chõra mauɗe jãabae Jesucristo kakua jʉ̃a ɓuuba,
10 chi chuburia iɗi ɓuu chi bichi baita bari trajabarii Onésimo baita. Mau mʉ warr kĩra nii. Mʉ nama jʉ̃a ɓuuɗe mauba mʉʉɗeeba Cristoɗe ijãasiiɗeeba mʉ warr kĩra ɓeesii.
11 Naa mau bichi baita biꞌia trajaka baɗa, maamina iɗibae chi mau ɓari trajabarii bia ɓeesii. Maka ichiba bichi baita biꞌia trajai mauɗe mʉ biꞌia aiɗai.
12 Mau bichimaa waya bʉiruu. Mʉʉba mau ãrea kʉ̃ria ɓuu. Michuburia mau biꞌia irsibise mʉ irsibiiruu kĩra.*
13 Chi Cristo beɗea bia kakua mʉ jʉ̃a ɓuuɗe mau mʉ ome uru ɓuai kʉ̃ria ɓuasii, joma bichiba mʉ baita jamaria poyaa waubai ɓuu waumera.
14 Maamina bichiba wáubaɗe awẽeɗe maka waui kʉ̃riabasii. Mʉʉba chi chuburia iɗi ɓuu bichimaa makai kʉ̃riawẽeɗe waubiibai, maumaarã kʉ̃ria ɓuu bichiaburu maka wau kʉ̃ria ɓuai.
15 Chi bichi baita bari trajabarii Onésimo bichi ome ɓuaɗa awawarrea miru wãsii. ¿Mauɗeeba maka wãsẽeka, mau waya neeruuɗe bichiba ewaricha uru ɓuamera?
16 Maamina mau bichi baita bari trajabarii kĩra uru ɓuabai ɓuu, maumaarã mau kãyabãra aude biꞌia uru ɓuai ɓuu. Cristoɗeeba bichi ãba baerã kʉ̃riaɗeeba uru ɓuai ɓuu. Mʉʉba mau ãrea kʉ̃ria ɓuu, maamina mau kãyabãra bichiba mau biꞌia kʉ̃riai ɓuu, bichi baita bari trajabariiɗeeba mauɗe Dachi Mechiuɗeeba bichi ãbaɗeeba.
17 Bichimaarã, Dachi Akõre baita dachiba araɓauɗe wau panuubʉrã, Onésimo biꞌia irsibise mʉ bichi deeɗaa urúbaɗe aaruu kĩra.
18 Mauba barikia bichi kachirua wausiibʉrã maebʉrã chi nejarra deai ɓuubʉrã, jarase mʉʉba bichimaa sãabe deai.
19 Ara mʉ juaba naka ɓʉʉruu: mʉʉba mau deai ɓuu deai. ¡Kĩrabase mʉʉɗebena Cristoɗe ijãasiiɗeeba bichiba mʉʉmaa deai uru ɓuu!
20 Ãba, Dachi Mechiu kakua mʉʉba chi chuburia iɗi ɓuu wause. Dachi Cristoɗe ãbarãɗeeba mʉ sõ kĩrajʉʉbise.
21 Mʉʉba maka ɓʉʉruu kuitaa ɓuuɗeeba bichiba mʉ beɗea ijãai. Kuitaa ɓuu mʉʉba jara ɓuu bichiba aude biꞌia waui.
22 Mau awara mʉʉba kʉ̃risia ɓuu machiba Dachi Akõremaa ʉtaa iɗi panuuɗeeba mʉ wãi. Maka mʉ machimaa poyaa wãi. Mauɗeeba mʉ kãi ɓeei baita biɗa uru ɓuase.
Pabloba nau kartaɗe aanama ɓʉɗa
23 Ãba Epafras Jesucristo kakua mʉ ome jʉ̃a uru panuu. Mauba jarabʉi ɓuu bichi biꞌia ɓuai.
24 Marcosba, Aristarcoba, Demasba mauɗe Lucasba jarabʉi panuu bichi biꞌia ɓuai. Maarãba mʉ ome Dachi Akõre traju wau panuu.
25 Mʉʉba kʉ̃ria ɓuu Dachi Mechiu Jesucristoba ichi sõbiaɗeeba machi aiɗa ɓuai.*
Notas
^ 3 Dachi Bajãaɗebena Akõreba. Kajuma beɗeaɗe ɓʉ kuɓuu: Dios el Padre.
^ 6 Cristoɗe ijãabadaurã ome bichi ãrea biꞌia ɓuamera. Waabenarãmaarã, mau jara ɓuu «Cristoɗe ijãa ɓuuɗeeba bichi ichi ẽbẽrarã ome ãrea biꞌia ɓuamera».
^ 7 Mʉ siɗa. Chi ɓee kartaɗe ɓʉ kuɓuu: dai siɗa.
^ 12 Griego beɗeaɗe mau chaarea ɓuu biꞌia ũriɗamera.
^ 25 Machi. Griego beɗeaɗe naka ɓʉ kuɓuu: machi jauri.
