Gálatas 2:1-21
2 Año 14 baɗakare mʉ Bernabé ome waya Jerusalenɗaa wãsii. Tito siɗa wãsii.
2 Mʉ wãsii Dachi Akõreba kuitaabisiiɗeeba araa wãi ɓuu. Ara basiiɗe mʉʉba ãbarã chi mechiurã ómeburu araa imibiapeɗa, jarasii chi beɗea bia Cristo ʉ̃rʉbena mʉʉba judiowãerãmaa saka jaradea ɓuu. Maka wausii mʉʉba wau ɓuu ãchiba biꞌia unu panuu kuitaai baita.*
3 Mauɗe Tito mʉ ome ɓuu judiowãemina, ãchiba jaraɗaabasii ichi mukĩra chi kakua tõoi ɓuu.
4 Mau ʉ̃rʉbena berreasiɗau chi nuree biawãra ãbarãwãeba jarabachiɗauɗeeba. Maarã ãbarã kĩra neeɗapeɗa, unuɗai kʉ̃riabachiɗau dachi Moisesba ɓʉɗaɗebena ãyaa wãsiɗau kuitaa. Jesucristoɗe ijãaɗai baɗamaarã, chi Moisesba ɓʉɗa waya waubi kʉ̃ria panasiɗau, chi mau ɓʉɗa baita bari trajabadaurã kĩra.
5 Maamina ãchiba jarapeɗaaɗa daiba ne aɓa biɗa ijãaɗaabasii machiba chi beɗea bia biawãra Cristo ʉ̃rʉbena ewaricha uru nureaɗamera.*
6 Chi mechiurã abadau ãbarãba kʉ̃risia awara jaraɗaabasii mʉʉba jaradeamera. Maumaarã kuitaasiɗau Dachi Akõreba mʉ bʉisii chi beɗea bia Cristo ʉ̃rʉbena judiowãerãmaa jaradeamera Pedro judiorãmaa bʉiɗa kĩra. (Ãchi chi mechiurã panuu abadamina, mʉ baita araɓauɗe ɓuu, Dachi Akõreba dachi kĩra awara unukauɗeeba).
7 —.
8 Biawãra Dachi Akõreba Pedro ichiba bʉiɗa ɓusii judiorãmaa jaradeamera. Ara mau Dachi Akõreba mʉ ɓusii ichiba bʉiɗa bai baita, judiowãerãmaa jaradeamera.
9 Ãbarã chi mechiurã Santiagoba*, Pedroba* mauɗe Juanba kuitaasiɗau Dachi Akõreba ichi sõbiaɗeeba biawãra mʉ judiowãerãmaa bʉisii. Mauɗe ãchi mʉ ome mauɗe Bernabé ome jua deasiɗau kuitaabiɗai baita araɓau kʉ̃risia uru panuu. Ãchiba jarasiɗau daiba judiowãerãmaa jaradea panaɗai, mauɗe ãchiba judiorãmaa jaradea panaɗai.
10 Aɓaburu daimaa jarasiɗau ãbarã chi nejarr barauwãe nuree aiɗaɗamera. Mau mʉʉmaarã ãrea biꞌia ɓuasii maka wau kʉ̃ria ɓuasiiɗeeba.
Pabloba Pedro iadaaɗa
11 Ewari aɓa Pedro Antioquía puuruɗaa ãbarã ichiaɗe wãsii. Aria mʉʉba jomaurã ãbarã daaɗe ichi iadaasii, ichiba biawãra kachirua wausiiɗeeba.
12 Naka kachirua wausii: chi nuree ãbarã judiorã ẽbẽrarã Santiagoɗebenarã Antioquía puuruɗaa wãsiɗau. Ãchiba jarabachiɗau judiowãerã mukĩra chi kakua tõoɗai panuu ẽbẽrarã Dachi Akõreɗerã nureaɗai baita. Ãchi neeɗai naeɗe Pedro ãbarã judiowãerã ome kobachii, maamina mau ãbarã judiorã neeɗapeɗa ichi waya ãbarã judiowãerã ome koobasii. Maumaarã ãyaa wãsii. Wapea ɓuasii chi judiowãerã ãchi mukĩra chi kakua tõoɗai panuu a jara panuu ʉ̃rʉbena.*
13 Mauɗe waabenarã ãbarã judiorãba chi ãbarã judiowãerã ida ɓusiɗau Pedroba biawãrawãe wau ɓuu kĩra. Maka wau panuuɗeeba Bernabé biɗa ara mau kĩra kachirua wausii.
14 Maamina mʉʉba unusii ãchi biawãra chi beɗea bia Cristo ʉ̃rʉbena jara ɓuu kĩra nibaɗaabasii. Mauɗeeba mʉʉba Pedro jomaurã ãbarã daaɗe naka iadaasii: «Bichi judiomina judio kĩra nibakau. Maumaarã judiowãe kĩra nibabarii. Mau ¿sakãe bichiba ãbarã judiowãerãmaa judiorãba waubadau waubia ɓuma?»
15 Judiowãerãba Moisesba ɓʉɗa wãꞌãe panuuɗeeba dachi judiorãba ãchi kachirua waubadaurã abadau. Dachi naweba warr adausiɗauɗeeɗebena judiorãɗeeba, mau Moisesba ɓʉɗa uru panuu.
16 Maamina dachiba kuitaa panuu Dachi Akõreba aɓa biɗa ɓuwẽe chi jipa nuree baara, mau Moisesba ɓʉɗa wau ɓuuɗeeba. Maumaarã Jesucristoba mau Moisesba ɓʉɗa kĩra joma wausiiɗeeba, Dachi Akõreba dachi ɓubarii chi jipa nuree baara. Mauɗeeba dachia biɗa Jesucristoɗe ijãasiɗau mauɗe Jesucristoɗe ijãa ɓu kakua maka chi ichiɗirã jipa nuree baara duanubarii, ichiba mau ɓʉɗa kĩra joma wauɗa kakua. Biawãra Moisesba ɓʉɗa wau panuuɗeeba Dachi Akõreba dachi ɓukau chi jipa nuree baara.*
17 Dachiba jʉrʉsiɗau Cristoɗeeba Dachi Akõreba dachi chi jipa nuree baara duanumera. Mauɗeeba waabenarãmaarã dachi kachirua waubadaurãbʉ, chi Moisesba ɓʉɗa ida ɓusiɗauɗeeba. Makarã ¿Cristoba dachimaa kachirua waubia ɓuka? ¡Makawãema!
18 Mʉʉba Moisesba ɓʉɗa ida ɓuɗakare waya ijãaruubʉrã, mʉ nebʉra baraa ɓeei mau ɓʉɗa ida ɓu ɓuasiiɗeeba.
19 Naeɗe mʉ Moisesba ɓʉɗaɗeeba nibasii. Maamina mau Moisesba ɓʉɗaɗebena wãsii.* Maka mʉ Dachi Akõre baita chokae ɓeesii.
20 Mʉ Cristo ome cruzɗe ãbua jiraɓusiɗau. Mauɗeeba ara mʉʉɗeeba ɓuwãema, maumaarã Cristo mʉ sõɗe ɓuu. Nau kakuaɗe chokae ɓuumisa mʉ Dachi Akõre Warr Jesusɗeeba nibai. Ara mau Jesús, Dachi Akõreba waubi ɓuu wausiiɗeeba, mʉ kʉ̃riasii mauɗe mʉ kakua ichi ida beabisii.
21 Dachi Akõreba ichi sõbiaɗeeba wauɗa mʉʉba ida ɓuwẽe. Moisesba ɓʉɗa wau panuuɗeeba chi jipa nuree baara panasirã, Cristo bari biui basii.
Notas
^ 2:2 Maka wausii...kuitaai baita. Griego beɗeaɗe naka ɓʉ kuɓuu: Maka wausii mʉ bari piraabayua maebʉrã bari pira ɓuaɗawãebayua.
^ 2:5 Pabloba jara kʉ̃ria ɓuu mukĩra chi kakua tõobai ɓuu judiorãba waubadau kĩra, Dachi Akõreɗe ijãabarii bai baita.
^ 2:9 Santiagoba. Griego beɗeaɗe naka ɓʉ kuɓuu: Jacob.
^ 2:9 Pedroba. Griego beɗeaɗe naka ɓʉ kuɓuu: Cefas.
^ 2:12 Pedro ʉ̃rʉbena naeɗe kachirua jarasiɗauɗeeba waya kachirua jaraɗai kʉ̃risiasii. Hechos 11:1-18.
^ Salmos 143:2.
^ 2:19 Mau Moisesba ɓʉɗaɗebena wãsii. Griego beɗeaɗe naka ɓʉ kuɓuu: Mau Moisesba ɓʉɗaba biusii Moisesba ɓʉɗa baita.
