Gálatas 3:1-29
3 Ãbarã Galacia druaɗebenarã, ¡machi kʉ̃risiaswãe nureerã! ¿Kaiba machi setaa kũruasii chi biawãra beɗea ida ɓuɗamera? Daiba machimaa joma chi Jesucristo cruzɗe biu ɓuaɗa ʉ̃rʉbena jaradeabachiɗau.
2 Mʉʉba nau machimaa iɗiiruu: Dachi Akõre Jauri irsibisiɗauɗe ¿machiba chi Moisesba ɓʉɗa wau panasiɗaka? Maebʉrã ¿chi beɗea Jesús ʉ̃rʉbena ũripeɗaaɗa ijãasiɗaka?
3 ¡Machi biawãra kʉ̃risiaswãe nuree! Cristoɗe ijãasiɗauɗe naeɗe Dachi Akõre Jauriɗeeba biꞌia nibasiɗau. ¿Jãabae ara machiba wau panuuɗeeba chi jipa nuree baara panaɗaika?*
4 Machi biꞌiwãe panaɗa Cristo kakua ¿bari makaska? ¡Mʉʉmaarã, machi bari ãrea biꞌiwãe panaɗaabasii!
5 Dachi Akõreba ichi Jauri machimaa deasii awara, ẽbẽrarãba ne poyaa wauɗakau machi tãeɗe wau ɓuu. ¿Chi Moisesba ɓʉɗa machiba wau panasiiɗeeba maka wau ɓuka? ¿Maka wauwẽka chi beɗea bia Cristo ʉ̃rʉbena ũriɗapeɗa ijãasiɗauɗeeba?
6 Abraham ʉ̃rʉbena kʉ̃risiásturu. «Abrahamba Dachi Akõreɗe ijãasii. Mauɗeeba Dachi Akõreba ichi nebʉraswãe nii unusii».*
7 Mauba kuitaaɗai panuu chi biawãra Dachi Akõreɗe ijãabadaurã, Abraham warrarãbʉ.
8 Nabẽraeɗe Dachi Akõre beɗeaɗe ɓʉ kuɓuu judiowãerãba Dachi Akõreɗe ijãapeɗaaɗa basirã ichiba ãchi ichiɗirã jipa nureerã baara ɓui basii. Mauɗeeba nabẽraeɗe Dachi Akõreba Abrahammaa chi beɗea bia berreasii. Ichiba naka jarasii: «Bichi kakua mʉʉba nau iujãaɗe duanuu puuru joma karibai».*
9 Mauɗeeba chi Abrahamba ijãaɗa kĩra ijãa nuree Dachi Akõreba joma aiɗai Abraham aiɗaɗa kĩra.
10 Chi Moisesba ɓʉɗa wau panuuɗeeba chi Dachi Akõreɗe jipa nuree baara paneeɗai kʉ̃risia nuree, nebʉra barau a ɓuu. Mau Moisesba ɓʉɗaɗe naka ɓʉ kuɓuu: «Nau Moisesba ɓʉɗa joma wauwẽa nii Dachi Akõreba nebʉra barau ai».*
11 Biawãra dachiba biꞌia kuitaa panuu Moisesba ɓʉɗa wau ɓuuɗeeba Dachi Akõreba aɓa biɗa chi ichiɗirã jipa nuree baara ɓui.* Dachi Akõre beɗeaɗe naka ɓʉ kuɓuu: «Chi jipa nii, Dachi Akõreɗe ijãa niiɗeeba chokae nibai».*
12 Maamina chi Dachi Akõreɗe ijãa ɓuu chi Moisesba ɓʉɗa waui ɓuu audeara ãyaa ɓuu. Maumaarã ichi ʉ̃rʉbena naka ɓʉ kuɓuu: «Chi Moisesba ɓʉɗa wau ɓuu, mauba nibai».*
13 Moisesba ɓʉɗa kĩra wau panuwãeɗeeba, nebʉra barau ai. Mauɗebena Jesucristoba dachi karibasii. Ichi Dachi Akõreba dachi kakua nebʉra baraabisii. Moisesba ɓʉɗaɗe naka ɓʉ kuɓuu: «Aɓa bakuruɗe jira ɓeeɗa Dachi Akõreba mau nebʉra barau ai».*
14 Makasii Dachi Akõreba Jesucristoɗeeba judiowãerã siɗa karibamera ichiba naeɗe Abrahammaa karibai aɗa kĩra.* Dachiba Jesucristo ijãa panuuɗeeba Dachi Akõreba ichi Jauri deai jaraɗa irsibisiɗau.*
Dachi Akõreba Abrahammaa beɗea deaɗa
15 Ãbarã, dachi ẽbẽrarãba ne waubadau kĩra berrearuu: ẽbẽraba waabena ome beɗea deaɗa kartaɗe ɓupeɗa ichi trʉ̃ mau kartaɗe ɓʉʉruubʉrã aɓau biɗa mau beɗea ɓʉɗa poyaa ãyaa ɓuɗaabai, mauɗe kʉ̃risia awara poyaa eɗa ɓʉɗaabai.
16 Ara mau kĩra Dachi Akõreba Abrahammaa, mauɗe chi ichiɗebena neei ɓuumaa jarasii mauba jomaurã karibai.* Dachi Akõre beɗeaɗe ɓʉwẽa ɓuu «Abrahamɗebena imiɗai ẽbẽrarã» ãrea ẽbẽrarã jara ɓuu kĩra. Maumaarã ɓʉ kuɓuu Dachi Akõreba Abrahamɗebena neei ɓuumaa maka jarasii aɓau ʉ̃rʉbenáturu berrea ɓuuɗeeba. Mau Cristobʉ.
17 Mʉʉba naka jara ɓuu: Dachi Akõreba Abraham ome beɗea deasii.* 430 año basiiɗe Moisesmaa ichiba jaraɗa ɓʉbisii. Maamina ichiba Abraham ome naeɗe beɗea deaɗa mau Moisesba ɓʉɗa ãyaa ɓuubasii. Ãyaa ɓuɗa basirã ichiba karibai aɗa waubai basii.
18 Moisesba ɓʉɗa wau panuu baita ichiba dachi karibaaruubʉrã, ichiba karibai aɗa kĩra karibawẽe. Maamina Dachi Akõreba Abraham karibai asiiɗeeba ichi sõbiaɗeeba karibasii.
19 Makarã ¿Dachi Akõreba sakãe Moisesmaa chi ichiba ɓʉɗa ɓʉbisma? Maka wausii ẽbẽrarãba kachirua waubadau kuitaaɗamera. Ẽbẽrarã mau Moisesba ɓʉsiiɗeeba panasiɗau aɓa Abrahamɗebena neei ɓuaɗa neeruuɗaa, ichiɗeeba Dachi Akõreba karibai asiiɗeeba. Dachi Akõreba Moisesmaa mau ichiba ɓʉɗa angelerãɗeeba deasii. Mau deaɗakare Moisesba ẽbẽrarãmaa deasii.
20 Maamina Dachi Akõreba Abrahammaa karibai asiiɗe aɓa biɗa mau beɗea jaraɗe bʉibasii, maumaarã ara ichiaburu Abrahammaa maka jarasii.
21 Maka ɓuubʉrã Dachi Akõreba Moisesmaa ichi beɗea ɓʉbisiiɗe ¿ichiba Abraham ome beɗea deaɗa ida ɓuska? ¡Makawãema! Moisesba ɓʉɗaba dachi poyaa chokae panaɗai basirã, mau ɓʉɗa wau panuuɗeeburu Dachi Akõreba dachi chi jipa nuree baara duanui basii.
22 Maamina Dachi Akõre beɗeaɗe ɓʉ kuɓuu kachiruaba jomaurã jʉ̃a uru ɓuu. Maka Jesucristoba ichi Akõreba jaraɗa wausiiɗeeba, chi ichiɗe ijãaduurãba mau Dachi Akõreba deai jaraɗa adauɗai.
23 Cristoɗe ijãaɗai naeɗe dachi Moisesba ɓʉɗa juaɗe panasiɗau. Mauɗebena poyaa awara wãɗaabasii aɓa Dachi Akõreba Cristo kuitaabiiruuɗaa.
24 Biawãra Moisesba ɓʉɗaba dachi nu ua ɓuasii aɓa Cristoɗe ijãaduuɗaa. Cristo neesiiɗe ichiɗe ijãa panuu kakua Dachi Akõreba dachi chi jipa nuree baara duanubarii.
25 Maamina iɗibae dachiba Cristoɗe ijãa panuuɗeeba Moisesba ɓʉɗaba nu ua ɓuakau.
26 Jesucristo ijãa panuuɗeeba joma machi Dachi Akõre warrarãbʉ.
27 Machi boro easiɗauɗe Cristo kĩra paneesiɗau unubisiɗau.*
28 Mau jara ɓuu judio griego ome araɓauɗe panuu, chibari baita bari trajabarii chi chibariswãe nii ome araɓauɗe panuu, mauɗe mukĩra wẽra ome araɓauɗe panuu. Joma machi ẽbẽra aɓa nii kĩra nureebʉ, Jesucristo ome ãbua nureeɗeeba.
29 Machi Cristoɗeɗeeba biawãra Abraham warrarãbʉ. Mauba Dachi Akõreba machi karibasii ichiba Abrahammaa dachi karibai asiiɗeeba.
Notas
^ 3:3 Ara machiba wau panuuɗeeba. Griego beɗeaɗe naka ɓʉ kuɓuu: nau kakuaɗeeba. Chi nureemaarã, mau jara ɓuu dachi mukĩra chi kakua tõoi.
^ 3:6 Dachi Akõreba ichi nebʉraswãe nii. Mau versiculoɗe jara ɓuu Dachi Akõre ichi jipa nuree baara ɓusii. Cristoɗe ijãa panasiɗauɗeeba Galaciaɗebena judiowãerã ijãabadaurãba Dachi Akõre Jauri poyaa irsibiɗai panasii, chi judiorã kĩra. Génesis 15:6.
^ Génesis 12:3.
^ Deuteronomio 27:26.
^ Salmos 143:2; Romanos 3:20.
^ Habacuc 2:4.
^ Levítico 18:5.
^ 3:13 Bakuruɗe. Griego beɗeaɗe bakuru aaruuɗe cruz siɗa jara ɓuu. Deuteronomio 21:23.
^ Génesis 12:3.
^ Isaías 44:3; Hageo 2:5.
^ Génesis 22:18.
^ 3:17 Griego beɗeaɗe chi ɓee kartaɗe naka ɓʉ kuɓuu: Cristoɗeeba Dachi Akõre Abraham ome beɗea deasii.
^ 3:27 Cristo kĩra paneesiɗau. Griego beɗeaɗe naka ɓʉ kuɓuu: Cristoɗe paru wiɗi kĩra jʉ̃ paneesiɗau.
