Gálatas 4:1-31
4 Mau awara naka jara ɓuu: warrba ichi akõreɗe joma adaui ɓumina kaebe niiɗeeɗe chibari baita bari trajabarii kĩra nii.
2 Chi kaebe nii warr ichi nubadaurã juaɗe ɓuu, mauɗe ichi akõreɗe adaui ɓuu chi nureerãba nubadau aɓa chi akõreba jaraɗa ewariɗaa.
3 Ara mau kĩra Cristoɗe ijãaɗai naeɗe dachi warraeɗebena kĩra nureasii. Mau ewariɗe dachiba nau iujãaɗebena jauri mechiurã ijãa panasiɗau, chibari baita bari trajabarii kĩra.
4 Maamina Dachi Akõreba jaraɗa ewari neesiiɗe ichi Warr nau iujãaɗaa bʉisii. Mau Warr wẽraba adausii mauɗe Moisesba ɓʉɗa waui ɓuasii.
5 Dachi Akõreba ichi bʉisii dachi mau Moisesba ɓʉɗa juaɗe nureaɗa karibapeɗa, ichi warrarã babiai baita.
6 Machi Dachi Akõre warrarãɗeeba ichi Warr Jauri bʉisii machi sõɗe ɓuamera. Ichi Jauri dachi sõɗe ɓuuba «¡Mʉ Chacha!» abarii kuitaaɗamera dachi Ichi warrarãbʉ.
7 Mauɗeeba jãabae machi chibari baita bari trajabadaurãwãema, maumaarã Dachi Akõre warrarãbʉ. Dachi Akõre warrarãɗeeba ichi warrarã baita uru ɓuu adauɗai.*
Pablo ãbarã kakua kʉ̃risia baraa ɓuaɗa
8 Naeɗe machiba Dachi Akõre adua panasiɗauɗe chi biawãra Dachi Akõrewãerã ijãa panasiɗau ãchi baita bari trajabadaurã kĩra.
9 Maamina jãabae machiba Dachi Akõre unubadau. Mʉʉba arakʉɗe jaraaruubʉrã, Dachi Akõreba machi unubarii. Maka ¿sakãe nau iujãaɗebena jauri mechiurã waya ijãaɗai kʉ̃ria panuma, chibari baita bari trajabadaurã kĩra? Mauba machi aiɗakau.
10 Barikiu bari panabadau ewari, jeɗakoɗe mauɗe añoɗe waubadau Dachi Akõreba biꞌia unumera.
11 Mauɗeeba mʉʉba kʉ̃risia ɓuu mʉ bari machimaa jaradeasii.
12 Ãbarã, mʉ machi judiowãe kĩra ɓuai baita, Moisesba ɓʉɗa ida ɓusii. Mauɗeeba mʉʉba machimaa chi chuburia iɗiiruu mʉ kĩra mau Moisesba ɓʉɗaɗe panarãaɗamera. Naeɗe machiba mʉʉmaa kachirua wauɗaabasii, maumaarã biꞌia wausiɗau.
13 Kuitaa panuu mʉʉba machimaa chi beɗea bia Cristo ʉ̃rʉbena naa jaraɗe wãsiiɗe, mʉ ẽpermo ɓuasiiɗeeba machimaa jaradea ɓeesii.
14 Ẽpermo ɓuasmina machiba mʉ ida ɓuɗaabasii mauɗe duabʉiɗaabasii.* Maumaarã biꞌia irsibisiɗau Dachi Akõreɗe ángel irsibiiduu kĩra, Jesucristo irsibiiduu kĩra.
15 ¿Sakasma chi machi kĩrajʉʉ naeɗe uru panaɗa? Mʉʉba biawãra jaraaruu machiba poyaa waupeɗaaɗa basirã ara machi dau noetaɗai basii mʉʉmaa deaɗai baita.
16 Mʉʉba biawãra jara ɓuuɗeeba ¿mʉ machi kĩramaa baika?
17 Machi tãeɗe chi biꞌia jaradeaɗakaurãba ne joma wau panuu machiba ãchi beɗea ijãaɗamera. Maamina ãchiba maka wauɗakau machi aiɗaɗai baita. Machi daiɗebena ãyaa adoe kʉ̃ria panuu sõɗeeba ãchi baara panaɗamera.
18 Biawãra biꞌia ɓuu ewaricha kʉ̃risia biꞌia sõɗeeba ijãa panaɗai. Maamina maka panaɗaabai panuu mʉ machi ome ɓuuɗéburu. Maumaarã mʉ wãꞌãeɗe biɗa ijãaɗai panuu.
19 Ãbarã, machi mʉ warrarã kĩra nuree. Mʉ waya machi baita ãrea biꞌiwãe ɓuu wẽra warr adauruuɗe puꞌuabarii kĩra. Mʉ maka ãrea biꞌiwãe ɓuai aɓa machi Cristo kĩra paneeduuɗaa.
20 ¡Mʉ ʉ̃rauɗaa machi baara ɓuaɗa basirã kuitaai basii saka berreai ɓuu! Mʉʉba biawãra adua ɓuu machi ʉ̃rʉbena saka kʉ̃risiai.
Sara mauɗe Agar ʉ̃rʉbena
21 Chi Moisesba ɓʉɗa juaɗe panaɗai kʉ̃ria panuuba mʉʉmaa panáusturu: ¿Moisesba ɓʉɗaɗe ɓʉ kuɓuu adua panuka?
22 Naka ɓʉ kuɓuu: Abrahamba warr ome uru ɓuasii. Aɓa chibari baita bari trajabarii Agarba warr adausii.* Chi aɓa chibariswãe nii Saraba warr adausii.*
23 Chi chibari baita bari trajabariiba warr adausii Abrahamba maka kʉ̃riasiiɗeeba. Maamina chi chibariswãe nii wẽraba warr adauɗa Dachi Akõreba deai jaraɗa basii.
24 Mauba dachimaa naka ãrea kʉ̃risiabia ɓuu: Dachi Akõreba beɗea deaɗa ome panuu. Mau beɗea deaɗa ome panuu Sara mauɗe Agar kĩra panuu. Dachi Akõreba beɗea deaɗa aɓa Sinaí eaɗe deasii. Mau beɗea deaɗa chi chibari baita bari trajabarii Agar kĩra ɓuu, chi mau beɗea deaɗa ijãa nuree chibari baita bari trajabadaurã kĩra nureeɗeeba.
25 Chi Sinaí ea Arabia druaɗe ɓuu Agar kĩra ɓuu, chi mau eaɗe deaɗa Moisesba ɓʉɗaɗe ijãa nuree, chibari baita bari trajabadaurã kĩra nureeɗeeba. Mauɗe chi nau iujãaɗebena Jerusalén puuru Agar kĩra nii, mau puuruɗebenarã chibari baita bari trajabadaurã kĩra nureeɗeeba.
26 Maamina chi bajãaɗebena Jerusalén puuru Sara kĩra ɓuu, mau puuruɗebenarã chibari baita bari trajabadaurã kĩra nureewãeɗeeba. Maka nuree Moisesba ɓʉɗaɗe ijãawẽa nureeɗeeba. Dachi mamabenaɗeeba Sara warrarã kĩra nuree.
27 Dachi Akõre beɗeaɗe naka ɓʉ kuɓuu:
«Wẽra warr deakau, kĩrajʉʉse. Warr adauruuba chi puꞌua unukau, ãrea kĩrajʉʉ ɓiáse.Wẽra mukĩraba amaaɗaba warrarã aude uru ɓuai, wẽraba mukĩra uru ɓuaɗa audeara».*
28 Isaac chi naweba adausii Dachi Akõreba Abrahammaa maka jarasiiɗeeba. Ãbarã, Isaac kĩra, dachi Dachi Akõre warrarã paneesiɗau ichiba maka jarasiiɗeeba.
29 Abraham ewariɗe, Ismael chi naweba adausii, barikia warr kĩra. Isaac chi naweba adausii Dachi Akõre Jauri poyaabariiɗeeba. Ismaelba kachirua waubachii Isaacmaa. Iɗibae biɗa Moisesba ɓʉɗaɗe nureerãba Cristoɗe ijãa nureemaa kachirua waubadau.
30 Maamina Dachi Akõre beɗeaɗe naka ɓʉ kuɓuu: «Chi chibari baita bari trajabarii wẽra mauɗe ichi warr siɗa duabʉise. Chi chibari baita bari trajabarii wẽra warrba ichi akõreba uru ɓuu poyaa adaubai. Maumaarã chi chibariswãe nii wẽra warrba mau adaui».*
31 Mauɗeeba ãbarã, dachi chi chibari baita bari trajabarii warrarã kĩra nureewãe. Maumaarã chi chibariswãe nuree warrarã kĩra nuree.
