Apocalipsis 1:1-20
1 Mʉ Jesucristo baita bari trajabarii Juanbʉ. Nau kartaɗe ɓʉ ɓuu Jesucristoba bajãaɗebena mʉʉmaa unubiɗa. Mau Dachi Akõreba Jesucristomaa unubisii ichiɗe ijãa nureerãmaa unubiamera kãꞌãabariwãeɗe kãare sãai ɓuu.* Jesucristoba ángel mʉʉmaa bʉisii mau unubimera.
2 Joma mʉʉba unuɗa biawãra jara ɓuu. Mʉʉba jara ɓuu nau beɗea Dachi Akõreɗebena nee ɓuu mauɗe Jesucristoba biawãra unubisii.
3 Chi mau Dachi Akõre baita berreabarii beɗea ãbarã daaɗe eɗa jaraaruu ãrea biꞌia ɓuai. Mauɗe chi nau beɗea ũriɗapeɗa wau nuree ãrea biꞌia nureaɗai, kãꞌãabariwãeɗe makaiɗeeba.
Ãbarã Asia druaɗebena baita Juanba ɓʉɗa
4 Mʉ Juanbʉ. Nau karta ɓʉmaa ɓuu ãbarã Asia druaɗe 7 puuruɗebenarã baita. Mʉʉba kʉ̃ria ɓuu Dachi Akõreba ichi sõbiaɗeeba machi aiɗa ɓuai mauɗe jirukaraayuwãe ɓuabiai. Mau chi nibaɗabʉ, chi niibʉ mauɗe chi neei baita ɓuubʉ. Mauɗe mʉʉba kʉ̃ria ɓuu Dachi Akõre rey ãkau bia ɓuu daaɗe 7 jauri panuuba maka wau panaɗai.*
5 Mauɗe kʉ̃ria ɓuu Jesucristo biɗa maka wau ɓuai. Ichiba Dachi Akõre ʉ̃rʉbena biawãra jarabarii. Biu ɓuaɗa naa chokae jiradusii, joma nau iujãaɗebena chi reyrã audeara chi mechiu nii ɓuai baita. Mauba dachi kʉ̃ria ɓuu mauɗe ichi oaɗeeba kachiruaɗebena karibasii.
6 Dachi ɓusii Dachi Akõreba ichi juaɗe paare nureaɗamera.* Maka ichi Bajãaɗebena Akõreba kʉ̃ria ɓuu wau panaɗai. Maumaa biꞌia berreaɗai panuu. Biꞌia ɓuu mau ewaricha jomaurã Mechiu ɓuai. Biawãra biꞌia ɓuu maka ɓuai.*
7 Ichiásturu. Cristo jʉ̃rʉaraɗe neei. Mauɗe jomaurãba unuɗai. Ichi supeɗaaɗa biɗa unuɗai.Ichi unuuduuɗe joma nau iujãaɗebena jẽaɗai.* Biawãra maka ɓuai.
8 Dachi Mechiuba jarasii: «Mʉ chi Joma Poyaabarii Dachi Akõrebʉ, chi Alfabʉ mauɗe chi Omegabʉ.* Mau jara ɓuu mʉ chi nabenabʉ mauɗe chi kaaɗebenabʉ. Mʉ chi nibaɗabʉ, chi niibʉ mauɗe chi neei baita ɓuubʉ».
Juanba Cristo unuɗa
9 Mʉ machi ãba Juanbʉ. Dachi Jesucristo ome panuuɗeeba mʉ machi ome Dachi Akõre juaɗebenarãbʉ, machi ome ãrea biꞌiwãe ɓuu, mauɗe machi ome joma dauchia jãadua ɓuu.
Dachi Akõre beɗea jaradea ɓuu kakua mauɗe Jesús ʉ̃rʉbena biawãra a ɓuu kakua mʉ Patmos islaɗe ɓusiɗau.
10 Dachi Mechiu ewariɗe mʉ Dachi Akõre Jauriɗeeba ɓuasii.* Mauɗe mʉ kaaɗeeba aɓa mimi jĩwa berrea ɓuu ũrisii. Ichi beɗea kachu jĩwabarii kĩra ũrisii.
11 Mauba jarasii: «Bichiba unuuruu kartaɗe ɓʉpeɗa ãbarã 7 puuru ɓeeɗe duanuurãmaa urubʉise: Efesoɗaa, Esmirnaɗaa, Pergamoɗaa, Tiatiraɗaa, Sardisɗaa, Filadelfiaɗaa mauɗe Laodiceaɗaa».*
12 Mauɗe mʉʉba waya ichiasii kai berrea ɓuu kuitaa. Ichiasiiɗe 7 ʉ̃ɗaa koabarii nee wauɗa unusii.
13 Mau 7 ʉ̃ɗaa koabarii ẽsa, chi Ẽbẽra Ba Ɓuaɗa kĩra nii unusii.* Paru jʉ̃rʉɗeeɗe deseroa jʉ̃ ɓuasii. Ichi pechuɗe nee wauɗa paraa jʉ̃ ɓuasii.
14 Ichi buɗa meraa torroa ɓuasii oeja kara kĩra maebʉrã nieve kĩra. Ichi dau tʉbʉ aokooruu kĩra ɓuasii.
15 Ichi jʉ̃rʉ bronce tʉbʉɗe kuɓuɗakare urua kuɓuu kĩra ɓuasii. Ichi beɗea do ãrea cheeruu kĩra jĩwa ɓuasii.
16 Ichi jua biare pusterrea 7 uru ɓuasii. Ichi okarrɗebena espada kiɗa muriacha peeɗea era ɓuu neesii. Ichi kĩedarr ʉmada teɗechoa kĩra ɓuasii.
17 Ichi unusiiɗe ichi jʉ̃rʉ kaita peraba jeeɗa ɓari ɓeesii. Maamina ichi jua bia mʉ ʉ̃rʉ kuɓupeɗa jarasii: «Perarã́se. Mʉ chi nabenabʉ mauɗe kaaɗebenabʉ.
18 Mʉ chi Chokae Nima. Mʉ biuɗamina ichiáse chokae nii, mauɗe ewaricha chokae nibai. Mʉa chi biuɗarã poyaa chokae jiradubiai ɓuu.*
19 Bichiba unu ɓuu karta aɓaɗe ɓʉse. Iɗibae makamaa ɓuu ʉ̃rʉbena mauɗe chi kaaɗebena ewariɗe makai ʉ̃rʉbena ɓʉse.
20 Mʉʉba unubiiruu chi 7 pusterrearã bichiba mʉ jua biare uru ɓuu unuɗa kãare jara ɓuu mauɗe kãare jara ɓuu lámpararã nee wauɗa. Mau 7 lámpararã jara ɓuu chi angelerã. Mau 7 panuuba ãbarã 7 puuruɗe duanuu nubadaurãbʉ. Ãchi aɓaaɓaa chi ãbarã puurucha nubadau. Chi 7 lámpararã jara ɓuu chi 7 puuruɗebena ãbarã.
Notas
^ 1:1 Ichiɗe ijãa nureerãmaa. Griego beɗeaɗe naka ɓʉ kuɓuu: Chi chibari baita bari trajabadaurãmaa.
^ 1:4 7 jauri panuuba. Waabenarãmaarã, mau 7 jauri panuu Dachi Akõre Jauri maka ɓuu. Mauɗe waabenarãmaarã, mau jauri 7 panuu angelerã chi mechiu maka nuree.
^ 1:6 1 Pedro 2:9.
^ 1:6 Biawãra biꞌia ɓuu maka ɓuai. Griego beɗeaɗe naka ɓʉ kuɓuu: amén.
^ 1:7 Mateo 24:30; Juan 19:34-37.
^ 1:8 Griego alfabetoɗe alfa chi nabena letrabʉ, omega chi kaaɗebena letrabʉ.
^ 1:10 Dachi Mechiu ewariɗe. Jesús chokae jiradusiiɗeeɗebena misacha ãbarãba ichi chokae jiraduɗa ʉ̃rʉbena kĩrababadau.
^ 1:11 Griego beɗeaɗe chi ɓee kartaɗe nau siɗa ɓʉ kuɓuu: Mʉ chi Alfabʉ mauɗe chi Omegabʉ. Mau jara ɓuu mʉ chi nabena mauɗe chi kaaɗebena.
^ 1:13 Chi Ẽbẽra Ba Ɓuaɗa. Daniel 7:13.
^ 1:18 Mʉa chi biuɗarã poyaa chokae jiradubiai ɓuu. Griego beɗeaɗe naka ɓʉ kuɓuu: Mʉa ẽbẽrarã biuɗai ʉ̃rʉbena llave uru ɓuu. Chi biupeɗaaɗa panuumaabena llave uru ɓuu.
