Apocalipsis 11:1-19
11 Mau maaɗakare aɓauba bakuru ne chaabarii mʉʉmaa deapeɗa naka jarasii: «Dachi Akõre de mechiu bakuruba chaayase asii, mauɗe chi Dachi Akõre baita ne baa deabadaumare. Mauɗe chi aria Dachi Akõremaa biꞌia berrea panuurã joma juasiise.
2 Maamina Dachi Akõre de mechiu mooba aude aɗu kĩra ɓuu ekarebena drua chaarã́se, mau Dachi Akõreɗe ijãaɗakaurã deasiiɗeeba. Maarãba Dachi Akõre puuru Jerusalén poyaaɗai 42 jeɗakoɗaa.*
3 Mau ewariɗe mʉʉba ẽbẽra ome bʉi mʉ ʉ̃rʉbena doɗaa berreaɗamera. Maarã paru parrba jʉ̃ɗapeɗa 1.260 ewari Dachi Akõre baita berreaɗai».
4 Chi nau iujãaɗebena Mechiu daaɗe olivo bakuru ome topanuu mauɗe ʉ̃ɗaa koabarii ome topanuu. Mau chi ichi ʉ̃rʉbena doɗaa berreabadau ome panuu jara ɓuu.*
5 Aɓauba maarã kachirua waui kʉ̃riaruubʉrã, ãchi okarrɗebena aokoi mauɗe maarã kĩramaabadaurã baakuai. Ara mau kĩra chi maarãmaa kachirua wauɗai kʉ̃riaduu joma kenaɗai.
6 Maarã ome ẽbẽra Dachi Akõre baita berreamaa panuuɗe, bajãa poyaa jʉ̃aɗai kui chebiamaaba. Mauɗe bania siɗa poyaa oa babiɗai, mauɗe ne kachirua didiwaraa poyaa neebiɗai nau iujãa ãchi kʉ̃ria ãriɗai baita.
7 Maamina joma Dachi Akõre ʉ̃rʉbena berreapeɗaaɗakare mau ãnimara eakarr eɗaa choɓeaɗebena* neeruuba ãchimaa orrai. Maarã poyaapeɗa kenai.
8 Chi biupeɗaaɗa chi Jerusalén puuru mechiuɗe jirata ɓari panaɗai. Mau puuru «Sodoma» maebʉrã «Egipto» abadau, aria ãchi Mechiu Jesús cruzɗe jiraɓu beasiɗauɗeeba.
9 Ẽbẽrarã didiwaraacha jomaɗebena, beɗea didiwaraacha jomaɗebena, puurucha mauɗe drua jomaɗebenarãba mau biupeɗaaɗa aria jirata ɓari ɓee unuɗai ewari õbea baɗapeɗa mauɗe ãsaɗaa.* Maarã biupeɗaaɗa ʉyaaɗai ida kabiɗaabai.
10 Chi ẽbẽrarã nau iujãaɗebena mau biupeɗaaɗa kakua kĩrajʉʉɗai. Kĩrajʉʉba ne kaebea bia ãchiba chiya bari deaɗakaɗai, Dachi Akõre baita berreabadaurãba maarã ãrea biꞌiwãe panabiasiɗauɗeeba.
11 Maamina ewari õbea ẽsa basiiɗe Dachi Akõreba ãchi chokae jiradubiasii. Ãchi jiraduuduu unupeɗaaɗa ãrea perasiɗau.
12 Maabae chi Dachi Akõre baita berreabadaurãba bajãaɗe mimi jĩkua ũrisiɗau. Naka jarasii: «Namaa ʉtaa urústuru». Ara makʉɗe chi kĩramaabadaurãba ichiamaa panuuɗe, ʉtaa jʉ̃rʉara tãeɗe bajãaɗaa wãsiɗau.
13 Mauɗe ioromia meserãa neesii. Mauba Jerusalén puuruɗe de ãrea korekuasii.* 7.000 ẽbẽrarã biusiɗau. Ara mauɗe chi chokae panuuba peraɗeeba chi bajãaɗebena Dachi Akõremaa biꞌia nii a jarasiɗau.
14 Chi mawãarebena mia pera jaraɗa wãꞌãesii. Maamina chi kaaɗearebena mia jaraɗa kãꞌãabariwãeɗe neei.*
Kaaɗearebena kachu chaaɗa
15 Chi kaaɗearebena angelba ichi kachu chaasii.* Mauɗe bajãaɗe ãreaba jĩkua berreasiɗau. Naka jarasiɗau:«Chi nau iujãaɗebenarã reyrãba ãchi juaɗe naeɗe ua panapeɗaaɗa, Dachi Mechiu mauɗe ichi Cristo omeeba mau joma ãchi juaɗe ua paneesiɗau.Iɗiiba waitaa jomaurã ichi juaɗe ua ɓuai».
16 Mauɗe chi 24 chõrarã mechiurã ãchi rey ãkauɗe sĩu duanaɗa Dachi Akõre daaɗe õdarrɗe kopaneesiɗau maabae Dachi Akõremaa biꞌia berreasiɗau.
17 Naka jarasiɗau:«Dai Akõre Mechiu chi Joma Poyaabarii, chi nibaɗa mauɗe chi nii.*Bichíturu kiɗibai a jara panuu bichi ãrea poyaabarii unubia ɓuuɗeeba mauɗe jomaurã bichi juaɗe ua ɓeesiiɗeeba.
18 Druachaɗebena bichi ome kĩru kopaneesiɗau. Maamina chi bichi kastikai ewari neesii.* Jãabae bichiba chi biupeɗaaɗa jideai.Mauɗe chi bichi baita berreabadaurã trajabadaurãmaa, bichi ẽbẽrarãmaa, joma chi bichi wapeabadaurãmaa, chi aude kaebeurãmaa mauɗe chi aude mechiurãmaa ne bia deaɗakai chi bia ãchiba waupeɗaaɗa kĩra.Maamina chi nau iujãaɗe kachirua waupeɗaaɗa bichiba kastikakuai».
19 Maabae Dachi Akõre de mechiu bajãaɗe kuɓuu ewa wãsii. Aria chi Dachi Akõreba waubiɗa baúl* kuɓuu mʉʉba unusii. Ara mauɗe bã puri chebi koɓeesii, bã to koɓeesii, mauɗe chi bã ãrea ʉrʉrʉa wã koɓeesii. Nau iujãa uri koɓeesii mauɗe hielo siɗa kui kĩra ãrea che koɓeesii.
Notas
^ 11:2 Griego beɗeaɗe naka ɓʉ kuɓuu: Maarãba chi Dachi Akõre baita ɓuu puuru 42 jeɗako biraduaɗai.
^ 11:4 Zacarías 4:1-14.
^ 11:7 Mau ãnimara eakarr eɗaa choɓeaɗebena. Ichiáse Daniel 7ɗe.
^ 11:9 Ewari õbea baɗapeɗa mauɗe ãsaɗaa. Griego beɗeaɗe naka ɓʉ kuɓuu: tres días y medio.
^ 11:13 Ãrea. Griego beɗeaɗe naka ɓʉ kuɓuu: la décima parte.
^ 11:14 Chi kaaɗearebena mia pera jaraɗa neeruuɗe, chi kaaɗearebena kachu chaai. Apocalipsis 8:13.
^ 11:15 Chi kaaɗearebena angelba. Kajuma beɗeaɗe ɓʉ kuɓuu: séptimo ángel.
^ 11:17 Griego beɗeaɗe chi ɓee kartaɗe nau siɗa ɓʉ kuɓuu: Mauɗe chi neei ɓuu.
^ 11:18 Bichi kastikai ewari neesii. Griego beɗeaɗe naka ɓʉ kuɓuu: Bichi kĩrubi ewari neesii.
^ 11:19 Dachi Akõreba waubiɗa baúl. Mau jara ɓuu ichi beɗea deaɗa ichiba waui baɗa joma wausii. Chi ichiɗirã joma nu ɓuabarii, ne joma dea ɓuabarii mauɗe kariba ɓuabarii. Éxodo 16:33.
