Apocalipsis 13:1-18
13 Mau maaɗakare chi dragón mar iikaa ibuɗe ʉkʉ nuɓeesii.* Ara mauɗe mʉʉba ãnimara kachirua marɗebena awara neeruu unusii. Mau ãnimara 7 boro inibasii mauɗe 10 kachu. Kachurãcha boro jũra aɓa inibasii. Borocha trʉ̃ kachirua Dachi Akõre ʉ̃rʉbena ɓʉ kuɓuasii.
2 Chi mau ãnimara mʉʉba unuɗa imama kĩra pã nibasii. Ichi jʉ̃rʉ ui jʉ̃rʉ kĩra nibasii. Chi okarr león okarr kĩra nibasii. Dragonba mau ãnimaramaa chi poyaabarii deasii. Mauɗe ichi rey ãkauɗe akʉ ɓeebisii chi nau iujãaɗe panuurã joma ichi juaɗe duanamera.
3 Chi mau ãnimara boro aɓaɗe tõoɗa baɗa aniɗa aɓa inibasii. Biawãra mau tõoɗaba biui ɓuasii maamina chi tõoɗa jãabae aniɗa ɓuasii. Joma nau iujãaɗebenarã kãare kʉ̃risiaɗai adua panasiiɗeeba mau baara panasiɗau.
4 Mauɗe ãchiba chi dragonmaa biꞌia berreabachiɗau, mau ãnimaramaa chi poyaabarii dea ɓuasiiɗeeba. Naka jarabachiɗau: «¿Kai nau ãnimara kĩra nima? ¿Kai nau ome poyaa chĩoi ɓuma?»
5 Dachi Akõreba mau ãnimaramaa ara ichi chi aude mechiu nii a jarai ida kabisii mauɗe Dachi Akõre chi biawãe nii a jaramera. Mauɗe 42 jeɗakoɗaa nau iujãaɗebenarã ichi juaɗe ua ɓuai ida kabisii.
6 Mauɗe mauba Dachi Akõre ʉ̃rʉbena kachirua jarabachii, mauɗe ichi trʉ̃ ʉ̃rʉbena, chi ichi ɓuumaabena ʉ̃rʉbena, mauɗe joma bajãaɗe duanuu ʉ̃rʉbena siɗa.
7 Mauɗe Dachi Akõreba mau ãnimaramaa ara ichi ẽbẽrarã ome chĩobii ida kabisii maarã poyaamera. Ẽbẽrarã didiwaraa joma, puuru joma, beɗea didiwaraa joma mauɗe chi druarã joma ichi juaɗe ua ɓuabisii.
8 Mauɗe joma nau iujãaɗebenarãba chi ãnimaramaa biꞌia berreasiɗau. Iujãa joma waukuai naeɗe maarã trʉ̃ chi Oeja Kaebe Nii kartaɗe wãꞌãe basii. Mau kartaɗe chi ẽbẽrarã joma biuɗaabai panuu trʉ̃ ɓʉ kuɓuu.
9 Chi kʉʉrʉ bara niiba ũrise:
10 «Chi jʉ̃aɗai panuu, mau jʉ̃aɗai.
Chi espadaba biuɗai panuu, mau espadaba biuɗai».*
Mauɗeeba ẽbẽrarã Dachi Akõreɗerã ãrea ijãaɗapeɗa ãrea dauchia jãadua panaɗai panuu.
Chi ãnimara ioroɗebena awara neeɗa
11 Mau maaɗakare mʉʉba ãnimara june ioroɗebena awara neeruu unusii. Mau ãnimara oeja kaebeu kĩra kachu ome inibasmina, dragón kĩra berreabachii.
12 Chi ãnimara ioroɗebena awara neeɗa joma chi nau iujãaɗebenarã chibari ɓeesii, chi nabena ãnimara kĩra. Ichi poyaaɗeeba ẽbẽrarãmaa chi nabena ãnimaramaa biꞌia berreabiabachii. Mau tõoɗaba biui ɓuasmina, wabiɗa chokae ɓuasii.
13 Ãnimara ioroɗebena neeɗaba ẽbẽrarãba ne poyaa wauɗakau mechiurã waukuabachii. Ẽbẽrarãba ichiamaa panasiiɗe bajãaɗebena aoko nau iujãaɗe ɓaebisii.
14 Dachi Akõreba mau ãnimara ioroɗebena awara neeɗamaa chi mau ẽbẽrarãba ne poyaa wauɗakau wauyu ida kabisii chi ãnimara marɗebena awara neeɗa trʉ̃ɗe.* Maka chi ioroɗebena awara neeɗaba nau iujãaɗebenarã setaa kũruasii. Maka chi ãnimara kuenda juaba ne kapeɗaaɗa waubiasii, chi mau espadaba tõopeɗa mauɗe wabiɗa chokae nii kĩra.* Maka waupeɗaaɗakare jomaurãba mau ãrea kʉ̃riaɗai panuu asii.
15 Mau ioroɗebena awara neeɗamaa ida kabisii chi ãnimara kuenda juaba ne kapeɗaaɗa ʉ̃yaba deamera mauɗe berreabimera.* Maabae chi ioroɗebena awara neeɗaba chi ãnimara kuenda juaba ne kapeɗaaɗa ãrea kʉ̃riaɗawẽerã beabiasii.
16 Mau awara chi ioroɗebena awara neeɗaba jomaurãmaa jua biare maebʉrã dauɓʉʉrʉɗe seña ɓubiasii. Chi aude mechiurãmaa, chi kaebeurã, chi nejarra barau nuree, chi nejarr barauwãe nuree, chi chibari baita bari trajabadaurã mauɗe chi chibariswãe nuree mau seña ɓubiasii.
17 Mau seña uru nuréburu nedoɗai panasiɗau mauɗe poyaa nedobʉiɗai panuu. Mau seña chi ãnimara marɗebena awara neeɗa trʉ̃ basii maebʉrã ichi trʉ̃ número basii.
18 Mau numeroba kai ʉ̃rʉbena jara ɓuu kuitaaɗai baita chi kuitaa ãrea nibai ɓuu. Chi kʉ̃risia kuitaa niiba poyaa kuitaai chi kai ʉ̃rʉbena jara ɓuu. Mau número ẽbẽra trʉ̃ basii. Nau chi trʉ̃bʉ: 666.
Notas
^ 13:1 Chi dragón mar iikaa ibuɗe ʉkʉ nuɓeesii. Griego beɗeaɗe chi ɓee kartaɗe ɓʉ kuɓuu: Mʉ mar ibuɗe akʉ nuɓeesii. Waabenarã kartaɗe mau beɗea ɓʉ kuɓuu 12:18ɗe.
^ 13:1 Jeremías 15:2; 43:11.
^ 13:14 Dachi Akõreba mau ãnimara...awara neeɗa trʉ̃ɗe. Mau beɗea poyaa naka ɓʉ kuɓuu: Jʉbawãe niiba chi ioroɗebena awara neeɗa ãnimaramaa meserãa deasii mau ẽbẽrarãba ne poyaa wauɗakau chi marɗebena awara neeɗa ãnimara trʉ̃ɗe poyaa wau ɓuamera.
^ 13:14 Maka ãnimara kuenda...chokae nii kĩra. Mau beɗea poyaa naka ɓʉ kuɓuu: Maka juaba ne kapeɗaaɗa waubisii chi ãnimara nekoba tõoɗa baɗa biuɗa chokae jiradu nii kĩra.
^ 13:15 Mau ioroɗebena awara...berreabimera. Mau beɗea poyaa naka ɓʉ kuɓuu: Jʉbawãe niiba mau ãnimara ioroɗebena awara neeɗamaa ida kabisii chi ãnimara kuenda juaba ne kapeɗaaɗa ʉ̃yaba deamera mauɗe berreabimera.
