Apocalipsis 18:1-24
18 Mau maaɗakare mʉʉba june aɓa ángel bajãaɗebena eɗaa uruu unusii. Mau chi mechiu nibasii. Ichi teɗechoaba nau iujãa ʉ̃ɗaasii.
2 Naka jĩwa jarasii:
«¡Babilonia puuru mechiu ãrisii! ¡Biawãra joma ãrikuasii! Ẽbẽrarã duanaɗamare, bari jãma chi jai kachirua nuréturu duanuu.Jãma joma jairã kachirúaturu duanuu. Joma chi Dachi Akõremaarã ibanarã miadáturu jãma duanuu.*
3 Mau puuruɗebenarãba mia kĩra nejasia wau panuuɗeeba, drua aꞌawaraabenamaa ara mau kĩra kachirua waubiasiɗau uva ɓaa asia doobai panuuɗe dobiaduu kĩra.Mauɗe reyrã joma druachaɗebenarãba ara mau kĩra waubiasiɗau wẽra auɗuabarii ome kachirua wau panuu kĩra.Chi nau iujãaɗebena ne kaebea nedobadau barau duaneesii, mau puuruɗebenarãba ne kaebea chi aude chi bia ãrea adauɗai kʉ̃ria panasiiɗeeba».
4 Maabae mʉʉba ũrisii aɓauba bajãaɗebena naka jaraaruu:
«Mʉ ẽbẽrarã, Babiloniaɗebena wãurísturu mau puuruɗebenarãba kachirua wau panuu waurãaɗamera.Maka Dachi Akõreba maarã kastikakuaruuɗe, machi kastikaabai.
5 Mau puuruɗebenarãba kachirua ãrea waumaa panuu. Maarã kachirua bajãaɗe neesiɗau, aɓau ʉ̃rʉ ʉtaa pewãaduu kĩra.Dachi Akõreba ãchiba kachirua waupeɗaaɗa kĩrabai ida ɓuwẽa ɓuu.
6 Jãu puuru kachirua wáusturu waabenarãmaa makasiɗau kĩra.Chi mauba jãka waabenarãmaa miadaa wausii baerã, ɓes ome kachirua wáusturu.Chi mauba waabenarãmaa miadaa wausii uva ɓaa asia doobai ɓuuɗe dobiaruu kĩra.Mauɗeeba maumaa ɓes ome miadaa wáusturu, uva ɓaa asia doobai ɓuuɗe ɓes ome dobiaruu kĩra.
7 Mau puuru ãrea biꞌiwãe paneebísturu mauɗe ãrea kĩra nomaabísturu,ãchi puuru mechiu ɓuu a panuuɗeeba mauɗe ne biꞌia ãrea uru panuu a panuuɗeeba.Mau puuruɗebena naka kʉ̃risia duanuu. “Mʉ chi reina ãkauɗe akʉ ɓuu kĩra nii.Mʉ aɓa pẽdrãa kĩra niiwãe. Mʉ biꞌiwãe ɓuabai”.
8 Mauɗeeba ewari aɓaburu kĩra nomaa jẽai, jarrbisiaba kachirua ɓuai, mauɗe biui.Dachi Akõre Mechiu chi joma poyaabariiba mau puuru joma ãripeɗa baabʉʉi».
9 Reyrã drua jomaɗebenarãba jãu puuruɗebenarã ome kachirua waubachiɗau wẽra auɗuabarii ome kãi ɓeeruu kĩra. Maarã siɗa barau paneesii mau puuruɗe ne bia wãꞌãekaraa uru panaɗa adausiɗauɗeeba. Mauɗeeba chi mau puuru baawãmaa ɓuuɗe nari unuuduuɗe maarã ẽroɗai.
10 Wapeaɗai Dachi Akõreba Babilonia puuru kastikaɗa kĩra maarã kastikakuai. Mauɗeeba kaitawẽeba ichia kopanuuba naka jaraɗai:
«¡Miichuburi, Miichuburi, Babilonia puuru mechiu ne joma waubadauɗeeba!Dachi Akõreba mau puuru kãꞌãabariwãeɗe kastikai».
11 Nau druaɗebena ne kaebea nedobʉibadaurã jẽaɗai mau puuru kakua ãchiba nedobʉi panuu kaiba nedoɗai wãꞌãe baiɗeeba.
12 Mau puuruɗe ne joma nedobʉibachiɗau: Nee, parata, mo doɗaa mipitaa mauɗe perla chi nejarr ãrea iɗibadau, lino mauɗe seda paru chi aude chi bia, paru pupuchia, paru purr, bakuru tuwaa ɓee, ne elefante kiɗa wauɗa, ne bakuru chi nejarr ãrea iɗibadau wauɗa, bronce wauɗa, ne jiorr wauɗa mauɗe ne mármol mokara wauɗa.*
13 Canela, joma barikiu ne tuwaa, incienso ne tuwaa, mirra ne tuwaa, kera, uva ɓaa, olivo drabirua, harina biꞌia ɓaɗa, trigo, pakarã, oejarã, murarã mauɗe karretarã nedobʉibachiɗau. Mauɗe mau puuruɗe ẽbẽrarã siɗa nedobʉibachiɗau chibari baita bari trajabadaurã nureaɗamera.
14 Joma mau nedobʉibadaurãba naka jaraɗai:
«Joma mau puuruɗebenarãba kʉ̃ria panaɗa jãabae wãꞌãesii. Chi nejarra ãrea uru panaɗa mauɗe chi ne bia nuree ãrea uru panaɗa joma wãꞌãesii. Waa makaa adauɗaabai».
15 Biawãra mau puuruɗaa ne kaebea nedobʉiɗe wãpeɗaaɗa ãrea barau paneesii. Chi maarã wapea panaɗai Dachi Akõreba mau puuru kastikaɗa kĩra ãchi siɗa kastikaiɗeeba. Mauɗeeba kaitawẽeba ichia kopanuuba naka biuchaa jẽasiɗau:
16 «¡Miichuburi, Miichuburi jãu puuru mechiu ɓuaɗa!Jãu puuru wẽra lino paru chi aude chi bia jʉ̃ ɓuaɗa kĩra ɓuasii.Wẽra paru pãaraa mauɗe puria jʉ̃ ɓuu kĩra ɓuasii.Ne kaebea nee wauɗa, mo doɗaa mipitaa mauɗe perla chi nejarr ãrea iɗibadau jʉ̃ ɓuasii.
17 Maamina mau puuruɗe ne bara ɓuaɗa kãꞌãabariwãeɗe wãꞌãesii».
Joma chi jãba adoebadaurã, jãbaɗe wãbadaurã, jãbaɗe trajabadaurã mauɗe mau marɗe trajabadaurãba kaitawẽeba ichia duanaɗai.
18 Mau puuru baa nuɓuu nari unuuduuɗe jĩwa naka jaraɗai: «¿Sãu puuru jãu puuru kĩra ɓuasma?»
19 Nomaaba ãchi boro ʉ̃rʉ ioro jora kuikuaɗai maabae jĩwa naka jẽaɗai:
«¡Miichuburi, Miichuburi jãu puuru mechiu ɓuaɗa! Jãu puuru ne bara ɓuasiiɗeeba, joma chi jãba uru ɓeaɗa aria barau duaneesii.Maamina jãu puuru kãꞌãabariwãeɗe joma ãrisii.
20 ¡Joma bajãaɗe duanuu kĩrajʉ́sturu, jãu puuru ãrisiiɗeeba!Ẽbẽrarã Dachi Akõreɗerã, Jesusba bʉiɗarã mauɗe Dachi Akõre baita berreabadaurã kĩrajʉ́sturu.Dachi Akõreba jãu puuru kastikai machimaa miadaa wausiiɗeeba».
21 Maabae ángel mechiuba mo mechiu kũruma kĩra ɓuu marɗe jiratasii. Makamaa ɓuuɗe naka jarasii:
«Maka mʉʉba mau mo marɗe jirataɗa kĩra Babilonia puuru mechiu kãꞌãabariwãeɗe joma ãrii. Mau puuru waa unuɗaabai.
22 Aria arpa, purrsiru mauɗe kachu chaaduu waa ũriɗaabai. Ẽbẽrarã kariiduu siɗa waa ũriɗaabai.Ẽbẽrarãba ne kabadaurã waa unuɗaabai. Kũrumaɗe ne ɓaaduuɗe jĩwaaruu siɗa waa ũriɗaabai.
23 Ʉ̃ɗaa koabarii waa unuɗaabai. Miakãiduuɗe kĩrajʉʉbadau waa ũriɗaabai.Arabena ne kaebea nedobʉibadaurã nau iujãaɗe chi mechiu nureasii.Ariabena jaibanarãba druachabenarã joma setaa kũruabachiɗau.
24 Dachi Akõre baita berreabadaurã beapeɗaaɗa, ẽbẽrarã Dachi Akõreɗerã beapeɗaaɗa, mauɗe joma nau iujãaɗe nureaɗa beapeɗaaɗa kakua mau puuruɗebena nebʉraɗe duanuu».
