Apocalipsis 19:1-21
19 Mau maaɗakare mʉʉba bajãaɗe ãrea naka berrea duanuu kĩra ũrisii:
«¡Dachi Akõremaa biꞌia jaráduru!* Ichiaburu ẽbẽrarã karibabarii. Ichi chi aude mechiu nii mauɗe poyaabarii.
2 Ichi biawãra niiɗeeba arakʉɗe ẽbẽrarã kastikabarii. Wẽra auɗuabarii trʉ̃ poa ɓuaɗa kastikasii, mauba joma chi nau iujãaɗebenarãmaa araɓau kachirua waubiasiiɗeeba.Dachi Akõreba mau wẽra kastikasii chi ichi baita bari trajabadaurã kenaɗa kakua».
3 Waya naka jĩwa jarasiɗau:«¡Dachi Mechiu biꞌia jaráduru! Jãu puuru baa nuɓuuɗebena nari ewaricha boɗiu nuɓuai».
4 Mauɗe chi 24 chõrarã mechiu mauɗe chi kimare chokae nuree õdarrɗe kopaneesiɗau Dachi Akõremaa biꞌia berreaɗai baita. Dachi Akõre ichi rey ãkauɗe akʉ ɓuuɗe ãchiba naka jarasiɗau:
«¡Biꞌia ɓuu maka ɓuai!* ¡Dachi Mechiumaa biꞌia jaráduru!»
5 Mauɗe mʉʉba ũrisii Dachi Akõre rey ãkau ɓuareeba aɓauba naka jĩwa berrearuu:
«¡Dachi Akõre baita bari trajabadaurã, joma machiba Dachi Akõremaa biꞌia berreásturu!¡Joma chi Dachi Akõre wapea nureerã, chi aude mechiurã mauɗe chi kaebeurã biɗa ichimaa biꞌia berreásturu!»
Oeja Cheke miakãiduu ewari
6 Maabae mʉʉba ãrearã jĩwa berrea duanuu ũrisii. Mau do ʉrʉrʉa kĩra mauɗe bã ãrea ɓaemaa ɓuu kĩra ɓuasii. Naka jara duanasiɗau:
«¡Dachi Mechiumaa biꞌia jaráduru,Dachi Akõre Joma Poyaabariiba jomaurã ichi juaɗe ua ɓuuɗeeba!
7 ¡Kĩrajʉ́duru! ¡Kĩrajʉ́duru! Ichi chi Mechiu nii aɗai, Oeja Kaebe Nii miakãai ewari basiiɗeeba. Ichi wẽra ba ɓeeruu paru jʉ̃sii.
8 Dachi Akõreba chi mau wẽra lino paru torroa teɗechoa ɓuu jʉ̃bisii».
(Mau paru lino wauɗaba jara ɓuu ẽbẽrarã Dachi Akõreɗerãba jipa waubadau).
9 Mauɗe angelba mʉʉmaa jarasii: «Kartaɗe naka ɓʉse: “¡Biꞌia ãrea duanaɗai chi Oeja Kaebe Nii miakãipeɗaaɗa chiko kooduumaa iupeɗaaɗarã!”» Mauɗe jarasii: «Mau biawãra beɗea Dachi Akõreba jaraɗabʉ».
10 Ara makʉɗe mʉ chi ángel jʉ̃rʉ kaita õdarrɗe koɓeesii biꞌia berreai baita. Maamina mauba mʉʉmaa jarasii: «Mau waurã́se, Dachi Akõréturu biꞌia kʉ̃riáse. Bari mʉ Dachi Akõre baita bari trajabariibʉ bichi kĩra, mauɗe ãbarã Jesusba jaradeaɗa ijãabadaurã kĩra».
Jesusba jaradeaɗa Dachi Akõre Jauriba chi ichi baita berreabadaurãmaa berreabiabarii.*
Mura torr ʉ̃rʉ neeɗa
11 Maaɗakare mʉʉba bajãaɗe poraa ewa nuɓuu unusii. Ara makʉɗe mura torr neesii. Mau mura ʉ̃rʉ akʉ ɓuu trʉ̃ jarabadau Chi Jaraɗa Kĩra Waubarii mauɗe Chi Biawãra abadau. Mauba ẽbẽrarã jipa ichiabarii mauɗe jipa wau ɓuuɗeeba chi kĩramaa panabadau ome chĩobarii.
12 Ichi dau tʉbʉ aoko nuɓuu kĩra koa ɓuasii. Ichi boroɗe boro jũra ãrea jʉ̃ ɓuasii. Ichi boroɗe trʉ̃ ɓʉ inibasii maamina aɓau biɗa mau trʉ̃ adua basii; ichiaburu mau kuitaa ɓuasii.
13 Ichi paru oaɗe ũraɗa ɓuu jʉ̃ nibasii. Ichi trʉ̃ «Dachi Akõre Beɗea» abadau.*
14 Ichi kaaɗe bajãaɗebena kokoroarã mura torroa nuree ʉ̃rʉ imisiɗau. Maarãba paru chi aude chi bia ãrea lino wauɗa torroa ɓee jʉ̃ nureasii. Ɓistĩika biɗa ãichorroaɗawẽa nureasii.
15 Dachi Akõre Beɗea abadau okarrɗeeba chĩobarii neko peeɗea ɓuu nee ɓuasii druachabenarã poyaai baita. Ichi kĩra chuburiayuwãe joma nau iujãaɗebenamaa ichiɗe ijãabia ɓuai.* Uva biraduaruu kĩra, ãchi maka kastikai, Dachi Akõre Joma Poyaabarii kĩru kuɓuuɗeeba.
16 Ichiba paru jʉ̃ ɓuumaa ɓakara ʉ̃rʉ nau trʉ̃ ɓʉ inii: «Jomaurã Reyrã Audeara Chi Aude Mechiu Nii» mauɗe «Joma Chi Mechiurã Audeara Chi Aude Mechiu Nii».
17 Maabae mʉʉba ángel aɓa ʉmada ʉ̃rʉ akʉ nuɓuu unusii. Ichiba joma kiuru mikia kobadaurã ʉtʉ ũuɓaribadaurãmaa naka jĩwa jarasii: «Nésturu. Araa ãbua joma imísturu chiko ãrea Dachi Akõreba wau ɓuumaa.
18 Aria reyrã kiuru koɗe wãɗai, kokoroarã karrarã kiuru, mechiurã nuree kiuru, mura kiuru mauɗe mura ʉ̃rʉ ataubadau kiuru siɗa koɗai. Joma ẽbẽrarã kiuru koɗai: chi chibari baita bari trajabadaurã kiuru, chi chibariswãe nuree kiuru, chi kaebeu nuree kiuru, mauɗe chi aude mechiurã kiuru koɗai».
19 Maabae mʉʉba ãnimara kachirua, nau iujãaɗebena reyrã, mauɗe joma ãchi kokoroarã ãbua imipeɗaaɗa unusii. Ãbua panasiɗau chi mura ʉ̃rʉ akʉ ɓuu ome chĩoɗai baita mauɗe chi ichi baara panuu kokoroarã ome chĩoɗai baita.
20 Chi mura ʉ̃rʉ akʉ ɓuuba ãnimara kachirua mauɗe chi Dachi Akõre baita berreabarii chi biawãrawãe jidausii. Mauba ãnimara kachirua trʉ̃ɗeeba ẽbẽrarãba ne poyaa wauɗakau mechiu waubachii. Mauba ãnimara kachirua seña ida waubiapeɗaaɗa joma setaa kũruabachii. Mau chi ara ichi kĩra juaba ne kapeɗaaɗa ãrea kʉ̃riapeɗaaɗa setaa kũruabachii. Chi mura ʉ̃rʉ akʉ ɓuuba mau ãnimara kachirua mauɗe chi Dachi Akõre baita berreabarii chi biawãrawãe chokae panuu choɓea mar kĩra eɗa azufre aoko nuɓuuɗe jiratasii.
21 Chi neko ichi okarrɗebena awara nee ɓuuba waabenarã joma kenasii. Maabae joma chi kiuru mikiaɗa kobadau ʉtʉ ũuɓaribadaurãba mau kiuru kosiɗau jãwaaduuɗaa.
Notas
^ 19:1 Dachi Akõremaa biꞌia jaráduru. Griego beɗeaɗe naka ɓʉ kuɓuu: aleluya.
^ 19:4 Biꞌia ɓuu maka ɓuai. Griego beɗeaɗe naka ɓʉ kuɓuu: amén.
^ 19:10 Jesusba jaradeaɗa Dachi Akõre Jauriba chi ichi baita berreabadaurãmaa berreabiabarii. Griego beɗeaɗe mau chaarea ɓuu biꞌia ũriɗamera.
^ Juan 1:1.
^ Salmos 2:9
