Apocalipsis 20:1-15
20 Mau maaɗakare mʉʉba ángel aɓa bajãaɗebena eɗaa uruu unusii. Mauba eakarr eɗaa choɓeabena poraa ewabarii uru ɓuasii. Mauɗe kaena borea ɓuu ichi juaɗe uru ɓuasii.
2 Chi dragón jidadaupeɗa 1.000 años jʉ̃ kuɓusii. Mau dragón nabẽraeɗebena damabʉ. Jʉbawãe nii mauɗe Satanás abadau.
3 Angelba mau eakarr eɗaa choɓeaɗe jiratasii maabae jʉ̃a kuɓusii aɓau biɗa poyaa ewarãaɗamera. Mauɗeeba jʉbawãe niiba drua jomaɗebenarã waa setaa kũruabai aɓa 1.000 años wãꞌãeruuɗaa. 1.000 años baɗakare mau enatai nau iujãaɗe ewari ɓaꞌãra ɓuamera.
4 Maabae mʉʉba rey ãkaurã ãrea unusii. Mau ʉ̃rʉ akʉ ɓeemaa Dachi Akõreba deaɗakasii ẽbẽrarãba waupeɗaaɗa ichiaɗamera. Mauɗe ẽbẽrarã boro tʉʉtapeɗaaɗa jauri unusii. Maka boro tʉʉtasiɗau Jesusba jaradeaɗa ijãa panuuɗeeba mauɗe Dachi Akõre beɗea jaradea panuuɗeeba. Ãchiba ãnimara kachirua nii mauɗe chi ara ichi kĩra juaba ne kapeɗaaɗa ãrea kʉ̃riaɗaabasii. Ichi seña ãchi dauɓʉʉrʉɗe juaɗe biɗa ida waubiɗaabasii. Ãchi chokae jiraduɗapeɗa Cristo baara karrarã 1.000 años paneesiɗau.
5 Mau chokae jiradupeɗaaɗa chi Dachi Akõreba naa chokae jiradubiaɗa basii. Waabenarã biupeɗaaɗarã chokae jiraduɗaabasii aɓa 1.000 años wãꞌãesiiɗaa.
6 Ẽbẽrarã Dachi Akõreba naa chokae jiradubiaruu ãrea biꞌia nureaɗai. Maarã waa biuɗaabai, bari Dachi Akõre mauɗe Cristo paarerã paneeɗai.* Mauɗe 1.000 años Cristo ome chi karrarã nureaɗai.
Dachi Akõreba Satanás tʉbʉchia kiikauɗe jirataɗa
7 1.000 años neeruuɗe Satanás jʉ̃ ɓuaɗa ena ɓeei.
8 Mau maaɗakare chi mauba joma druacha setaa kũruakuaɗe wãi. Gog druaɗebenarã mauɗe Magog* druaɗebenarã setaa kũruakuaɗe wãi. Mau druaɗebenarã kokoroarã mar ibu kĩra ãrea panuu uaɗoi ẽbẽrarã Dachi Akõreɗerã ome chĩoɗamera.
9 Joma nau iujãaɗe wãɗai. Maabae Dachi Akõreba kʉ̃ria ɓuu puuru mauɗe ichi ẽbẽrarã duanuumaa aɗu jũraɗai. Maamina Dachi Akõreba bajãaɗebena tʉbʉchia ɓaebiai. Mauba chi maarã joma baa kenai.
10 Mau maaɗakare Dachi Akõreba jʉbawãe nii ẽbẽrarã setaa kũrua uru ɓuaɗa choɓea mar kĩra azufre bara aoko nuɓuuɗe jiratai. Naeɗe Dachi Akõreba ãnimara kachirua ɓuu, Dachi Akõre baita berreabarii chi biawãrawãe siɗa mau tʉbʉ aokoɗe jiratasii. Chi maarã mauɗe jʉbawãe nii siɗa ewaricha ãyadaa mauɗe ẽsabuɗe ãrea biꞌiwãe panaɗai.
Rey ãkau torroa mechiu nuɓuuɗeeba nebʉra ichiakuai
11 Mau maaɗakare mʉʉba rey ãkau mechiu torroa ɓuu mauɗe chi mauɗe akʉ ɓuu unusii. Ichi daaɗe joma nau iujãa mauɗe bajãa wãꞌãesii. Aɓau biɗa waa unuɗaabasii.
12 Mauɗe mʉʉba unusii biupeɗaaɗarã chi mechiurã mauɗe chi kaebeurã Dachi Akõre rey ãkau daaɗe akʉ topanuu. Mauɗe chi ɓee karta* ewakuasii. Maabae june aɓa karta ewasii. Mau kartaɗe ẽbẽrarã ewaricha chokae nureaɗai trʉ̃ ɓʉ kuɓuasii. Dachi Akõreba chi biupeɗaaɗarã joma ichiasii ãchiba waupeɗaaɗa kĩra, chi maarã kartaɗe ɓʉ kuɓuaɗa kĩra.
13 Joma chi marɗe biupeɗaaɗarã Dachi Akõre daaɗe imisiɗau. Joma chi biupeɗaaɗa ãchi panabadaumarebena Dachi Akõre daaɗe imisiɗau.* Maabae Dachi Akõreba ãchi aɓaaɓaa ichiai ãchiba waupeɗaaɗa kĩra.
14 Dachi Akõreba chi biuɗai joma wãꞌãebisii ea choɓeaɗe azufre bara aoko nuɓuuɗe jirataaruu kĩra. Biupeɗaaɗa panabadaumarebena siɗa aria jiratasii. Mau ea choɓeaɗe azufre bara aoko nuɓuu ɓes ome biui jara ɓuu.
15 Chi ẽbẽrarã trʉ̃ chi ewaricha chokae duanabarii kartaɗe wãꞌãerã Dachi Akõreba mau ea choɓeaɗe azufre bara aoko nuɓuuɗe jiratasii.
Notas
^ 20:6 Waa biuɗaabai. Griego beɗeaɗe naka ɓʉ kuɓuu: Ɓes ome biuɗaabai. Mau jara ɓuu Dachi Akõreswãe tʉbʉ aokoɗe ãrea biꞌiwãe panaɗai. Apocalipsis 20:14.
^ Ezequiel 38:2; 39:1,6.
^ 20:12 Chi ɓee karta. Ẽbẽrarãba waupeɗaaɗa maarã kartaɗe ɓu kuɓuu.
^ 20:13 Chi biupeɗaaɗa ãchi panabadaumarebena. Griego beɗeaɗe naka ɓʉ kuɓuu: Hades.
