Apocalipsis 5:1-14
5 Mauɗe mʉʉba unusii chi rey ãkauɗe akʉ ɓuu ichi juaɗe karta bʉra uru ɓuasii. Chi kartaɗe muriacha ne ɓʉ kuɓuasii. Chi karta kuɓuumaa 7 jʉrrʉba wãa kuɓuasii aɓau biɗa ewarãamera.
2 Mauɗe mʉʉba ángel aɓa poyaabarii unusii. Mauba jĩkua berrearuuba iɗisii: «¿Kai biꞌia ɓuma chi kartamaa wãa kuɓuu oetapeɗa ewai baita?»
3 Maamina mau karta ewapeɗa eɗa jarai baita aɓa biɗa chi bia wãꞌãe basii. Bajãaɗe, nau iujãaɗe mauɗe biupeɗaaɗa duanaabadaumarebena siɗa wãꞌãe basii.*
4 Mauɗe mʉ ãrea jẽa koɓeesii ẽbẽra bia aɓa biɗa wãꞌãe basiiɗeeba mau karta ewapeɗa eɗa jaramera.
5 Maamina aɓa chi 24 chõrarãɗebenaba mʉʉmaa naka jarasii: «Jẽarã́se. Ichiáse, Davidɗebena aɓa neeɗabʉ. Mau Judaɗebena neeɗa Imama abadauba Dachi Akõre kʉ̃riaɗakaurã poyaasii. * Mauɗeeba chi nau kartaɗe 7 wãa nuɓuu poyaa oetapeɗa ewai ɓuu».
6 Mauɗe Dachi Akõreɗe rey ãkau kaita, kimare chokae nuree kaita mauɗe 24 chõrarã mechiurã tãeɗe oeja kaebeu aɓa akʉ nuɓuu unusii. Mau chi bea panaɗa kĩra nibasii. Kachu 7 bara nibasii. Mauɗe 7 dau bara nibasii. Mau dau jara ɓuu chi 7 jauri Dachi Akõre daaɗe panuu. Dachi Akõreba nau iujãa jomaɗe maarã bʉikasii.
7 Mauɗe mau oeja kaebeu chi rey ãkauɗe akʉ ɓuumaa wãpeɗa chi karta mau jua biare uru ɓuaɗa adausii.
8 Mau karta adausiiɗe chi kimare chokae nuree mauɗe chi 24 chõrarã siɗa ichi daaɗe õdarrɗe kopaneesiɗau. Ãchi aɓaaɓaa arpa mauɗe sãu nee wauɗa uru panasiɗau. Chi sãu incienso keraba waabiru uru panasii. Chi kera incienso jara ɓuu ẽbẽrarã Dachi Akõreɗerãba chi ichimaa ʉtaa iɗibadau.
9 Chi 24 chõrarã mauɗe chi kimare chokae nureerãba nau kari wiɗi karisiɗau:
«Bichíturu biꞌia nii, mau karta adaupeɗa, chi wãa koɓee oekuai baita, bichi beasiɗauɗeeba.Bichi oa chesiiba ẽbẽrarã nedokuasii Dachi Akõre baita.Ẽbẽrarã didiwaraacha jomaɗebena, beɗea didiwaraacha jomaɗebena, puurucha mauɗe drua jomaɗebena chi nuree nedosii.
10 Bichiba maarã duanusii Dachi Akõreɗe paarerã baɗamera.Mauɗe nau iujãaɗe ichi baara chi karrarã baɗai».
11 Maka ɓuuɗe mʉʉba angelerã karimaa panuu unusii. Maarã ãrea basiiɗeeba mʉʉba poyaa juasiibasii. * Maarãba Dachi Akõre chi rey ãkau, chi chokae duanuurã mauɗe chi 24 chõrarã aɗu jũra duanasiɗau.
12 Naka jĩwa kari panasiɗau:
«¡Chi oeja kaebeu beapeɗaaɗa ãrea biꞌia nii!Jomaurãba mau biꞌia berreaɗai panuu ne joma poyaabariiɗeeba, ne joma uru ɓuuɗeeba, joma kuitaa ɓuuɗeeba mauɗe ãrea poyaabariiɗeeba.Ichi chi aude mechiu nii aɗai panuu mauɗe chi aude bia nii aɗai panuu».
13 Mauɗe mʉʉba ũrisii chi joma Dachi Akõreba waukuaɗa chi bajãaɗe duanuu, chi nau iujãaɗe duanuu, chi biupeɗaaɗa mauɗe marɗe duanuu biɗa naka kari panasiɗau: *
«Jomaurãba chi rey ãkauɗe akʉ ɓuumaa mauɗe chi oeja kaebeu niimaa ewaricha biꞌia berreaɗai panuu.Aude mechiu nii a jaraɗai panuu, aude mipitaa nii a jaraɗai panuu mauɗe bibuara ɓuu ichi juaɗe uru ɓuai a jaraɗai panuu».
14 Maabae chi kimare chokae nureeba naka jarasiɗau: «Bibuara ɓuu maka ɓuai». Ara makʉɗe chi 24 chõrarã õdarrɗe kopaneeɗapeɗa chi ewaricha chokae niimaa biꞌia berreasiɗau. *
Notas
^ 5:3 Biupeɗaaɗa duanaabadaumarebena. Griego beɗeaɗe naka ɓʉ kuɓuu: nau iujãa ekare.
^ 5:5 Isaías 11:1,10; Génesis 49:9-10.
^ 5:11 Ãrea. Griego beɗeaɗe naka ɓʉ kuɓuu: miles de miles. Kajuma beɗeaɗe jara ɓuu «millones de millones».
^ 5:13 Biupeɗaaɗa. Griego beɗeaɗe naka ɓʉ kuɓuu: nau iujãa ekare nureeba.
^ 5:14 Chi ewaricha chokae nii. Griego beɗeaɗe chi ɓee kartaɗe mau wãꞌãe.
