Apocalipsis 8:1-13
8 Oeja Kaebe Niiba chi kaaɗearebena chi wãa kuɓuu oetasiiɗe, bajãa ãrea chũpea nuɓuaɗausii.*
2 Mau maaɗakare mʉʉba 7 angelerã Dachi Akõre daaɗe akʉ topanuu unusii. Maarãmaa kachu 7 deasii.
3 Maabae ángel june neepeɗa Dachi Akõre baita kera baabadaumare akʉ nuɓeesii. Mau Dachi Akõre baita kera baabadau nee wauɗa chi rey ãkau kĩraare nuɓuu. Chi angelba ichi juaɗe paratu nee wauɗa uru ɓuasii kera baai baita. Aɓaba ichimaa kera ãrea deasii Dachi Akõre baita baamera ẽbẽrarã Dachi Akõreɗerã ʉtaa iɗimaa panuumisa. Ara makʉɗe ichiba chi kera baasii chi kera baa deabadau ʉ̃rʉ.
4 Chi ẽbẽrarã Dachi Akõreɗerãba ʉtaa iɗipeɗaaɗa mau angelba kera baaɗa nari baara ãbua chi Dachi Akõremaa ʉtaa piumaa wãsii.
5 Maabae chi angelba kera baa deabadauɗebena tʉbʉ kĩra adaupeɗa, chi paratu waabirubisii. Mau tʉbʉ kĩra nau iujãaɗaa jiratasii. Mauba bã tosii, ʉrʉrʉa wã koɓeesii, bajãa puri chebi koɓeesii mauɗe nau iujãa siɗa uri koɓeesii.
Angelerãba kachu chaapeɗaaɗa
6 Maabae chi 10 angelerãba kachu 7 chaaɗai baita kopaneesiɗau.
7 Aɓauba ichi kachu chaasii. Ara makʉɗe bajãaɗebena nau iujãaɗe hielo kui kĩra ɓaesiɗau. Mauɗe nau iujãaɗe tʉbʉchia oa baara ɓaesiɗau. Mauba nau iujãa jomaɗebena beraa mita baawãsii mauɗe bakururã siɗa.* Mama chi siruarã joma baawãsii.
8 Mau maaɗakare june aɓa angelba ichi kachu chaasii. Ara makʉɗe aɓauba ea kĩra urua aoko ɓuu marɗe jiratasii. Mauba beraa mita chi mar oa ba nuɓeesii.
9 Chi oa ba nuɓee ɓuaɗamare ãnimararã marɗebena beraa mita kinisiɗau mauɗe jãba aria duanaɗa beraa mita teakuasii.
10 Mau maaɗakare june aɓa angelba ichi kachu chaasii. Ara makʉɗe bajãaɗebena pusterrea mechiu aɓa tʉbʉchiaba bʉra ɓuu ɓaesii. Beraa mita doorã ẽsaɗe ɓaesii mauɗe bania bumadru ɓuuɗe.
11 Mau pusterrea “Asia Nii” abadau. Chi mau ɓaeɗamare bania beraa mita asia nuɓeesii. Mau baniaba ẽbẽrarã ãrea kinisiɗau.
12 Mau maaɗakare june aɓa angelba ichi kachu chaasii. Ara makʉɗe beraa mita jeɗako pãriusii mauɗe ʉmada. Mauɗe beraa mita pusterrearã siɗa pãriusii. Mauɗeeba beraa mita ewari aɓa pãriu nuɓeesii. Mauɗe ẽsabuɗe biɗa beraa mita chi jeɗako mauɗe pusterrearã siɗa pãriu nuɓeesii.
13 Mʉʉba ʉtaa ichiasiiɗe ũrisii nejõo aɓa ʉtʉ ũuɓari kãriiba naka jara kãrii:* «¡Mia pera! ¡Mia pera! ¡Mia pera! Ẽbẽrarã nau iujãaɗebena kĩra chuburiaɗai chi waabena angelerãba ãchi kachu chaaduuɗe!»
