Apocalipsis 9:1-21
9 Mau maaɗakare june aɓa angelba ichi kachu chaasii. Ara mauɗe mʉʉba pusterrea aɓa nau iujãaɗe ɓaeruu unusii. Aɓauba mau pusterreamaa llave aɓa poraa eakarr eɗaa choɓea ewabarii deasii.
2 Mau eakarr eɗaa choɓeaɗe poraa ewasiiɗe, choɓeaɗebena ʉtaa nari ãrea chesii mode baaruuɗe makabarii kĩra.* Mau nariba ʉmada paimaa ãrea koɓeesii mauɗe chi bajãa siɗa.
3 Mauɗe jãu nariɗebena nau iujãaɗaa sisi mechiu ũuɓari chesiɗau. Dachi Akõreba maarã sisirãmaa poyaabarii deasii ẽbẽrarã kaaɗamera, dosurĩba kaaruu kĩra.
4 Chi sisirãmaa jarasii siruarã mauɗe bakururã ãriraaɗamera. Bari ẽbẽrarãba ãchi dauɓʉʉrʉɗe Dachi Akõre selloswãe nuree kaabiasii.
5 Dachi Akõreba chi sisirãmaa ẽbẽrarã ida beabiaibasii, bari jeɗako jua aɓa pirabíturu deasii. Mau pira ɓuu dosurĩba kaaɗa kĩra pira ɓuai.
6 Mau ewariɗe ẽbẽrarãba biuɗai jʉrʉɗai. Biawãra biuɗai kʉ̃ria panumina, biuɗaabai.
7 Mau sisi mura kokoroaba chĩoɗe adoebarii kĩra nureasii. Ãchi boroɗe boro jũra aɓa nee wauɗa kĩra ɓuu jʉ̃ panasii. Ẽbẽra kĩedarr kĩra nibasiɗau.
8 Ãchi buɗa wẽra buɗa kĩra panasii. Ãchi kiɗa imama kiɗa kĩra panasii.
9 Ãchi kakuaɗe chaarea ɓuu jʉ̃barii jiorr wauɗa jʉ̃ panasii. Ãchi ikia mura ãrearã piraaduuɗe ãchi karreta baara chĩoɗe wãaduu kĩra chirĩderrea panasii.
10 Ãchi druu dosurĩ druu kĩra misua panasii. Maarãba ẽbẽrarã ãchi druuba jeɗako jua aɓa poyaa puꞌua pirabiaɗai panasii.
11 Chi maarã sisi rey chi eakarr eɗaa choɓeaɗebena angelbʉ. Ichi trʉ̃ hebreo beɗeaɗe Abadón abadau mauɗe griego beɗeaɗe Apolión.*
12 Chi nabena mia pera jaraɗa wãꞌãesii, maamina wabiɗa ome panuu.*
13 Mau maaɗakare june aɓa angelba ichi kachu chaasii. Mauɗe chi Dachi Akõre daaɗe kera baa deabadau nee wauɗa kachu kimare panuumareeba mʉʉba aɓa berreamaa ɓuu ũrisii.
14 Chi berrea ɓuuba chi ángel chi kachu chaaɗamaa naka jarasii: «Chi kimare angelerã do Éufrates mechiu abadaumare jʉ̃ panuu enatase».
15 Ara makʉɗe ichiba maarã kimare enakuasii nau iujãaɗebena ẽbẽrarã beraa mita beaɗamera.* Dachi Akõreba maarã uru ɓuasii maka beaɗamera ara mau añoɗe, ara mau jeɗako aɓaɗe mauɗe ara mau ewariɗe biɗa.
16 Mauɗe mʉʉba ũrisii aɓauba jaramaa ɓuasii sãabe kokoroa nuree muraɗe ataubadau eneemaa panuu. Dosientos millones eneemaa panuu asii.
17 Chi murarã mʉ daumaa unubiɗa naka nureasii: ãchi boro imama boro kĩra nureasii. Ãchi okarrɗebena tʉbʉchia mauɗe nari aokokobadau panasii. Mau kakuaɗe chaarea ɓuu puria aoko ɓuu kĩra ɓuasii, zafiro mo pãwaraa kĩra ɓuasii mauɗe azufre mo kĩra kuaraa ɓuasii.*
18 Chi mura okarrɗebena aokooruuba, nariba mauɗe azufre chi cheeruu biɗa beraa mita chi nau iujãaɗebena ẽbẽrarã kenasii.
19 Mau murarã poyaa ãchi okarrɗe mauɗe ãchi druɗe ɓuasii. Ãchi druu dama kĩra panasii. Ãchi druu boro bara nureeba ẽbẽrarã kaaɗapeɗa maabae beabachiɗau.
20 Maka ɓuukauɗe chi ẽbẽrarã mauba biuɗaabaɗaba wabiɗa chi kachirua wauɗayu mauɗe jai kachiruarã ijãaɗai ida ɓuɗaabasii. Dachi Akõre kuenda juaba ne kapeɗaaɗarã ida ɓuɗaabasii: chi nee wauɗa, parata wauɗa, bronce wauɗa, mo wauɗa mauɗe bakuru eraɗa ida ɓuɗaabasii. Maarã unuɗakau, ũriɗakau mauɗe nibaɗakau.
21 Mauɗe mia beabadau, waabenarã ẽpermabadau, dachi kakuaba barikiu kachirua waubadau mauɗe chiruabadau ida ɓuɗaabasii.
Notas
^ 9:2 Mode baaruuɗe makabarii kĩra. Griego beɗeaɗe naka ɓʉ kuɓuu: jiorr dorraɓaribibadaumare kĩra.
^ 9:11 Abadón...Apolión. Mau trʉ̃ jara kʉ̃ria panuu «Ne joma baribabarii».
^ 9:12 Mau mia pera jaraɗa dachiba unubadau Apocalipsis 8:13ɗe.
^ 9:15 Beraa mita. Griego beɗeaɗe naka ɓʉ kuɓuu: la tercera parte. Ara mau kĩra jara ɓuu versículo 18ɗe.
^ 9:17 Zafiro mo. Griego beɗeaɗe naka ɓʉ kuɓuu: jacinto pono.
