Efesios 1:1-23
1 Mʉ Pablobʉ. Dachi Akõreba kʉ̃riasiiɗeeba mʉ Jesucristoba bʉiɗabʉ. Mʉʉba nau karta ɓʉmaa ɓuu joma Dachi Akõreɗerã ẽbẽrarã Jesucristoɗe ijãa nuree Éfeso* puuruɗebenarã baita.
2 Mʉʉba kʉ̃ria ɓuu Dachi Bajãaɗebena Akõreba mauɗe Dachi Mechiu Jesucristoba ãchi sõbiaɗeeba machi aiɗa panaɗai mauɗe jirukaraayuwãe panabiaɗai.
Dachi Akõreba chi bia joma dachi jauri baita dea ɓuu
3 Dachi Mechiu Jesucristo Akõremaa biꞌia berreaɗai panuu. Cristo ome panuuɗeeba ichi Jauriɗeeba chi bia joma dachimaa bajãaɗebena dea ɓuu.
4 Nau drua waui naeɗe Cristoɗeeba dachi jʉrʉ adausii ichi baita biꞌia nureaɗamera mauɗe ichi daaɗe jayoa kachiruaswãe nureaɗamera. Nabẽraeɗeeɗe Jesucristoɗeeba dachi ichi warrarã baɗai a kʉ̃risia ɓuasii. Maka wau kʉ̃ria ɓuasii dachi kʉ̃riakuasiiɗeeba.
5 —.
6 Ichi sõbia ãrea ɓuuɗeeba dachi karibasii ichiba kʉ̃ria ɓuu Warrɗeeba. Mau baita ichimaa biꞌia berreaɗai panuu.
7 Ichi Warr oa chesiiɗeeba Dachi Akõreba dachi kachiruaɗebena karibasii. Ichi mechiu sõbiaɗeeba dachiba kachirua waupeɗaaɗa joma perdonasii.
8 Ichi sõbiaɗeeba dachi ãrea aiɗapeɗa joma kʉ̃risia kuitaa mauɗe kʉ̃risia kauwa dachimaa deasii.*
9 Ichiba wau kʉ̃ria ɓuu naeɗe kuitaabiawẽa ɓuasii. Maamina dachimaa kuitaabiasii ichi sõbiaɗeeba maka kʉ̃ria ɓuasiiɗeeba. Ichiba Cristoɗeeba nabẽraeɗeeɗe waui kʉ̃risia ɓuaɗa
10 ichiba ɓuɗa ewariɗe maka joma waui: mau ewariɗe ne joma bajãaɗebena mauɗe nau iujãaɗebena Cristo juaɗe ɓui.
11 Dachi Akõreba ne joma ichiba wau kʉ̃ria ɓuu waubarii kĩra Cristoɗeeba dachi jʉrʉ adausii,* nabẽraeɗeeɗe kʉ̃risia ɓuaɗa kĩra.
12 Maka wausii dai judiorã chi naa Cristoɗe ijãapeɗaaɗarãba ichi biꞌia nii ʉ̃rʉbena biꞌia berreaɗamera.
13 Mau awara machi judiowãerã biɗa chi biawãra beɗea ũrisiɗauɗe, mau dachi karibai beɗea bia ijãasiɗau. Maka Cristoɗe ijãasiɗauɗe Dachi Akõreba ichi Jauri machimaa deasii ichiba jaraɗa kĩra. Dauchaa ɓuu kĩra mauba kuitaabia ɓuu machi ichiɗirã.
14 Dachi Akõre Jauri adaupeɗaaɗaɗeeba dachiba kuitaa panuu joma Dachi Akõreba deai jaraɗa biawãra adauɗai ichiɗirã joma biꞌia ɓui ewariɗe. Mauɗeeba ichi biꞌia nii ʉ̃rʉbena biꞌia berreaɗai panuu.
Pabloba Dachi Akõremaa ʉtaa iɗiɗa
15 Mauɗeeba machiba Dachi Mechiu Jesusɗe ijãa panuu mauɗe joma ẽbẽrarã Dachi Akõreɗerã kʉ̃ria panuu mʉʉba ũrisiiɗeeɗebena,
16 mʉʉba ewaricha machi baita Dachi Akõremaa ichíturu kiɗibai abarii mauɗe machi ʉ̃rʉbena ʉtaa iɗibarii.
17 Mʉʉba Dachi Mechiu Jesucristo Akõremaa, chi Akõre biꞌia niimaa ʉtaa iɗibarii ichi Jauriɗeeba machimaa biꞌia kʉ̃risiabiamera mauɗe ichi ʉ̃rʉbena kuitaabiamera. Maka machiba ichi aude kuitaaɗai.
18 Mauɗe ʉtaa iɗibarii Dachi Akõreba machi kʉ̃risia ewamera. Maka machiba kuitaaɗai kãare ichiɗebena adauɗai baita eseɗau panuu, mau adauɗamera iusiiɗeeba. Mauɗe machiba kuitaaɗai ichi ẽbẽrarãba adauɗai ãrea biꞌia ɓuu.
19 Mauɗe mʉʉba ʉtaa iɗibarii machiba kuitaaɗamera ichi poyaa jomaurã audeara poyaa ɓuu. Mau poyaabariiɗeeba ichiba dachi ichiɗe ijãa nuree kariba ɓuu. Ara mau poyaabarii mechia ɓuuɗeeba,
20 Dachi Akõreba Cristo biu ɓuaɗa chokae jiradubipeɗa bajãaɗe ichi jua biare akʉ ɓeebisii.
21 Dachi Akõreba ichi jomaurã mechiu ɓusii: jai kachirua karrarã audeara, bajãaɗebena chi mechiu nuree audeara, chi poyaabadau audeara mauɗe chi aude jua chaarea nuree audeara. Nau ewariɗe ichi jomaurã audeara chi mechiu nii mauɗe kaaɗebena ewariɗe biɗa maka ɓuai.
22 Dachi Akõreba ne joma Cristo juaɗe ɓusii mauɗe Cristo ɓusii ne jomaɗe ichi ẽbẽrarã Mechiu ɓuamera.
23 Ẽbẽrarã Cristoɗerã ichi kakuabʉ. Ãchi ne jomaɗe ichiɗeeba panuu mauɗe ne joma ichiɗeeba ɓuu.
Notas
^ 1:1 Éfeso. Chi ɓee kartaɗe eɗa griego beɗeaɗe mau beɗea wãꞌãe.
^ 1:8 Ichi sõbiaɗeeba dachi ãrea aiɗapeɗa joma kʉ̃risia kuitaa mauɗe kʉ̃risia kauwa dachimaa deasii. Griego beɗeaɗe mau chaarea ɓuu biꞌia ũriɗamera. Nau siɗa jara ɓuu: Ichi sõbiaɗeeba dachi ãrea aiɗasii joma kʉ̃risia kuitaa mauɗe kʉ̃risia kauwa niiɗeeba.
^ 1:11 Cristoɗeeba dachi jʉrʉ adausii. Chi nureemaarã naka jara ɓuu: «Ichiba chi deai jara ɓuu adauɗai nuree ẽbẽrarã babiasii».
