Efesios 4:1-32
4 Mʉ Dachi Mechiu kakua jʉ̃a uru panuu. Mʉʉba machimaa chi chuburia iɗiiruu jipa nibaɗamera. Dachi Akõreba machi iusii maka nibaɗamera.
2 Machi waabenarã audeara biꞌia nuree kʉ̃risiarã́sturu. Kʉ̃riaɗeeba chiya dauchia jãadua nureásturu.
3 Dachi Akõre Jauriba machi jirukaraayuwãe nureabiai ɓuuɗeeba, ne joma biꞌia wáusturu biawãra ãbua nureaɗamera.
4 Dachi kakua ara aɓaburu ɓuu. Dachi Akõre Jauri ara aɓaburu iniɗau. Dachi Akõreba machi iusii ara mau eseɗau panaɗamera.
5 Dachi Mechiu Jesús ara aɓaburu nii. Dachiba araɓau Jesusɗe ijãa panuu. Mauɗe araɓau trʉ̃ɗeeba boro easiɗau.
6 Dachi Akõre ara aɓaburu nii. Ichi jomaurã Akõrebʉ, jomaurã Mechiubʉ. Jomaurã sõɗe ɓuu mauɗe jomaurãɗeeba ichiba wau kʉ̃ria ɓuu waubarii.
7 Maamina Cristoba ne waubiabarii dea kʉ̃ria ɓuaɗa kĩra ichi sõbiaɗeeba dachicha ichi baita ne bia wauɗamera aꞌawaraa deaɗakasii.
8 Dachi Akõre beɗeaɗe naka ɓʉ kuɓuu:
«Ichi ʉtaa wãsiiɗe ichiba ichi kĩramaabadaurã poyaaɗa adoesii jʉ̃ʉka ua ɓuai baita. Maabae ẽbẽrarãmaa ne bia deaɗakasii».*
9 Chi ʉtaa wãsii a ɓuuba ¿kãare jara ɓuma? Jara ɓuu ʉtaa wãi naeɗe ʉtʉʉba ichi nau iujãaɗe chi aude iɗuɗaa neesii.
10 Chi ʉtʉʉba eɗaa neeɗa waya bajãa chi aude ʉtʉ ɓuumaa wãsii ne joma ichi juaɗe ua ɓuamera.
11 Ara ichiba chi nuree ɓusii ichiba bʉiɗarã nureaɗamera, waabenarã ɓusii Dachi Akõre baita berreabadaurã nureaɗamera, waabenarã ɓusii chi beɗea bia Cristo ʉ̃rʉbena jaraɗe nibaɗamera, mauɗe waabenarã ɓusii chi ijãabadaurã nubadaurã mauɗe jaradeabadaurã nureaɗamera.
12 Ichiba maka ɓusii ẽbẽrarã Dachi Akõreɗerã aiɗaɗamera, ãchia biɗa Dachi Akõre baita poyaa biꞌia wauɗamera. Maka joma Cristo ẽbẽrarã ichi kakua abadau chaarea warimaa panuu,
13 aɓa jomaurã Dachi Akõre Warrɗe ijãa panuuɗeeba mauɗe kuitaa panuuɗeeba ãbua biꞌia paneeduuɗaa. Mauɗe dachi ne jomaɗe Cristo kĩra nureaɗai.
14 Makarã waa wãwa kĩra nureaɗaabai. Wãwaba barikia beɗea ijãabarii. Mau awara ẽbẽrarã setaa kũruaɗai kuitaa nureeba jaradea panuuɗeeba, setaa ijãabiabadau pũatuba jãba ãyaa adoeruu kĩra. Maamina dachi mau jãba kĩra nureaɗaabai.
15 Maumaarã kʉ̃riaɗeeba chi biawãra beɗea ijãaɗai panuu ne jomaɗe Dachi Mechiu Cristo kĩra nureaɗai baita.
16 Ichiɗeeba joma dachi ichi kakuabʉ. Chi dachi kakuaɗe jiɗiu kara ɓeeba chiya aiɗaɗai. Dachicha wauɗai panuu kĩra wauduuɗe jomaurã kʉ̃riaɗeeba biꞌia wari kãri baɗai.
Cristoɗeeba chokae ɓuai wiɗi uru nuree saka nibaɗai panuu
17 Machiba biawãra wauɗamera, mʉʉba Dachi Mechiu trʉ̃ɗeeba nau jaraaruu: waa Dachi Akõre adua nuree kĩra nibarã́sturu.* Ãchi kʉ̃risia biꞌiwãe nureeɗeeba nibabadau.
18 Ãchi kʉ̃risia pãriuɗe duanuuɗeeba Dachi Akõre ʉ̃rʉbena kuitaaɗakau. Ãchi sõ chaareaba Dachi Akõre adua nureeɗeeba, chi ichiba chokae duanubiai ɓuu wãꞌãe nuree.
19 Ãchi kakuaba barikiu kachirua wauduu kakua peraɗakau. Aɓa kachirua wauɗáituru kʉ̃riabadau. Chi kĩra nejasia joma wau panuu ʉ̃rʉbena, kakua ãkaaɗakau.
20 Maamina machiba Cristoɗe ijãasiɗauɗe kuitaasiɗau maka nureaɗaabai panuu.
21 Ãbarãba chi biawãra beɗea Cristo ʉ̃rʉbena biꞌia jaradeasiɗau mauɗe biawãra machiba ichi ʉ̃rʉbena ũriɗapeɗa ijãasiɗau.
22 Ãchimaa jaradeapeɗaaɗa naubʉ: naeɗe machiba wau panaɗa kĩra waa maka nibarã́sturu. Chi kakua kachirua wau kʉ̃ria ɓuuba setaɗeeba biꞌiwãe paneebiabarii. Mau ida ɓústuru, paru sore ẽebadau kĩra.
23 Maumaarã Dachi Akõremaa machi kʉ̃risia wiɗi ida waubiásturu.
24 Mau kʉ̃risia wiɗi Dachi Akõreba wausii machi ichi kĩra nureaɗamera. Mauɗeeba paru wiɗi jʉ̃ panuu kĩra, kʉ̃risia wiɗiɗeeba nibásturu. Maka machi Dachi Akõre daaɗe jipa, biꞌia nibaɗai chi biawãra beɗeaba jara ɓuu kĩra.
25 Mauɗeeba setaa ida ɓústuru. Aɓaburu biawãráturu waabenarã ome berreásturu, joma dachi araɓau kakuaɗebenaɗeeba.
26 Kĩruuduubʉrã kachirua waurã́sturu. Machi kĩru panuumisa, ewari araa ɓaebirã́sturu.*
27 Jʉbawãe niimaa ida setaa kũruabiarã́sturu.
28 Nechirua badaaɗa waa nechiruabai ɓuu, maumaarã ichi juaba trajai ɓuu ne uru ɓuai baita. Maka ichiba uru ɓuai chi nejarr barauwãe nuree aiɗai baita.
29 Beɗea kachirua berrearã́sturu. Maumaarã beɗea biáturu berreásturu waabenarã aiɗaɗai baita. Maka machi beɗea ũri nuree biꞌia panaɗai.
30 Kachirua wauduuba Dachi Akõre Jauri kĩra nomaabirã́sturu. Dachi Akõreba mau machimaa deasii ichiɗirã kuitaa panaɗamera. Ichi Jauri machi baara ɓuai aɓa Dachi Akõreba ichi ẽbẽrarã joma biꞌia ɓui ewariɗaa.
31 Machiba joma aɓau ʉ̃rʉbena sõɗe kachirua kʉ̃risiabadau, sõɗeeba kĩrubadau, oa kachirua berreabadau, kĩruɗeeba berreabadau, waabenarã ʉ̃rʉbena setaa jarabadau mauɗe waabenarã kachirua wauɗai kʉ̃risiabadau joma ida ɓústuru.
32 Sõbiaɗeeba nureásturu. Kĩra chuburia baraa nureásturu. Chi machiba kachirua waupeɗaaɗa kʉde uru ɓee ida ɓústuru, Dachi Akõreba machi kachirua Cristoɗeeba ida ɓuɗa kĩra.
