Efesios 5:1-33
5 Dachi Akõreba ichi warrarã ãrea kʉ̃ria ɓuu. Mauɗeeba machi ichi kĩra nureásturu.
2 Jomaurã kʉ̃riásturu Cristoba dachi kʉ̃ria ɓuu unubiɗa kĩra. Kʉ̃riaɗeeba dachi kakua ara ichi beabisii Dachi Akõremaa ãnimara baa dearuu kĩra. Dachi Akõreba mau biꞌia unusii.
3 Machi ẽbẽrarã Dachi Akõreɗerãɗeeba machi kakuaba barikiu kachirua wauɗaabai panuu, kĩra nejasia wauɗaabai panuu mauɗe waabenarãba uru ɓee kʉ̃riaɗaabai panuu. Mau ʉ̃rʉbena aɓau biɗa ɓistĩika biɗa berreaɗaabai panuu.*
4 Beɗea kachirua, nebʉrʉ biꞌiwãe mauɗe beɗea miadaa mia ʉibi berrearã́sturu, maka berreai biꞌiwãe ɓuuɗeeba.* Maumaarã Dachi Akõremaa biꞌia ɓuu áduru.
5 Machiba kuitaa panuu junebena wẽra ome kãibadau, ne kĩra nejasia kachirua wau nibabadau, mauɗe ne joma uru panaɗai kʉ̃riabadau chi Cristo mauɗe Dachi Akõreba deaɗai a panuu adauɗaabai. Ne joma uru ɓuu kʉ̃ria ɓuai Dachi Akõre kuenda juaba ne kapeɗaaɗaɗe ijãa ɓuu kĩra ɓuu, Dachi Akõre audeara, chi ichiba uru ɓuai kʉ̃ria ɓuu aude ijãa ɓuuɗeeba.
6 Aɓa biɗa setaɗeeba kachirua wauɗai panuu aaruubʉrã, ida setaa kũruabirã́sturu. Kachirua wau panuu baita Dachi Akõreba chi ichi beɗea ijãawẽa nuree kastikai.
7 Mauɗeeba kachirua waubadaurã ome araɓau waurã́sturu.
8 Naeɗe machi pãriuɗebena basii, maamina iɗibae Dachi Mechiu ome panuuɗeeba machi ʉ̃ɗaaɗebenarãbʉ. Mauɗeeba ʉ̃ɗaaɗebena warrarã kĩra nibásturu.
9 Ʉ̃ɗaaɗe nibaaruubʉrã sõbia nureaɗai, jipa wauɗai mauɗe biawãraɗeeba nibaɗai.*
10 Dachi Mechiuba biꞌia unu ɓuu kuitaaɗai baita jʉrʉ́sturu.
11 Pãriuɗebenarãba kachirua waubadauɗeeba ne bia neekau. Mauɗeeba araɓau waurã́sturu, maumaarã kuitaabiásturu ãchiba waubadau kachiruabʉ.
12 Biawãra dachi kĩra nejasiaɗai panuu ãchiba kachirua miru waubadau ʉ̃rʉbena berreaɗai baita.
13 Maamina ne joma ʉ̃ɗaaɗe ɓuuduuɗe saka ɓuu unubibadau,
14 ʉ̃ɗaaɗe ne joma unubadauɗeeba. Mau baita naka jarabadau:
«Ʉ̃rʉmase bichi kãi ɓuu. Kachiruaɗe biu ɓuaɗa jiraduse. Maabae Cristoba bichi ʉ̃ɗaaɗe ɓui».
15 Mauɗeeba kauwa nibásturu. Adua nuree kĩra nibarã́sturu, maumaarã kʉ̃risia kuitaaɗeeba nibásturu.
16 Machiba poyaa wauduucha biꞌia wáusturu, nau ewariɗe ẽbẽrarãba ne joma kachirua waubadauɗeeba.
17 Kʉ̃risiaswãe nuree kĩra nurearã́sturu, maumaarã ãrea kuitásturu kãare Dachi Mechiuba waubi ɓuu.
18 Ituaba biu nibarã́sturu. Mauba kachirua aude waubibarii. Biu nibaɗai audeara Dachi Akõre Jauriɗeeba nureásturu.
19 Dachi Akõre beɗeaɗe ɓʉ kuɓuu karibadau, ãbarãba karibadau mauɗe Dachi Akõre Jauriba karibi ɓuu chiya karibaɗai baita ãbua karísturu. Dachi Mechiumaa sõɗeeba karísturu biꞌia berreaɗai baita.
20 Dachi Mechiu Jesucristo trʉ̃ɗeeba ewaricha dachi Bajãaɗebena Akõremaa ne joma baita ichíturu kiɗibai ásturu.
Dachi kima ome saka nureaɗai panuu
21 Cristo wapea panuuɗeeba araɓauɗe chiya ijã́sturu.*
22 Wẽrarã kima bara nuree, machi kimarãba jara panuu ijãa panásturu, machiba Dachi Mechiu Cristo beɗea ijãa waubadau kĩra.
23 Mukĩra ichi wẽra chibaribʉ. Ara mau kĩra Cristo ichi ẽbẽrarã Chibaribʉ mauɗe ichi ẽbẽrarã ichi kakua kĩra nuree. Ichi ãchi Karibabariibʉ.
24 Cristo ẽbẽrarãba ichi beɗea ijãabadau kĩra wẽraba ichi kima beɗea joma ijãa ɓuai ɓuu.
25 Mukĩrarã wẽra bara nuree, machi wẽra kʉ̃riásturu, Cristoba dachi kʉ̃ria ɓuu unubiɗa kĩra. Kʉ̃riaɗeeba dachi baita ara ichi ida beabisii.
26 Ichiba maka wausii dachi Dachi Akõre baita biꞌia ɓui baita. Ichi beɗeaba dachi kachirua jeraasii baniaba jeraaɗa kĩra.*
27 Joma mau wausii dachi ichi baita ãrea biꞌia ɓui baita, jayoa kachiruaswãe, bibidruaswãe mauɗe barikiu kachiruaswãe. Ichiba kʉ̃ria ɓuasii dachi ichi baita biꞌia nureaɗai, kachirua jaraɗai a jaraswãe.
28 Ara mau kĩra mukĩraba ichi kima ãrea kʉ̃ria ɓuai ɓuu ara ichi kakua kʉ̃ria ɓuu kĩra. Mukĩraba ichi kima kʉ̃ria ɓuubʉrã, ara ichi kʉ̃ria ɓuu.
29 Aɓau biɗa ichi kakua kĩramaakau, maumaarã biꞌia ko ɓuuɗeeba ãrea nubarii. Ara mau kĩra Cristoba ichi ẽbẽrarã nubarii,
30 ichi kakua kĩra panuuɗeeba.*
31 Dachi Akõre beɗeaɗe naka ɓʉ kuɓuu:
«Mau baita mukĩraba chi akõre mauɗe chi nawe ɓʉipeɗa ichi wẽra ome ãbua ɓeei.Maka kakua ara aɓa ɓuu kĩra nureaɗai».*
32 Mau beɗeaba kʉ̃risia mechiu kuitaawẽa panaɗa kuitaabi ɓuu. Mʉʉba jara ɓuu Cristo ichi ẽbẽrarã ome ãbua panuuɗebena.
33 Mau ʉ̃rʉbena kuitaabi ɓumina machicha machi kima kʉ̃ria nureaɗai panuu ara machi kʉ̃ria panuu kĩra. Mauɗe wẽraba ichi kima wapeadee ɓuai ɓuu.
Notas
^ 5:3 Ɓistĩika biɗa berreaɗaabai panuu. Mau beɗea naka ɓʉ kuɓuu: Nibásturu waabenarãba aɓa biɗa poyaa jararãaɗamera machiba kachirua wau panuu.
^ 5:4 Beɗea kachirua. Chi ɓee kartaɗe naka ɓʉ kuɓuu: setaa.
^ 5:9 Ʉ̃ɗaaɗe nibaaruubʉrã. Griego beɗeaɗe chi ɓee kartaɗe ɓʉ kuɓuu: Dachi Akõre Jauriɗeeba nibaaruubʉrã.
^ 5:21 Cristo wapea panuuɗeeba. Griego beɗeaɗe chi ɓee kartaɗe naka ɓʉ kuɓuu: Dachi Akõre wapea panuuɗeeba.
^ 5:26 Griego beɗeaɗe naka ɓʉ kuɓuu: dachi kachirua jeraasii baniaba mauɗe ichi beɗeaba.
^ 5:30 Griego beɗeaɗe chi ɓee kartaɗe nau siɗa ɓʉ kuɓuu: ichi kiuru mauɗe ichi ɓʉʉrʉ kĩra panuuɗeeba.
^ Génesis 2:24.
