Hechos 1:1-26
1 Teófilo, mʉʉba chi nabena kartaɗe ɓʉsii Jesusba wau ɓuaɗa ʉ̃rʉbena mauɗe ichiba jaradea ɓuaɗa ʉ̃rʉbena,
2 aɓa Dachi Akõreba bajãaɗaa adoeruuɗaa. Bajãaɗaa wãi naeɗe Dachi Akõre Jauriɗeeba Jesusba chi ichiba bʉiɗarãmaa jaradeasii kãare wauɗai panuu. Maarã ichiba jʉrʉ adauɗa basii.
3 Jesús biusiiɗe ãchimaa ara ichi ɓes ãrea unubiasii kuitaaɗamera ichi biawãra chokae jiradusii. Mauɗe ãchimaa jaradeabachii ichiɗeeba, Dachi Akõreba ichiɗirã ichi juaɗe ua ɓuu ʉ̃rʉbena. Cuarenta ewari maka wausii.
4 Ewari aɓaɗe Jesús ãchi baara komaa ɓuasiiɗe naka jarasii:
—Jerusalén puuruɗebena ãyaa wãrã́sturu. Nama eseɗáusturu aɓa Dachi Akõreba ichi Jauri deai jaraɗa dearuuɗaa.* Mau ʉ̃rʉbena mʉʉba machimaa naeɗe jarasii.
5 Biawãra Juanba baniaba ẽbẽrarã boro easii, maamina kãꞌãabariwãeɗe Dachi Akõreba ichi Jauri machimaa deai.*
6 Maabae chi Jesús baara ãbua panaɗaba ichimaa iɗisiɗau:
—Dai Mechiu, ¿anakʉɗe bichiba dachi Israel puuru chi aude mechiu ɓuabiika, chi naa ɓuaɗa kĩra?
7 Jesusba panausii:
—Makai ewari machiba kuitaaɗaabai panuu. Aɓaburu mʉ Chacháburu kuitaa ɓuu mau ewari ɓusiiɗeeba.
8 Maamina Dachi Akõre Jauri machi baara ɓuaɗe neeruuɗe machiba ichi poyaabarii adauɗai. Mauba machiba Jerusalenɗe, joma Judea druaɗe, Samaria druaɗe mauɗe drua kaitawẽ nureeɗe mʉ ʉ̃rʉbena berreaɗai.
9 Jesusba maka jarasiiɗe Dachi Akõreba ʉtaa adoesii. Ãchiba ichia panuuɗe mau jʉ̃rʉara tãeɗe wãsii maabae makaa unuɗaabasii.
10 Wabiɗa Jesús ʉtaa wãɗamaa ichia panuuɗe, ãchi kaita ẽbẽra ome neesiɗau. Maarã paru jʉ̃ panuu torroa ãrea ɓuasii.
11 Mau ẽbẽraba naka jarasiɗau:
—Machi Galileaɗebena, ¿sakãe bajãaɗaa ichia panuma? Jesús machi baara ɓuaɗa bajãaɗaa wãɗa waya neei ichi bajãaɗaa wãɗa kĩra.*
Matías jʉrʉ adaupeɗaaɗa
12 Maabae Olivo eaɗebena Jerusalenɗaa waya wãsiɗau. Mau ea Jerusalenɗebena kilómetro aɓa ɓuu.*
13 Jerusalenɗe neeɗapeɗa de jã ʉtʉbenaɗe ãchi panabadaumaa wãsiɗau. Ãchi naarã basii: Pedro, Juan, Santiago, Andrés, Felipe, Tomás, Bartolomé, Mateo, Alfeo warr Santiago, Simón Celote mauɗe Santiago warr Judas.*
14 Joma maarã Jesús ãbarã baara, ichi nawe María mauɗe waabena wẽrarã baara ãbua duanabachiɗau Dachi Akõremaa ʉtaa iɗiɗai baita.
15 Maka panuuɗe ewari aɓaɗe Pedro chi ãbarã 120 ẽsa ʉkʉ nuɓeesii. Mauɗe jarasii:
16 «Ãbarã, nabẽraeɗe Dachi Akõre Jauriba Judasba waui ʉ̃rʉbena Davidmaa ɓʉbisii.* Dachi Akõre beɗeaɗe ɓʉ kuɓuu kĩra biawãra makai ɓuasiiɗeeba Judasba ẽbẽrarã uaɗosii Jesús jidauɗamera.
17 Judas dachiɗebena basii mauɗe dachiba waubadau ichia biɗa wau ɓuabachii».
18 (Judasba kachirua wauɗa bare chi nejarra paapeɗaaɗaba, drua nedosii. Maabae aria boroare ɓaesii maabae chi jĩsi chesii.
19 Joma Jerusalenɗebenarãba mau kuitaasiɗauɗe chi drua trʉ̃ jarasiɗau Acéldama. Mau trʉ̃ ãchi beɗeaɗe jara ɓuu «Oa Drua»).*
20 Mauɗe Pedroba jarasii: «Judas makasii Salmos kartaɗe ɓʉ kuɓuu kĩra:
“Ichi de dedumadu ɓeei. Aɓa biɗa aria panaɗaabai”.*
Mauɗe jara ɓuu:
“Ichiba wau ɓuaɗa junebenaba wau ɓeei”.*
21 »Mauɗeeba ichi kakua machiɗebena aɓa dai ome ɓeei ɓuu ẽbẽrarãmaa jarai baita Jesús biawãra chokae jiradusii. Mau ẽbẽra dachi ome ɓuai ɓuu Juanba Dachi Mechiu Jesús boro easiiɗeeɗebena aɓa Dachi Akõreba Jesús bajãaɗaa adoeɗa ewariɗaa».
22 —.
23 Mauɗe mau ẽbẽra omeɗebena aɓa jʉrʉsiɗau, ãchiɗebena aɓa adoeɗai baita. Aɓa José basii. Ichi Barsabás maebʉrã Justo abadau. Mauɗe chi aɓa Matías basii.
24 Maabae jomaurãba Dachi Akõremaa naka ʉtaa iɗisiɗau:
—Dai Mechiu, Judas bichiba bʉiɗa ɓaesii. Ichiba waui ɓuu ida ɓusii ichi ɓuai ɓuumaa wãi baita. Jomaurãba sõɗe kʉ̃risia panuu bichiba mau kuitaa ɓuu. Mauɗeeba daimaa kuitaabiáse nau ẽbẽra omeɗebena sãu jʉrʉ adauruu bichiba bʉiɗaba waubadau waumera.
25 —.
26 Maabae ne jemenesiɗau kai ɓeei kuitaa. Mauɗe Matías ɓeesii. Ara makʉɗe ichi Jesusba bʉiɗarã 11 panuu baara ãbua ɓeesii.
Notas
^ Lucas 24:49; Juan 14:26-27; Isaías 32:14-15; Joel 2:28-32.
^ 1:5 Ichi Jauri machimaa deai. Griego beɗeaɗe naka ɓʉ kuɓuu: Dachi Akõreba machi ichi Jauriba boro eai.
^ Apocalipsis 1:7.
^ 1:12 Kilómetro aɓa. Griego beɗeaɗe naka ɓʉ kuɓuu: Jerusalén kaita ɓuu, judiorã bari panabadau ewariɗe nibabadau kĩra.
^ 1:13 Santiago warr. Griego beɗeaɗe chi ɓee kartaɗe ɓʉ kuɓuu: Santiago ãba.
^ Salmos 41:9.
^ Mateo 27:3-10.
^ Salmos 69:25.
^ Salmos 109:8.
