Hechos 14:1-28
14 Iconio puuruɗe ãchiba waubadau kĩra Pablo mauɗe Bernabeba judiorã araa ãbua imibadau deɗe eɗa wãsiɗau. Ãchiba jaradea panuu kakua ãrea judiorã mauɗe griegorãba Jesusɗe ijãasiɗau.
2 Maamina judiorã Jesús ijãaɗakaurãba judiowãerãmaa chi ãbarã ʉ̃rʉbena kachirua kʉ̃risiabiasiɗau.
3 Maamina Pablo mauɗe Bernabé aria aribia panasiɗau. Dachi Mechiuba kariba ɓuu sõɗeeba ijãa panuuɗeeba ichi ʉ̃rʉbena wapeawẽa jaradeabachiɗau. Mauɗe Dachi Mechiuba ãchi aiɗasii ẽbẽrarãba ne poyaa wauɗakau wauɗamera. Maka kuitaabiasii ichi sõbiaɗeeba ãchiba jaradea panuu biawãra.
4 Maamina mau puuruɗebenarãba aꞌawaraa kʉ̃risia nureasii. Chi nuree judiorã baara panasiɗau mauɗe chi waabenarã Pablo mauɗe Bernabé baara panasiɗau.
5 Judiorã mauɗe judiowãerã chi puuruɗebena karrarã ome beɗea deasiɗau Pablo mauɗe Bernabé puꞌuabiaɗapeɗa mooba ɓata beaɗai baita.
6 Maamina mau kuitaasiɗauɗe Licaonia druaɗaa miru wãsiɗau. Listra puuruɗaa mauɗe Derbe puuruɗaa wãsiɗau. Joma mau Licaonia druaɗe nibasiɗau.
7 Aria chi beɗea bia Jesús ʉ̃rʉbena jarabachiɗau.
Listra puuruɗe panaɗa
8 Listra puuruɗe ẽbẽra chi naweba adauɗaɗeeɗebena jʉ̃rʉ bʉʉ nii ɓuasii. Maka poyaa nibaka basii.
9 Mau ẽbẽraba ũri akʉ ɓuasii Pabloba Jesús ʉ̃rʉbena berreamaa ɓuu. Pabloba maumaa ichiaruuɗe kuitaasii ichiba biawãra ijãa ɓuu Jesusba ichi poyaa aribiabii.
10 Mauɗeeba Pabloba ichimaa jĩwa jarasii:
—¡Jiraduse! ¡Jipa akʉ nuɓeese!
Ara makʉɗe ichi jĩidrupeɗa nibaɗe wãsii.
11 Pabloba wauɗa unusiɗauɗe mau puuruɗebenarãba Licaonia beɗeaɗe jĩwa jara kopaneesiɗau:
—¡Dachi Akõre ome dachimaa ẽbẽra kĩra eɗaa neesiɗau!
12 Ãchiba Bernabé Zeus abachiɗau mauɗe Pablo Hermes abachiɗau, ichi chi beɗea jarabariiɗeeba.*
13 Listra puuru kĩraare Zeus de mechiu kuɓuasii. Mamauba chi Zeus paareba paka mauɗe nepono chi puuruɗe eɗa wãbadaumaa adoesii. Ichiba mauɗe chi waabenarã baarauba mau paka baa dea kʉ̃risia panasiɗau Pablo mauɗe Bernabé baita.
14 Maamina chi Jesusba bʉiɗarã Bernabé mauɗe Pabloba mau kuitaasiɗauɗe ãchi paru anaɓari jʉ̃badau kõekuaɗapeɗa ẽbẽrarã tãeɗe pira wãɗapeɗa naka jĩwa jarasiɗau:
15 —Machiba, ¿sakãe jãka wau panuma? Dai biawãra ẽbẽrarãbʉ, machi kĩra. Machimaa jaraɗe nee panuu chi biawãe ɓee ida ɓuɗapeɗa Dachi Akõre chokae nii ijãaɗamera. Mau Dachi Akõreba bajãa, nau iujãa, mar mauɗe joma mameɗa duanuu wausii.
16 Naeɗe Dachi Akõreba ichi adua nuree puurumaa ara ãchiba wau kʉ̃ria panuu ida waubiabachii.
17 Maamina ewaricha biꞌia wau ɓuuɗeeba ichiba kuitaabi ɓuu ichi biawãra nii. Ichiba bajãaɗebena kui neebibarii mauɗe ne uu nuɓuu chaubiabarii. Maka ichiba dachi ɓi jãwaa kobiabarii mauɗe sõɗe kĩrajʉʉbiabarii.
18 Pablo mauɗe Bernabeba maka jara panasiɗamina mau ẽbẽrarãba beraa ãchimaa paka baa deasiɗau.
19 Listraɗe panuuɗe waabenarã judiorã Antioquía puuruɗebena mauɗe Iconio puuruɗebena neesiɗau.* Ãchiba Listraɗebenarãmaa Pablo ʉ̃rʉbena kachirua kʉ̃risiabiasiɗau. Mauɗeeba jomaurãba Pablo mooba ɓatasiɗau. Ichi biusii kʉ̃risiasiɗauɗeeba puuru awara erta adoesiɗau.*
20 Maabae Jesusɗe ijãabadaurã Pablomaa araa ãbua imisiɗauɗe, maka panuuɗe ichi jiradusii. Jiradupeɗa waya puuruɗaa wãsii. Norema Bernabé ome Derbe puuruɗaa wãsiɗau.
21 Derbe puuruɗe Pablo mauɗe Bernabeba chi beɗea bia Jesús ʉ̃rʉbena jarasiɗauɗe ãreaba ijãasiɗau. Mau maaɗakare Listra puuruɗaa, Iconio puuruɗaa mauɗe Antioquiaɗaa waya wãsiɗau.
22 Puurucha ãbarã aiɗabachiɗau Jesusɗe biꞌia ijãaɗamera. Ãchiba Jesusɗe ijãa panuu ida ɓurãaɗamera naka jarabachiɗau: «Ãrea biꞌiwãe panaɗai panuu, Dachi Akõre juaɗe panaɗai baita, ichiɗirã baara».
23 Puurucha ãbarã tãeɗe chi ijãabadaurã nubadaurã* ɓusiɗau. Maabae Dachi Akõremaa ʉtaa iɗiɗapeɗa, chiko koɗakau ewari wauɗapeɗa chi Dachi Mechiuɗe ijãa panuurã ichi juaɗe ɓusiɗau.
Siria druaɗe ɓuu Antioquiaɗaa waya wãpeɗaaɗa
24 Mau maaɗakare Pisidia druare wãsiɗau Panfilia druaɗaa needuuɗaa.
25 Dachi Akõre beɗea Perge puuruɗe jaradeaɗapeɗa Atalía puuruɗaa wãsiɗau.
26 Maaɗakare jãbaɗe Siria druaɗebena Antioquiaɗaa waya wãsiɗau. Mau puuruɗebena ãbarãba ãchi naeɗe bʉi panasiɗau Dachi Akõreba kʉ̃ria ɓuu wauɗamera mauɗe Dachi Akõre juaɗe ɓusiɗau ichi sõbiaɗeeba aiɗamera.
27 Neeɗapeɗa ãbarã araa ãbua imisiɗau. Mauɗe nebʉrʉsiɗau joma Dachi Akõreba ãchiɗeeba wauɗa. Jarasiɗau saka Dachi Akõreba wausii judiowãerã biɗa Jesusɗe ijãaɗamera.
28 Aria Jesusɗe ijãabadaurã baara ewari ãrea paneesiɗau.
Notas
^ 14:12 Zeus. Latín beɗeaɗe «Júpiter» abadau. Hermes. Latín beɗeaɗe «Mercurio» abadau. Chi Listra puuruɗebenarãmaarã, Zeus mauɗe Hermes Dachi Akõre kĩra nibasiɗau.
^ 14:19 Mau Antioquía Pisidia druaɗe ɓuu. Hechos 13:44-51. Iconio puuru. Hechos 14:1-6.
^ 2 Corintios 11:25.
^ 14:23 Ijãabadaurã nubadaurã. 1 Timoteo 3:1-7.
