Hechos 2:1-47
2 Mau maaɗakare Pentecostés bari panabadau ewari basii. Mauɗe joma chi Jesusɗe ijãa nuree araa ãbua duanasiɗau.*
2 Maka panuuɗe jĩwaaruu ũrisiɗau bajãaɗebena mimichia pũatu uruu kĩra. Chi deɗe jomaurãba mau jĩwa ũrisiɗau.
3 Maabae ãchi ʉ̃rʉ aoko kuɓuu kẽrame kĩra uruu unusiɗau. Mau ãchi aɓaaɓaa ʉ̃rʉ ɓeesii.
4 Mauɗe Dachi Akõre Jauriɗeeba paneeɗapeɗa beɗea didiwaraa berrea bara ɓeesiɗau, Dachi Akõre Jauriba berreabiaɗa kĩra.*
5 Pentecostés ewariɗeeba judiorã druachaɗebena chi Dachi Akõre kʉ̃ria nuree Jerusalenɗe duanasiɗau.
6 Mau jĩwa ũrisiɗauɗe ichiaɗe wãsiɗau. Mauɗe ũrisiɗau chi Jesusɗe ijãabadaurãba ãchi berreabadaucha berrea panuu. Mauɗeeba kuitaa kʉ̃risiaɗaabasii.
7 Maka kauwawẽa panuuɗe naka jarasiɗau: «¿Cha berrea panuu joma Galileaɗebenawãeka?
8 ¿Saka dachiba ara dachi berreaɗe berrea panuu ũri panuma?
9 Dachi tãeɗe Partiaɗebena, Mediaɗebena, Elamɗebena, Mesopotamiaɗebena, Judeaɗebena, Capadociaɗebena, Pontoɗebena, Asiaɗebena,
10 Frigiaɗebena, Panfiliaɗebena, Egiptoɗebena, Libia druaɗe Cirene puuru kaitaɗebena mauɗe Romaɗebena nama panuu. Dachi chi judiorã mauɗe chi griegorã judiorã kĩra panabadaurã nama panuu.
11 Mauɗe ẽbẽrarã Creta islaɗebena mauɗe Arabiaɗebena nama panuu. ¡Jomaurãba ara dachi beɗeaɗe chi Dachi Akõreba biꞌia wauɗa ʉ̃rʉbena berrea panuu ũri panuu!»
12 Mauɗeeba jomaurãba kuitaa kʉ̃risiaɗaabasiiɗeeba naka jara duaneesiɗau: «¿Nau kãare jara kʉ̃ria ɓuma?»
13 Mauɗe chi nureerãba atua jara duanasiɗau:
—Ãchi ituaba biu panuu.
Pedroba Jerusalenɗe jaradeaɗa
14 Mauɗe Pedro waabena 11 baara jiradupeɗa jĩwa jarasii:
«Machi chi judiorã mauɗe joma Jerusalenɗe nureerãba nau kuitásturu; mʉʉba jaraaruu kauwa ũrísturu.
15 Machiba kʉ̃risia panuu dai ituaba biu panuu maamina makawãe. ¡Wabiɗa dapeɗe ɓuu!*
16 Maumaarã chi daiba maka berrea panuu ʉ̃rʉbena Dachi Akõre baita berreabarii Joelba naka ɓʉsii:
17 “Dachi Akõreba naka jara ɓuu:Kaaɗebena ewariɗe mʉ Jauri joma ẽbẽrarãmaa deai.Maka machi warrarã mauɗe machi kaurã mʉʉba jarabi ɓuu kĩra berreaɗai.Mʉʉba kũudrãarã daumaa ne unubiai. Mauɗe chõrarã biɗa kamokaraaɗe maka unubiai.
18 Mau ewariɗe mʉ Jauri chi mʉ baita bari trajabadaurãmaa deai, mukĩrarãmaa mauɗe wẽrarãmaa. Mauɗe ãchiba mʉʉba jarabiaruu kĩra berreaɗai.
19 Mau ewariɗe ẽbẽrarãba ne poyaa wauɗakau bajãaɗe unubiai. Mauɗe iujãaɗe unubiakuai.Oa, aoko mauɗe nari unubiai.
20 Dachi Mechiuba nebʉra kastikai ewari neei naeɗe ʉmada kii. Mauɗe jeɗako oa bai. Mau ewari chi mechiu mia pera bai.
21 Maamina chi Dachi Mechiumaa chi chuburia iɗiiduu joma karibai”.*
22 »Machi Israelɗebenarã, nau beɗea ũrísturu: Dachi Akõreba Jesús Nazaretɗebenamaa ẽbẽrarãba ne poyaa wauɗakau mechiu machi tãeɗe waubisii. Maka wau ɓuuɗeeba Jesusba kuitaabiasii Dachi Akõre ichi ome ɓuu. Mau machiba biꞌia kuitaa panuu.
23 Dachi Akõreba naeɗe kʉ̃risia ɓuaɗa kĩra aɓaumaa Jesús machi juaɗe ida ɓubisii. Maabae machiba ẽbẽrarã kachiruarãmaa cruzɗe jiraɓu beabiasiɗau. Dachi Akõreba kuitaa ɓuasii mau joma makai ɓuu.
24 Jesús ãrea kakua puaba biusii. Maamina Dachi Akõreba ichi chokae jiradubisiiɗeeba waya biubai; chokae biukaraa nibai.
25 »Davidba ichi ʉ̃rʉbena naka jarasii:
“Mʉʉba unusii Dachi Mechiu ewaricha mʉ ome ɓuu.Ichi mʉ jua biare ɓuuɗeeba wapeawẽa ɓuu.
26 Mauɗeeba mʉ sõ kĩrajʉʉ ɓuu; mʉ ãrea kĩrajʉʉ kari ɓuu.Mʉʉba kuitaa ɓuu biurumina mʉ jirukaraayuwãe nibai.
27 Mʉʉba kuitaa ɓuu bichiba mʉ biuɗarã panabadauɗe* nuɓuubai.Mʉ, chi bichi baita bari trajabarii jipa nii ida ɓeraabiibai.
28 Bichiba mʉʉmaa chi dachi chokae ɓuabibarii o unubisii, mauɗe bichi mʉ ome ɓuuɗeeba mʉ ãrea kĩrajʉʉbii”.*
29 »Mʉ ãbarã judiorã, mʉʉba arakʉɗe jaraaruu: dachi nabẽraeɗebena David biusiiɗe mau jau ɓusiɗau. Chi jau ɓubadau dachiba wabiɗa unubadau.
30 Maamina David Dachi Akõre baita berreabarii basii. Mauɗeeba kuitaa ɓuasii Dachi Akõreba biawãraɗeeba jarasii chi ichiɗebena neeruu aɓa ichi bari israelɗebenarã rey ɓui.*
31 Makai kuitaa ɓuasiiɗeeba ichiba berreasii Dachi Akõreba Dachi Karibabarii deai jaraɗa chokae jiradui ʉ̃rʉbena.* Ichiba jarasii Dachi Akõreba mau chi biuɗarã panabadauɗe nuɓuubai mauɗe ichi chi kakua ɓeraabiibai.
32 »Davidba jaraɗa kĩra Dachi Akõreba Jesús biu ɓuaɗa chokae jiradubisii. Joma daiba mau unusiɗau.
33 Dachi Bajãaɗebena Akõreba ichi jua biare Jesús chi mechiu ɓusii. Maabae ichi Jauri deai jaraɗa Jesusmaa deasii ichiɗirãmaa deamera. Jesusba mau Jauri biawãra daimaa deasii. Machiba unu panuu mauɗe ũri panuu ichi Jauriba maka waubi ɓuu.
34 David bajãaɗaa wãabasii, Jesús wãɗa kĩra. Maumaarã ichiba naka jarasii:
“Dachi Mechiuba mʉ Mechiumaa jarasii:Mʉ jua biare akʉ ɓeese,
35 aɓa bichi kĩramaarã mʉʉba joma bichi juaɗe ɓuuruuɗaa”.*
36 »Mauɗeeba joma israelɗebenarã, biawãra kuitásturu: Jesús, chi machiba cruzɗe jiraɓubipeɗaaɗa, Dachi Akõreba mau chi jomaurã Mechiu mauɗe Dachi Karibabarii deai jaraɗa ɓusii».
37 Mau ũrisiɗauɗe joma ãchi sõɗe ãrea kʉ̃risia baraa duaneesiɗau. Mauɗeeba ãchiba Pedromaa mauɗe chi waabenarã Jesusba bʉiɗarãmaa iɗisiɗau:
—Ãbarã, ¿kãare wauɗai panuma?
38 Mauɗe Pedroba panausii:
—Kachirua ida ɓuɗapeɗa Dachi Akõremaa nésturu. Jesucristo trʉ̃ɗeeba boro eásturu. Mauɗe machiba kachirua waupeɗaaɗa Dachi Akõreba perdonapeɗa ichi Jauri machimaa deai.
39 Dachi Akõre chi Mechiuba ichi Jauri deai jaraɗa machi baita ɓuu, machi warrarã baita ɓuu mauɗe ẽbẽrarã kaitawẽ nureerã baita ɓuu.* Joma chi Dachi Akõre Mechiuba iukua ɓuu ẽbẽrarã baita ɓuu.
40 Pedro ãrea berreasii ãchiba ijãaɗamera. Naka jara ɓuasii:
—¡Dachi Mechiuba chi iɗibaebena ẽbẽrarã kachirua waubadauɗebena ãyaa wã́sturu!*
41 Ãrea ẽbẽrarãba ichi beɗea ijãaɗapeɗa boro easiɗau. Mau ewariɗe chi Jesusɗe ijãapeɗaaɗa 3.000 panasiɗau.
42 Chi Jesusba bʉiɗarãba jaradea panuu ãchiba ãrea ũribachiɗau. Ãbua biꞌia duanabachiɗau. Pan ɓʉaɗapeɗa, kobachiɗau.* Mauɗe Dachi Akõremaa ʉtaa iɗi panabachiɗau.
Chi Jesusɗe ijãabadaurãba wau panaɗa
43 Chi Jesusba bʉiɗarãba ẽbẽrarãba ne poyaa wauɗakau ãrea waubachiɗau. Mauɗeeba jomaurãba Dachi Akõre ãrea wapeasiɗau.
44 Joma chi Jesusɗe ijãa nuree ãbua biꞌia duanabachiɗau. Chi nureerãba ãchi drua mauɗe ne kaebea nedobʉiɗapeɗa chi nejarr barauwãe nureerãmaa ãchi nejarra deabachiɗau. Maka chi ãchiba uru panuuba chiya aiɗabachiɗau.
45 —.
46 Ewaricha Dachi Akõre de mechiuɗaa araa ãbua imibachiɗau mauɗe ãbarã decha kĩrajʉʉɗeeba ãbua kobachiɗau.
47 Ãchiba Dachi Akõremaa biꞌia berreabachiɗau. Mauɗe waabenarãba ãchi biꞌia unubachiɗau. Mauɗe Dachi Mechiuba ewaricha ẽbẽrarã karibabachii. Maka Dachi Akõreba ãchi ãrea bawaabiasii.
Notas
^ 2:1 Pentecostés ewari naeɗe «chi uu nuɓuu naeɗe junapeɗaaɗa bari panabadau ewari» abachiɗau. Levítico 23:15-21.
^ Hechos 1:8.
^ 2:15 Dapeɗe ɓuu. Griego beɗeaɗe naka ɓʉ kuɓuu: ewariɗakare hora õbeaɗe ɓuu.
^ Joel 2:28-32.
^ 2:27 Biuɗarã panabadauɗe. Griego beɗeaɗe naka ɓʉ kuɓuu: Hades.
^ Salmos 16:8-11.
^ 2 Samuel 7:12-13; Salmos 89:3-4; Salmos 132:11-12.
^ 2:31 Dachi Akõreba Dachi Karibabarii deai jaraɗa. Mau jara ɓuu Cristo maebʉrã Mesías.
^ Salmos 110:1; Lucas 20:41-44.
^ Ezequiel 36:23-28.
^ Ezequiel 11:19-21; 18:30-32.
^ 2:42 Pan ɓʉaɗapeɗa. Chi nureemaarã, mau chi Jesús kĩrabaɗai baita kobadau jara ɓuu. Lucas 22:19-20; Hechos 20:7; 1 Corintios 11:23-26.
