Hechos 24:1-27
24 Ewari jua aɓa baɗakare paare mechiu Ananias chi nuree judiorã chõrarã baara Cesarea puuruɗe neesiɗau. Chi aiɗa berreabarii Tértulo adoesiɗau, mauba Félix daaɗe chi Pablo jideamera.
2 Felixba Pablo eneesiɗauɗe mau Tertuloba Pablo jidea koɓeesii. Naka jarasii:
—Chi mechiu Félix, bichi dai mechiu ɓeeɗa ewariɗebena nau druaɗe ãrea baaruu jirukaraayuwãe panuu. Mauɗe bichi kʉ̃risia kuitaa niiɗeeba ne ãrea wau ɓuu dai biꞌia duanaɗamera.
3 Bichiba wau ɓuu kakua dai duanuumaacha daiba ne jomaɗe bichíturu kiɗibai abadau.
4 Maamina waa ãrea jaraamaaba, michuburia iɗiiruu bichi sõbia niiɗeeba, dai beɗea ũrimera.
5 Daiba kuitaa panuu nau ẽbẽraba nebʉra wau ɓuabarii. Ichiba joma nau druaɗe judiorã kĩrubika ɓuabiabarii. Ichi nazarenoɗebenarã chi jaradea ua ɓuabariibʉ.
6 Mau awara Dachi Akõre de mechiuɗe chi daiba wauɗaabai panuu, mau ichiba waui kʉ̃riasii. Mauɗeeba daiba ichi jidausiɗau. [Moisesba ɓʉɗaɗe jara ɓuu kĩra kastikaɗai basii.
7 Maamina kokoroarã mechiu Lisiasba ichiba kĩruɗeeba dai juakaa ẽeɓari adausii.
8 Mau awara jarasii chi mau ẽbẽra jidea panuu bichimaa neeɗai panuu.]* Bichiba ichimaa ãrea iɗiiruu kuitaai joma daiba jara panuu biawãra ɓuu.
9 Judiorã aria panuu biɗa joma mau beɗea biawãra asiɗau.
10 Maabae chi mechiuba juaba Pablomaa jarasii berreamera. Ara makʉɗe Pabloba jarasii:
—Mʉʉba kuitaa ɓuu bichi año ãrea nau druaɗebena juez nii. Mauɗeeba mʉ ara mʉ ʉ̃rʉbena kĩrajʉʉ berrearuu.
11 12 ewari basii mʉ Jerusalenɗaa wã ɓuaɗa Dachi Akõremaa biꞌia berreai baita. Bichiba barikiamaa iɗiiruu kuitaai mau biawãra ɓuu.
12 Cha mʉ kachirua jara panuuba mʉ unuɗaabasii waabena ome kĩru berrea nuɓuu maebʉrã ẽbẽrarã kĩrubika ɓuu. Dachi Akõre de mechiuɗe, judiorã araa ãbua imibadau deɗe, ne aɓa biɗa puuruɗe biɗa mʉʉba maka wau ɓuu unuɗaabasii.
13 Nau ẽbẽrarãba poyaa kuitaabiɗawẽa ãchiba jara panuu biawãra ɓuu.
14 Maamina mʉʉba bichimaa naka jaraaruu: mʉʉba Dachi Akõre nabẽraeɗebenarãɗe ijãa ɓuu. Mʉ chi O Wiɗi abadauɗebenabʉ. Ãchiba mau O Wiɗi seta ɓuu* abadau, maamina mʉʉba Moisesba ɓʉɗa mauɗe Dachi Akõre baita berreabadaurãba ɓʉpeɗaaɗa joma ijãa ɓuu.
15 Chi naarã judiorãba eseɗau panuu chi jipa nuree mauɗe chi jipawãe nuree biupeɗaaɗa Dachi Akõreba joma chokae jiradubiai. Mʉa biɗa mau eseɗau ɓuu.
16 Mauɗeeba mʉʉba ne joma waubarii Dachi Akõre daaɗe mauɗe ẽbẽrarã daaɗe jipa nibai baita.
17 »Mʉ Jerusalenɗebena ãyaa wãɗa año ãrea baɗakare, waya araa neesii, chi mʉ puuruɗebenarã chi nejarr barauwãe nureemaa chi nejarra deai baita mauɗe Dachi Akõremaa ãnimara baa deai baita.
18 Maka ɓuuɗe chi Dachi Akõre daaɗe biꞌia panaɗai baita mʉʉba joma wausiiɗe, Dachi Akõre de mechiuɗe chi Asiaɗebena judiorãba mʉ unusiɗau. Maamina ẽbẽrarã ãrea wãꞌãe basii mauɗe ẽbẽrarã kĩrubikaɗai siɗa wãꞌãe basii.
19 Chi mʉ unupeɗaaɗaba mʉ jideaɗai kʉ̃ria panuubʉrã, maarã bichi daaɗe neeɗai panuu.
20 Makawẽebʉrã cha panuurãba jaraɗai panuu kãare kachirua unusiɗau chi mechiurã daaɗe mʉ adoesiɗauɗe.
21 Aɓaburu poyaa jaraɗai mʉʉba naka jĩwa jarasii: “Iɗi machiba mʉ kachirua jara panuu chi biuɗarã chokae jiraduɗai ijãa ɓuu kakua”.*
22 Felixba chi O Wiɗi ʉ̃rʉbena ãrea kuitaa ɓuasiiɗeeba Pablo nebʉra ichiai ida ɓuɗaupeɗa, naka jarasii:
—Kokoroarã mechiu Lisias neeruuɗe mʉʉba machi nebʉra ichiai.
23 Maabae ichiba kokoroarã chi jaradea ua ɓuabariimaa Pablo nubisii, maamina jarasii chi Pabloba wau kʉ̃ria ɓuu ida waubimera. Mauɗe ida ɓusii Pablo kõpaerorãba ichi aiɗaɗe neeɗamera.
24 Mau maaɗakare Félix chi wẽra Drusila ome waya neesii. Mau wẽra judio basii.* Mauɗe Felixba Pablo iusii ichiba Jesucristoɗe ijãaɗai ʉ̃rʉbena berrea ɓuu ũrii baita.
25 Maka ɓuuɗe Pabloba dachi jipa nibai ʉ̃rʉbena, kakua jipa uru ɓuai ʉ̃rʉbena mauɗe Dachi Akõreba nebʉra kastikai ewari neei ʉ̃rʉbena berreasii. Felixba mau ʉ̃rʉbena ũrisiiɗe wapeapeɗa naka jarasii: «Jãabae wãse. Mʉ bari ɓuuɗe waya bichi iui».
26 Felixba kʉ̃risia ɓuasii Pabloba ichimaa chi nejarra deai ewa bʉimera. Mauɗeeba akabichia Pablo iubachii mau ome berreai baita.
27 Maka ɓuu año ome wãyaasii. Mau maaɗakare Félix neei baɗa june neesii chi mechiu ɓuai baita. Mau Porcio Festo abadau. Maamina mauba judiorã ome biꞌia ɓuai kʉ̃ria ɓuasiiɗeeba, Pablo jʉ̃a ɓʉisii.
