Hechos 28:1-31
28 Dai iikaa neesiɗauɗe, kuitaasiɗau mau iujãa isla ɓuu Malta abadau.
2 Chi ariabenarãba dai ãrea biꞌia irsibisiɗau. Kui che nuɓuuɗeeba mauɗe kũrasãa nuɓuuɗeeba ãchiba tʉbʉ aoko nuɓuɗapeɗa daimaa jarasiɗau tʉbʉ kãɗe neeɗamera.
3 Pabloba bakuru põasãa araa pepeɗa chi tʉbʉ aoko nuɓuuɗe jirakuasii. Maabae wãsiaba dama arabena wãaruuba Pablo juaɗe kaa jira ɓeesii.
4 Mau damaba Pablo juaɗe jiraɓu unusiɗauɗe chi mau islabiɗarãba ãchi chiya berrea bara ɓeesii: «¡Jãu ẽbẽra mia beabariibʉ! Marɗe biubasmina, Dachi Akõre kĩra nii wẽraba* ichi ida chokae nibabiibai».
5 Mauɗe Pabloba chi dama tʉbʉɗe neapetasii mauɗe ichi kachirua ɓeebasii.
6 Jomaurãba ichia duanasii Pablo ooroi kuitaa maebʉrã maka ɓuuɗe biui kuitaa, maamina maka ichia panuuɗe Pablo ɓistĩika biɗa kachiruabasii. Mauɗeeba ãchiba kʉ̃risia june kũrisiaɗapeɗa jarasiɗau Pablo dachi akõre nii.
7 Mau islaɗe chi mechiu Publio abachiɗau. Mau Publioba dai panuu kaita drua uru ɓuasii. Mauba dai ichi deɗe ewari õbea ãrea biꞌia irsibisii.
8 Maka panuuɗe Publio akõre ãmi che ɓuuɗeeba mauɗe kʉa ɓuuɗeeba kʉɗaɗe ɓuasii. Mauɗe Pabloba mau ichiaɗe wãsii. Dachi Akõremaa ʉtaa iɗipeɗa ichi jua ʉ̃rʉ kuɓupeɗa aribiabisii.
9 Mauɗeeba waabenarã ẽpermo nuree neepeɗaaɗa Pabloba aribiabiasii.
10 Mau ẽbẽrarãba dai chi mechiurã kĩra biꞌia wausiɗau. Waya jãbaɗe atausiɗauɗe dai wãꞌãe panaɗa ãchiba joma deasiɗau.
Romaɗe neepeɗaaɗa
11 Jeɗako õbea baɗakare, dai jãba Alejandría puuruɗebenaɗe atausiɗau. Mau jãba islaɗe jeɗako õbea ɓuasii kui pũatu baraa chebarii ewari basiiɗeeba. Chi jãba kũumaa Dachi Akõre kĩra juaba erapeɗaaɗa ome topanasiɗau, Romaɗebenarã akõre mechiurã Cástor mauɗe Pólux abadau.*
12 Wãaduuɗe Siracusa puuruɗe neesiɗau. Ewari õbea aria panasiɗau.
13 Mau puuruɗebena dai mar iikaa kaita wãaduuɗe Regio puuruɗe basiɗau. Norema surɗebena chi pũatu pũa koɓeesiiɗeeba, mau norema Puteoli puuruɗaa neesiɗau.
14 Aria daiba chi nuree ãbarã unusiɗau. Maarãba daimaa jarasiɗau ãchi baara 7 ewari panaɗamera.
Maaɗakare Roma puuruɗaa wãsiɗau.
15 Ãbarã Romaɗebenaba dai wãaduu ũrisiɗauɗe biꞌia irsibiɗe neesiɗau. Waabenarã Apio puuruɗaa neesiɗau mauɗe waabenarã Tres Taberna puuruɗaa neesiɗau. Pabloba maarã unusiiɗe Dachi Akõremaa ichíturu kiɗibai apeɗa, maarã kakua kĩrajʉʉsii.
16 Roma puuruɗe neesiɗauɗe chi jʉ̃a duanuu kokoroarã jaradea ua ɓuabarii juaɗe duanusii.* Ichiba Pablo du aɓa ichi deɗe ida ɓeebisii. Kokoroa aɓa ɓusii ichi nu ɓuamera.
Pabloba Romaɗe chi nuree judiorãmaa jaraɗa
17 Ewari õbea basiiɗe Pabloba Romaɗebena judiorã chi mechiurã iubiasii. Joma imisiɗauɗe Pabloba jarasii:
—Ãbarã, mʉ aɓau biɗa dachi judiorãmaa biꞌiwãe wau ɓuasmina, mauɗe dachi nabẽraeɗebenarãba waubadau kachirua berreawẽa ɓuasmina, mʉ Jerusalenɗe jʉ̃a ɓuɗapeɗa, maabae romaɗebenarã juaɗe ɓusiɗau.
18 Romaɗebenarãba mʉʉmaa ãrea iɗisiɗauɗe mʉ nebʉraswãe nii unusiɗau, mʉ beaɗai baita. Mauɗe mʉ enataɗai kʉ̃ria panasiɗau.
19 Maamina judiorãba mau kʉ̃riaɗaabasiiɗeeba, mʉʉba chi chuburia iɗisii chi Romaɗebena chi aude mechiumaa mʉ nebʉra ichiamera. Mau waubasii mʉʉba ara mʉ judiorã puuruɗebenarã jidea kʉ̃ria ɓuasiiɗeeba.
20 Mauɗeeba mʉʉba machi unu kʉ̃ria ɓuasii machi ome berreai baita. Dachi Akõreba Dachi Karibabarii deai jaraɗa joma israelɗebenarãba eseɗau panuu.* Ichi kakua mʉ naka kaenaba jʉ̃ ɓuu.
21 Mauɗe ãchiba jarasiɗau:
—Judeaɗebenarãba daimaa bichi ʉ̃rʉbena karta urubʉiɗawẽa panuu. Dachi ãbarã judiorã aɓau biɗa jãmauba neewẽa ɓuu, bichi ʉ̃rʉbena kachirua berreai baita.
22 Maamina daiba kuitaa panuu joma druacha mau kʉ̃risia wiɗi ʉ̃rʉbena kachirua berrea panuu. Mauɗeeba ũri kʉ̃ria panuu bichiba saka kʉ̃risia ɓuu.
23 Mauɗe ãchiba ewari aɓa ɓusiɗau. Mau ewari neesiiɗe ẽbẽrarã ãrea Pablo ɓuumaa neesiɗau. Dapeɗeeɗebena aɓa kewaraaɗaa Pabloba berreamaa ɓuasii Dachi Akõreba ichiɗirã ichi juaɗe ua ɓuu ʉ̃rʉbena. Moisesba ɓʉɗaɗeeba mauɗe Dachi Akõre baita berreabadaurãba ɓʉpeɗaaɗaɗeeba jaradea ɓuasii Jesusɗe ijãaɗamera.
24 Pabloba jaraɗa chi nureeba ijãasiɗau, maamina waabenarãba ijãaɗaabasii.
25 Mauɗeeba kĩru berreaɗapeɗa wãuriiduu basii. Mauɗe Pabloba naka jarasii:
—Dachi Akõre Jauriba machi nabẽraeɗebenarãmaa biawãra beɗea Dachi Akõre baita berreabarii Isaiasɗeeba naka jarasii:
26 “Naarã puurumaa naka jaraɗe wãse:
Machiba ũri panumina kuitaaɗaabai. Ãrea unu panumina kuitaaɗaabai.
27 Ãchiba sõɗeeba poyaa kuitaaɗawẽe mauɗe kʉʉrʉ kiape nureeɗeeba ũriɗawẽe mauɗe dauba biꞌia unuɗawẽe.
Maka duanuuwãe basirã, unuɗai basii, ũriɗai basii mauɗe sõɗeeba kuitaaɗai basii.
Maabae mʉʉɗe ijãaɗapeɗa mʉʉba ãchi aribiabiai basii”.*
28 »Jãu kuitásturu: Dachi Akõreba dachi karibai ʉ̃rʉbena jara nuree judiowãerãmaa bʉisii. Ãchiba mau biꞌia ũriɗai.
29 Pabloba maka jarasiiɗe judiorã ãchi du aɓa kĩru berrea panuu ãyaa wãurisiɗau.*
30 Mau maaɗakare Pablo año ome Romaɗe ɓuasii. Chi de chibarimaa chi nejarra deabachii aria ɓuai baita. Chi ichi ichiaɗe wãaduu joma biꞌia irsibibachii.
31 Ichiba wapeawẽa berreabachii Dachi Mechiu Jesucristoɗeeba, Dachi Akõreba ichiɗirã ichi juaɗe ua ɓuu ʉ̃rʉbena. Mauɗe aɓau biɗa ichimaa makarã́baɗe aɗaka basii.
Notas
^ 28:4 Dachi Akõre kĩra nii wẽraba. Chi Maltaɗebenamaarã, mau chi «Dachi Nebʉra Jipa Ichiabarii» Dachi Akõre kĩra nii wẽra abachiɗau.
^ 28:11 Chi nuree kartaɗe naka ɓʉ kuɓuu: Dióscuros. Mau jara ɓuu mau ome dachi akõre mikisu basii. Mau ewariɗe ẽbẽrarãba ãchi Dachi Akõre kĩra juaba kapeɗaaɗa jãba kũɗe waubachiɗau.
^ 28:16 Chi jʉ̃a duanuu kokoroarã jaradea ua ɓuabarii. Griego beɗeaɗe chi ɓee kartaɗe mau wãꞌãe.
^ 28:20 Griego beɗeaɗe nau siɗa jara ɓuu: Mʉʉba ijãa ɓuu biuɗarã chokae jiraduɗai joma israelɗebenarãba ijãa panuu kĩra. Hechos 23:6; 24:15; 26:6-8.
^ Isaías 6:9-10.
^ 28:29 Griego beɗeaɗe chi ɓee kartaɗe mau versículo wãꞌãe.
