Hechos 5:1-42
5 Mauɗe ẽbẽra Ananías abadau ɓuasii.* Ichi wẽra Safira abachiɗau. Maarã biɗa drua nedobʉisiɗau.
2 Maamina Ananías chi wẽra ome beɗea deasiɗau chi nejarra joma deabai baita. Maka Ananiasba chi nejarrɗebena ɓaꞌãraburu chi Jesusba bʉiɗarãmaa deasii, mauɗe chi ʉ̃rʉ ɓeeɗa uru ɓeesii.
3 Pedroba jarasii:
—Ananías, ¿Sakãe Satanasba waubi ɓuu kĩra wausma? Bichiba Dachi Akõre Jaurimaa setaa jaraaruu. Bichi drua nedobʉiɗaɗebena chi nejarr ɓaꞌãra uru ɓeeruu.
4 Jãu drua nedobʉi naeɗe ¿bichiɗiwãe baska? Nedobʉiɗakare chi nejarra siɗa ¿bichiɗiwãe baska? Joma deai kʉ̃riabasiibʉrã ¿sakãe jãka bichi sõɗe setaa waui kʉ̃risiasma? Bichiba ẽbẽrarãmaa setaa jaraabasii, maumaarã Dachi Akõremáburu setaa jarasii.
5 Mau ũrisiiɗe Ananías jeeɗa biu ɓaesii. Chi aria duanaɗaba mau unusiɗauɗe, ãrea perasiɗau.
6 Maabae chi nuree kũudrãarãba chi biuɗa paruba bʉraɗapeɗa, adoeɗapeɗa maabae jau ɓusiɗau.
7 Hora õbea baɗakare Ananías wẽra Safira eɗa wãsii, chi kima biuɗa adua.
8 Pedroba maumaa iɗisii:
—Mʉʉmaa jarase ¿Biawãraka machiba nau chi nejarr bare drua nedobʉisiɗau?
Safiraba panausii:
—Maerã, ara mau kĩra nedobʉisiɗau.
9 Mauɗeeba Pedroba jarasii:
—Machi ¿sakãe setaa wauɗai baita beɗea deasiɗama Dachi Mechiu Jauriba saka waui kuitaai baita? ¡Ichiáse! Bichi kima jau ɓuɗe wã panaɗa jari uruuduu. Jãabae bichi siɗa jau ɓuɗe adoeɗai.
10 Ara mau jaraaruuɗe Safira biu ɓaesii Pedro jʉ̃rʉ jãkaa. Kũudrãarã eɗa needuuɗe unusiɗau ichi biu nuɓuu. Mauɗe awara adoeɗapeɗa chi kima jãkaa jau ɓusiɗau.
11 Mauɗeeba ãbarã mauɗe joma mau ʉ̃rʉbena kuitaapeɗaaɗarã pera bara ɓeesii.
Jesusɗe ijãabadaurãba ẽbẽrarã ãrea aribiabiapeɗaaɗa
12 Mau ewariɗe Jesusba bʉiɗarãba ẽbẽrarãba ne poyaa wauɗakau ãrea waubachiɗau. Maka kuitaabiasiɗau Dachi Akõre ãchi ome ɓuaɗa. Makaeɗe chi Jesusɗe ijãabadaurã joma ãbua neesiɗau Dachi Akõre de ãbudare Salomón abadauɗe.
13 Chi waabenarã wapeaba maarã baara araa ãbua imiɗakabasii. Maamina jomaurãba maarã ʉ̃rʉbena biꞌia berreabachiɗau.
14 Aude maucha Dachi Mechiuɗe ijãaduu ãrea neesiɗau, mukĩrarã mauɗe wẽrarã.
15 Jesusba bʉiɗarãba ẽbẽrarãba ne poyaa wauɗakau ãrea wau panuuɗeeba ẽbẽrarãba ãchi ẽpermo nureerã oɗe jira adoebadauɗe adoebachiɗau, Pedro wãaruu niiɗe, ichi jauriba ãchi ʉ̃rʉ borooruba aribiabimera.
16 Mauɗe Jerusalén kaita puuruɗebenarãba ẽpermo nureerã ãrea eneebachiɗau mauɗe ãchi kakuaɗe jai kachirua nuree miru ɓee siɗa eneebachiɗau. Maabae maarã joma aribiabiabachiɗau.
Chi Jesusba bʉiɗarã jʉrʉpeɗaaɗa biꞌiwãe paneebiaɗai baita
17 Chi paare mechiuba mauɗe saduceorã chi ichi baara duanaɗaba chi Jesusba bʉiɗarã jiwaa kopaneesiɗau.
18 Mauɗeeba chi Jesusba bʉiɗarã jidauɗapeɗa jʉ̃a bʉikasiɗau.
19 Maamina ara mau ẽsabuɗe Dachi Mechiuɗe angelba chi poraa ewapeɗa ãchi awara bʉikasii. Maabae jarasii:
20 «Dachi Akõre de mechiuɗaa wãɗapeɗa chi chokae ɓuai chiwiɗi ʉ̃rʉbena ẽbẽrarãmaa jarásturu».
21 Maka ũriɗapeɗa norema dapeɗe maarã Dachi Akõre de mechiuɗe eɗa wãsiɗau maabae jaradea kopaneesiɗau.
Maumisa mau paare mechiuba mauɗe ichi baara panaɗaba iuɗe bʉisiɗau joma chi Israelɗebenarã chõrarã araa ãbua imiɗamera mauɗe berreaɗamera. Maabae chi Jesusba bʉiɗarã chi ẽbẽra jʉ̃abadaumarebena adaubiasiɗau.
22 Maamina chi mau de nubadaurãba aria jʉrʉɗe wãsiɗauɗe, unuɗaabasii. Mauɗeeba waya wãsiɗauɗe naka jarasiɗau:
23 —Ichiaɗe wãsiɗauɗe, chi ẽbẽra jʉ̃abadau biꞌia jʉ̃a nuɓuasii, mauɗe chi ẽbẽra jʉ̃abadau nubadaurãba poraaɗe numaa panasiɗau. Maamina chi poraa ewasiɗauɗe, aɓa biɗa unuɗaabasii.
24 Mau ũrisiɗauɗe, Dachi Akõre de mechiu nubadaurã chi jaradea ua ɓuabariiba mauɗe chi paare mechiurãba kãare kʉ̃risiaɗai adua basii mauɗe jãabae kãare sãaima chiya maka a iɗisiɗau.*
25 Maka ɓuuɗe mukĩra aɓa neesii maabae jarakuasii:
—¡Chi machiba jʉ̃a ɓupeɗaaɗarã Dachi Akõre de mechiu duɗa ẽbẽrarãmaa jaradeamaa panuu!
26 Ara makʉɗe Dachi Akõre de mechiu nubadaurã chi jaradea ua ɓuabarii chi waabenarã nubadaurã baara jidauɗe wãɗapeɗa, wapeaba maarã kĩra jipa eneesiɗau, ẽbẽrarãba ãchimaa mokaraba ɓataɗai a kʉ̃risiasiɗauɗeeba.
27 Adoeɗapeɗa chi jaradea ua ɓuabadaurã daaɗe ʉkʉ nuɓuɗapeɗa chi paare mechiuba ãchimaa jarasii:
28 —Naeɗe daiba ãrea jarasiɗau machiba jãu ẽbẽra trʉ̃ɗeeba waa jaradearãaɗamera. Maamina machiba joma Jerusalenɗebenarãmaa jaradea panuu. Mau awara jãu ẽbẽra beapeɗaaɗa kakua, dai nebʉra baraasiɗau a jara kʉ̃ria panuu.
29 Mauɗe Pedroba mauɗe chi waabenarã Jesusba bʉiɗarãba panausiɗau:
—Ẽbẽrarãba jara panuu audeara Dachi Akõreba jara ɓuu ijãaɗai panuu.
30 Dachi nabẽraeɗebena Akõreba Jesús chokae jiradubisii.* Maamina machiba mau cruzɗe jiraɓu beabisiɗau.
31 Dachi Akõreba Jesús ichi jua biare ɓusii Dachi Mechiu mauɗe dachi Karibabarii ɓuamera. Ichiɗeeba israelɗebenarãba kachirua ida ɓuɗapeɗa waya Dachi Akõremaa poyaa neeɗai. Makarã ãchiba kachirua waupeɗaaɗa Dachi Akõreba perdonai.
32 Mau wauɗa ʉ̃rʉbena daiba jarabadau. Mauɗe Dachi Akõre Jauriba mau joma kuitaa ɓuu. Dachi Akõreba ichi Jauri deabarii chi ichiɗe ijãabadaurãmaa.
33 Judiorã mechiurãba mau ũrisiɗauɗe, ãrea kĩruɗapeɗa Jesusba bʉiɗarã kenaɗai kʉ̃riasiɗau.
34 Aria fariseo Gamaliel abadau ɓuasii. Mau Gamaliel judiorã Moisesba ɓʉɗa jaradeabarii chi mechiu basii. Jomaurãba ichi ãrea wapea panasiɗau. Gamaliel jiradupeɗa Jesusba bʉiɗarã awara wãbiaɗausii.
35 Maabae chi mechiurãmaa jarasii:
—Israelɗebena ẽbẽrarã, machiba mau ẽbẽrarã saka wauɗai ʉ̃rʉbena ãrea kʉ̃risiásturu.
36 Kĩrabásturu ãrea kãꞌãabariwãeɗe chi mukĩra Teudas abadau ichi jomaurã audeara mechiu nibai kʉ̃risiasii. Mau baara 400 mukĩrarã panasiɗau. Maamina mau mukĩra beasiɗauɗe chi baara nibapeɗaaɗa aꞌawaraa wãurisiɗau. Maabae joma ichiba waui kʉ̃risia ɓuaɗa wãꞌãesii.
37 Mau maaɗakare Romaɗebenarãba ẽbẽrarã trʉ̃ ɓʉmaa panuuɗe, Judas Galileaɗebena biɗa mau Teudas kĩra kʉ̃risiasii. Mau Judasba ẽbẽrarã ãrea ichi ome uru nibasii. Maamina Romaɗebenarãba mau beasiɗauɗe joma ichi baara nibapeɗaaɗa jĩichoasiɗau.
38 Mauɗeeba mʉʉba jaraaruu: nau ẽbẽrarã ida ɓústuru. Maarã kachirua waurã́sturu. Jãarãba ara ãchi kʉ̃risiaɗeeba jaradea panuubʉrã kãꞌãabariwãeɗe joma wãꞌãei.
39 Maamina Dachi Akõreba mau waubi ɓuubʉrã, machiba poyaaɗaabai. Kaubaa, Dachi Akõre ome chĩomaa paneeɗai.
Gamalielba jaraɗa jomaurãba ijãasiɗau.
40 Maabae Jesusba bʉiɗarã waya iusiɗau. Pebewaɗapeɗa, jarasiɗau waa Jesús trʉ̃ɗeeba ẽbẽrarãmaa berrearãaɗamera. Mau maaɗakare enatasiɗau.
41 Ara makʉɗe Jesusba bʉiɗarã judiorã mechiurãɗebena kĩrajʉʉ wãsiɗau. Kuitaa panasiɗau Dachi Akõreba ãchi biꞌia unusii ãchi Jesús trʉ̃ɗeeba biꞌiwãe panabiasiɗauɗeeba.
42 Mau maaɗakare ewaricha jaradeabachiɗau chi beɗea bia Jesús Dachi Akõreba dachi Karibabarii deai jaraɗa ʉ̃rʉbena. Mau jaradea wãbachiɗau Dachi Akõre de mechiuɗe mauɗe decha.
