Juan 10:1-42
10 Mau ewariɗe Jesusba jarasii:
«Mʉʉba biawãra jaraaruu: barikia oeja nubadaumare poraaɗe nuɓuare eɗa wãwẽebʉrã, mau kãyabãra ãyare eɗa wãaruubʉrã, mau oeja nechiruabariibʉ mauɗe ẽbẽra kachiruabʉ.
2 Maamina chi oeja nubadaumare poraaɗe eɗa wãbarii, chi oeja nubariibʉ.
3 Mau oeja nubarii baita chi poraa nubariiba chi poraa ewabarii. Oejarãba ãchi nubarii beɗea kuitaa panuu. Ãchi aɓaaɓaa trʉ̃ jarakuapeɗa awara adoebarii.*
4 Joma awara uaɗopeɗa ãchi naa wãbarii. Oeja ichi baara wãbadau ichi beɗea kuitaa panuuɗeeba.
5 Maamina ãchiba chi ẽbẽra unuɗakau baara wãɗakau, maumaarã mirubadau mau beɗea adua panuuɗeeba».
6 Jesusba nebʉrʉʉruuba maka berreasii maamina judiorãba kuitaaɗaabasii kãare jara ɓuu.
7 Mauɗeeba Jesusba naka jarasii: «Mʉʉba biawãra jaraaruu, mʉ chi oeja eɗa wãbadau poraa.
8 Mʉ neei naeɗe ãrea oeja nechiruabadaurã kĩra mauɗe ẽbẽrarã kachiruarã neebachiɗau. Maamina chi Dachi Akõreɗe ijãabadaurãba* maarã beɗea ijãaɗaabasii.
9 »Mʉ chi poraabʉ. Chi mʉʉɗeeba eɗa wãaruu kachiruaɗebena karibai. Ãrea jirukaraayuwãe ɓuai, ichiba wãꞌãe ɓuu Dachi Akõreba joma deaiɗeeba.*
10 Nechiruabarii neebarii oeja chiruai baita, beai baita mauɗe baribai baita. Maamina mʉ neesii, ẽbẽrarã ãrea chokae nibaɗamera.
11 »Mʉ oeja nubarii bia niibʉ. Chi oeja nubarii bia nii ichi oeja kakua biui ɓuu.
12 Maamina aɓaba chi nejarra kakua oeja nu ɓuaruubʉrã, usa kachirua neeruuɗe oeja duanuipeɗa miru wãi. Oeja ichiɗiwãeɗeeba biawãra nukau. Mauɗe usa kachiruaba oeja aɓa kaa adauruuɗe waabenarã jĩichoabadau.
13 Mau ẽbẽra miru wãbarii aɓa chi nejarra kakúaburu oeja nubariiɗeeba. Ichiba kʉ̃risiakau oeja biꞌia panaɗamera.
14 »Mʉ oeja nubarii biabʉ. Mʉʉɗerã kuitaa ɓuu, chi oeja nubariiba ichi oeja kuitaa ɓuu kĩra. Mauɗe maarãba mʉ kuitaa panuu.
15 Ara mau kĩra mʉ Chachaba mʉ kuitaa ɓuu mauɗe mʉʉba mʉ Chacha kuitaa ɓuu. Mʉ michi oeja kakua biui ɓuu.
16 Mʉʉba oeja june ua ɓuu nau oeja nubadaumarebenawaẽ.* Maarã siɗa mʉʉba eɗa adooi. Ãchiba mʉ beɗea ijãaɗai. Maka joma ãbua panaɗai. Mauɗe ãchi nubarii aɓa ɓuai.
17 »Mʉ Chachaba mʉ kʉ̃ria ɓuu, ara mʉ ida beabiiɗeeba. Maabae waya chokae jiradui.
18 Mʉʉba mʉ ida beabiwẽebʉrã aɓau biɗa mʉ poyaa beaɗaabai, maamina mʉ biui mʉʉba maka kʉ̃ria ɓuuɗeeba. Mʉ biupeɗa poyaa chokae jiradui. Mʉ Chachaba mʉʉmaa maka waubisii».
19 Mau beɗea ũriiduuɗe judiorã waya chiya aꞌawaraa berrea kopaneesiɗau.
20 Ãreaba jarasiɗau: «Jãu ẽbẽraba jai kachirua uru ɓuu. Jãu kĩrawãe ɓuu. ¿Sakãe jãu beɗea ũriɗaima?»
21 Maamina waabenarãba jarasiɗau: «¡Chi jai kachirua uru ɓuuba maka berreakau! Makarã ¿jai kachiruaba dau pãriu nuree aribiabibarika?»
Judiorãba Jesús ida ɓupeɗaaɗa
22 Mau ewariɗe judiorãba Jerusalenɗe kĩrajʉʉ bara ɓuabarii ewari waubachiɗau. Ãchiba kĩraba panasiɗau Dachi Akõre de mechiu ichi baita awara ɓupeɗaaɗa. Kũrasãa ewariɗe,*
23 Jesús nibasii Dachi Akõre de mechiu ãbudare, Pórtico Salomón abachiɗaumare.
24 Maka ɓuuɗe chi nuree judiorãba Jesús aɗu orroɗapeɗa iɗisiɗau:
—Aɓa ¿sakaeɗaa bichiba dai kʉ̃risia adua ua ɓuaima? Bichi Dachi Akõreba Dachi Karibabarii deai jaraɗabʉrã, daimaa aɓaeɗe jarase.
25 Jesusba panausii:
—Mʉʉba machimaa jarasii maamina ijãaɗawẽa panuu. Joma mʉ Chacha trʉ̃ɗeeba waubarii mauba arakʉɗe unubi ɓuu mʉ kai ɓuu.
26 Maamina machiba ijãaɗakau, mʉ oejarãwãeɗeeba.
27 Mʉ oejarãba mʉ mimi kauwa kuitaa panuu. Mʉʉba ãchi unubarii. Mauɗeeba ãchiba mʉ baara wãbadau.
28 Mʉʉba jãarã Dachi Akõre ome ewaricha chokae ɓuabiabarii. Ewari aɓa biɗa wãꞌãeɗaabai mauɗe aɓau biɗa mʉ juaɗebena poyaa juakaa adauɗaabai.
29 Mʉ Chachaba jãarã mʉʉmaa deasii. Ichi jomaurã audeara chi mechiu nii.* Aɓau biɗa ãchi mʉ Chacha juaɗebena poyaa juakaa adauɗaabai.
30 Mʉ, mʉ Chacha ome araɓau niɗau.
31 Mauɗeeba judiorãba waya mo adoesiɗau ichi ɓata beaɗai baita.
32 Mauɗe Jesusba jarasii:
—Mʉ Chachaɗeeba ãrea ne bia machimaa unubiasii. ¿Sãu ne bia wauɗa kakua mʉ mooba ɓata beaɗaima?
33 Judiorãba panausiɗau:
—Daiba bichi mooba ɓataɗaabai ne biꞌia wau ɓuu kakua, maumaarã ɓataɗai bichi ẽbẽra niikauɗe ara Dachi Akõre a ɓuuɗeeba. Mauba bichiba Dachi Akõre ʉ̃rʉbena kachirua jara ɓuu.*
34 Jesusba jarasii:
—Machi Moisesba ɓʉɗaɗe naka ɓʉ kuɓuu: “Mʉʉba jarasii machi dachi akõrerã”.*
35 Dachiba kuitaa panuu Dachi Akõre beɗea ewaricha biawãrabʉ. Dachi Akõreba mau ẽbẽrarãmaa “Machi dachi akõrerãbʉ” asiiɗe
36 ¿sakãe mʉʉba ichi ʉ̃rʉbena kachirua jarasii a panuma, mʉʉba bari ichi Warr a ɓuasiiɗeeba? Dachi Akõreba mʉ ara ichi báitaburu awara ɓusii mauɗe nau iujãaɗaa bʉisii.
37 Mʉ Chachaba wau ɓuu mʉʉba wauwẽa ɓuubʉrã, mʉ beɗea ijã́sturu.
38 Maamina ichiba wau ɓuu mʉʉba wau ɓuubʉrã, mʉʉba jara ɓuu kakua machiba ijãaɗawẽa panumina mʉʉba wau ɓuu kakua ijã́sturu. Maka machiba biawãra kuitaaɗai mʉ Chacha mʉ ome nii mauɗe mʉ, mʉ Chacha ome nii.
39 Mauɗe ãchiba waya Jesús jidau adoeɗai kʉ̃ria panasiɗau, maamina ãchi juakaa wãsii.
40 Mau maaɗakare Jesús waya Jordán do kĩaraa wãsii Juan chi Boro Eabariiba naeɗe ẽbẽrarã boro ea ɓuaɗamaa.* Jesús aria ɓeesii.
41 Maka ɓuuɗe ãrea ẽbẽrarã ichimaa wãbachiɗau. Ãchi chiya naka jarabachiɗau: «Juanba ẽbẽrarãba ne poyaa wauɗakau wauka basii maamina joma ichiba nau Jesús ʉ̃rʉbena jaraɗa biawãrabʉ».
42 Aria ãreaba Jesusɗe ijãasiɗau.
Notas
^ Ezequiel 34:11-31.
^ 10:8 Dachi Akõreɗe ijãabadaurãba. Griego beɗeaɗe naka ɓʉ kuɓuu: oejarãba.
^ 10:9 Griego beɗeaɗe naka ɓʉ kuɓuu: Ichi eɗa wãi, awara wãi mauɗe sirua unui.
^ 10:16 Mʉʉba oeja june ua ɓuu nau oeja nubadaumarebenawaẽ. Mau berreaɗeeba Jesusba jara ɓuasii judiowãerã biɗa ichiɗe ijãaɗai.
^ 10:22 Judiorãba mau ewari Janucá abadau. Añocha diciembreɗe waubadau. Kĩrababadau Judas Macabeo abadauba Dachi Akõre de mechiu waya biꞌia ɓuɗa. Makasii 164 años Jesús ɓuai naeɗe.
^ 10:29 Mau griego beɗeaɗe arakʉɗe ɓuuwãe. Waabenarãmaarã naka jara ɓuu «Mʉ Chachaba mʉʉmaa deaɗa ne joma kãyabãra chi mechiu ɓuu».
^ Levítico 24:14-16.
^ Salmos 82:6.
^ Juan 1:28.
