Juan 13:1-38
13 Pascua ewari bai naeɗe Jesusba kuitaa ɓuasii ichi ewari neeruu. Kuitaasii nau iujãa ɓʉipeɗa ichi Akõremaa wãi. Jesusba joma ichiɗirã nau iujãaɗe nuree ãrea kʉ̃ria ɓuasiiɗeeba ichiba mau kʉ̃ria unubiasii aɓa ichi biuruu ewariɗaa.
2 Ẽsabuɗaa baaruuɗe komaa panasiɗau. Mau naeɗe jʉbawãe niiba Simón warr Judas Iscariote sõɗe kʉ̃risiabisii Jesús jidaubii baita.
3 Jesusba kuitaa ɓuasii ichi Akõreba ne joma ichi juaɗe ɓusii, mauɗe kuitaa ɓuasii ichi Dachi Akõreɗebena neeɗa mauɗe waya ichimaa wãi ɓuu.
4 Maamina ãchi kewaraa komaa panuuɗe jiradupeɗa ichiba anaɓari jʉ̃barii ẽesii. Maabae kakua poabarii adaupeɗa kʉrrɗe jʉ̃sii.
5 Kuuruɗe bania jui adaupeɗa ichi baara nibabadaurã jʉ̃rʉ jeraasii. Ãchi aɓaaɓaa jeraapeɗa ãchi jʉ̃rʉ mauɗe chi kakua paru poabibariiba poakuasii.
6 Jesusba Simón Pedromaa neeruuɗe Pedroba jarasii:
—Mʉ Mechiu, ¿bichiba mʉ jʉ̃rʉ jeraaruka?
7 Jesusba panausii:
—Mʉʉba wau ɓuu bichiba anakʉɗe kuitaawẽebʉrã maamina jãaɗakare kuitaai.
8 Maamina Pedroba jarasii:
—Mʉ jʉ̃rʉ bichiba ewari aɓa biɗa jeraabai.
Jesusba jarasii:
—Mʉʉba bichi jʉ̃rʉ jeraawẽebʉrã, bichi mʉʉɗewãe.
9 Mauɗeeba Simón Pedroba jarasii:
—Maka ɓuubʉrã, mʉ Mechiu, mʉ jʉ̃rʉ́turu jeraarã́se, ¡maumaarã mʉ jua mauɗe mʉ boro siɗa jeraase!
10 Mauɗeeba Jesusba jarasii:
—Ẽbẽra kuiɗakare ichi jʉ̃rʉ waa jeraabai ɓuu ichi kakua joma biꞌia jeraasiiɗeeba. Machi joma jeraa nuree, maamina aɓa jeraawẽa ɓuu.
11 Jesusba kuitaa ɓuasii kaiba ichi jidaubii ɓuu. Mauɗeeba jarasii: «Aɓa jeraawẽa ɓuu».
12 Ãchi jʉ̃rʉ jeraakuasiiɗe Jesusba waya ichi anaɓari jʉ̃barii jʉ̃sii. Maabae waya kobadaumare akʉ ɓeepeɗa jarasii:
—¿Kuitaasiɗaka sakãe mʉʉba machi jʉ̃rʉ jeraasii?
13 Machiba mʉʉmaa “mʉ Jaradeabarii” abadau mauɗe “mʉ Mechiu abadau”. Biawãra arakʉɗe jara panuu, mʉ maka niiɗeeba.
14 Mʉ chi Mechiuba mauɗe machimaa Jaradeabariiba, machi jʉ̃rʉ jeraasiiɗeeba machia biɗa chiya jʉ̃rʉ jeraaɗai panuu.
15 Mʉʉba jãka unubiasii machi chiya aiɗaɗamera.
16 Mʉʉba biawãra jaraaruu: Chi chibari baita bari trajabarii aɓa biɗa ichi chibari audeara mechiu niiwãe. Chi ichi bʉiɗa chi bʉiɗa audeara mechiu niiwãe. Bari trajabariiba waubarii kĩra mʉʉba waubariiɗeeba, machia biɗa ara mau kĩra wauɗai panuu.
17 ¿Ũrisiɗaka? Maka wauduubʉrã biawãra biꞌia panaɗai.
18 »Mʉʉba mau joma machimaa jarawẽa ɓuu, mʉʉba jʉrʉ adauɗarã saka nuree kuitaa ɓuuɗeeba. Dachi Akõre beɗeaɗe ɓʉ kuɓuu kĩra biawãra makamera mʉʉba jaraaruu: “Chi mʉ baara ko ɓuaɗa mʉ kĩramaa ɓeesii”.*
19 Mʉʉba anakʉɗe mau jaramaa ɓuu mau makai naeɗe, biawãra makaaruuɗe machiba Mʉʉɗe ijãaɗamera.*
20 Mʉʉba biawãra jaraaruu: mʉʉba bʉiruu aɓauba biꞌia irsibiiruubʉrã mʉ biꞌia irsibiiruu. Mauɗe mʉ biꞌia irsibiiruuba mʉ bʉiɗa biꞌia irsibiiruu».
Jesusba Judas ʉ̃rʉbena jaraɗa
Mateo 26:20-25; Marcos 14:17-21; Lucas 22:21-23
21 Maka jarapeɗa Jesús ãrea kĩra nomaa ɓeesii. Maabae jarasii:
—Mʉʉba biawãra jaraaruu: aɓa machiɗebenaba mʉ jidaubii.
22 Ichi baara nibabadaurã ãchi chiya ichia bara ɓeesii, Jesusba sãu jaraɗa adua panuuɗeeba.
23 Maarãɗebena aɓa chi Jesusba ãrea kʉ̃riabarii, ichi jãkaa akʉ ɓuasii.*
24 Simón Pedroba dauɗuba jara kuɓuuba, maumaa jarasii Jesusmaa kai ʉ̃rʉbena jara ɓuu iɗimera.
25 Maabae chi Jesús jãkaa akʉ ɓuuba iɗisii:
—Dai Mechiu, ¿kaiba bichi jidaubiima?
26 Jesusba panausii:
—Mʉʉba pan paratuɗe sũrapeɗa dearuu, mau ichibʉ.
Ara makʉɗe pan sũrapeɗa Jesusba Simón Iscariote warr Judasmaa deasii.
27 Judasba mau koɗakare Satanás juaɗe ɓeesii. Mauɗe Jesusba Judasmaa jarasii:
—Bichiba waui ɓuu isa wause.
28 Maamina chi komaa panuuba kuitaaɗaabasii Jesusba sakãe maka jarasii.
29 Judasba ãchi chi nejarra pebadau ũabisa uru ɓuabachii. Mauɗeeba waabenarãba kʉ̃risiasiɗau Jesusba chi bari panabadau ewari baita nedobʉimera jarasii maebʉrã chi nejarr barauwãe nureerãmaa deaɗe wãmera.
30 Judasba chi pan adaupeɗa ara makʉɗe awara wãsii. Mau ẽsabuɗaa ba ɓuasii.
Jesusba waubi ɓuu beɗea wiɗi
31 Judas wãɗakare Jesusba jarasii:
—Jãabáeburu Dachi Akõreba unubiai mʉ, chi Ẽbẽra Ba Ɓuaɗa chi mechiu nii. Mau awara mʉʉɗeeba Dachi Akõreba unubii ichi chi mechiu nii.
32 Mʉ, chi Ẽbẽra Ba Ɓuaɗaba Dachi Akõre chi mechiu nii unubiiruu, Dachi Akõreba mʉ araɓauɗe chi mechiu unubii. Ichiba kãꞌãabariwãeɗe mau unubii.
33 Machi mʉ warrarãɗeeba mʉʉba jaraaruu: mʉ machi baara kãꞌãa ɓuabai. Mʉʉba judiorã mechiurãmaa jaraɗa kĩra jãabae anakʉɗe machimaa jaraaruu: machiba mʉ jʉrʉɗai, maamina mʉ wãaruumaa poyaa wãɗaabai.*
34 »Mʉʉba waubi ɓuu beɗea wiɗi machimaa jaraaruu: ãrea kʉ̃ria nureásturu.* Mʉʉba machi ãrea kʉ̃ria ɓuu kĩra machi siɗa araɓauɗe chiya kʉ̃riásturu.
35 Maka chiya kʉ̃ria duanuubʉrã, jomaurãba kuitaaɗai machi mʉ baara nibabadau».
Jesusba jaraɗa Pedroba ichi unukau ai
Mateo 26:31-35; Marcos 14:27-31; Lucas 22:31-34
36 Simón Pedroba Jesusmaa iɗisii:
—Dai Mechiu, ¿bichi samaa wãima?
Mauɗe Jesusba panausii:
—Anakʉɗe mʉ wãaruumaa bichi poyaa wãabai, maamina jãaɗakare mʉ kaaɗe wãi.
37 Pedroba iɗisii:
—Dai Mechiu, ¿sakãe mʉ bichi baara poyaa wãabaima? Mʉ bichi baita biui ɓuu.
38 Mauɗe Jesusba jarasii:
—¿Bichi mʉ baita biawãra biui ɓuka? Mʉʉba biawãra jaraaruu: eterr birui naeɗe bichiba ɓes õbea mʉ unukau ai.
Notas
^ Salmos 41:9.
^ Isaías 43:10.
^ 13:23 Ichi jãkaa akʉ ɓuasii. Griego beɗeaɗe ɓʉ kuɓuu: Jesús pechumaa sĩu akʉ kuɓuu. Judiorã Pascua ewariɗe maka kobachiɗau. Aɓa chi Jesusba ãrea kʉ̃riabarii. Juanba ara ichi maka jarabachii.
^ Juan 7:33; 8:21.
^ 13:34 Mʉʉba waubi ɓuu beɗea wiɗi. Dachi Akõreba waubi ɓuu beɗea chi chõra unubadau: Levítico 19:18; Deuteronomio 6:5.
