Juan 2:1-25
2 Ewari õbea baaruuɗe miakãiduu kĩrajʉʉ bara ɓuabarii ewari basii Caná puuru Galilea druaɗe. Jesús nawe aria ɓuasii.
2 Jesús mauɗe chi baara nibabadaurã iusiɗau mau miakãiduumaa neeɗamera.
3 Maka panuuɗe uva ɓaa wãꞌãesiiɗeeba chi naweba Jesusmaa jarasii:
—Uva ɓaa wãꞌãesii.
4 Mauɗe Jesusba jarasii:
—Dana, ¿Sakãe bichiba mʉʉmaa naka jara ɓuma? Mʉ ewari neewẽa ɓuu.*
5 Maamina Jesús naweba chi chiko deaɗaka panuumaa jarasii:
—Ichiba jaraaruu joma wáusturu.
6 Aria kuuru mo uyapeɗaaɗa 6 topanasiɗau. Judiorãba mau maka uyabadau, Dachi Akõre daaɗe biꞌia topanaɗamera. Kuurucha 20 maebʉrã 30 galón uru panaɗai ɓuasii.*
7 Mauɗe Jesusba chi ne deaɗaka panuumaa jarasii:
—Nau kuuru baniaba waabirubísturu.
Ara makʉɗe waabirubisiɗau.
8 Maabae Jesusba jarasii:
—Jãu ɓaꞌãra juiɗapeɗa, maabae chi uva ɓaa deaɗaka panuu mechiumaa adoésturu.
Ara makʉɗe makasiɗau.
9 Maabae uva ɓaa deaɗaka panuu jaradea ua ɓuabariiba mau bania baɗa do chaasiiɗe adua ɓuasii sama juisiɗau. Chi deaɗaka panúburu kuitaa panasiɗau. Chi uva ɓaa deaɗaka panuu jaradea ua ɓuabariiba chi mukĩra miakãimaa ɓuu iupeɗa jarasii:
10 —Miakãibadau ewari wauduuɗe, jomaurãba uva ɓaa chi aude biꞌia ɓuu naa deaɗakabadau. Maka chi iuɗarãba ãrea dopeɗaaɗakare, chi uva ɓaa ãrea balewẽa ɓuu deaɗakabadau. Maamina bichiba uva ɓaa chi aude biꞌia ɓuu mera uru ɓuaɗa jãabae deaɗakaaruu.
11 Mau ẽbẽrarãba ne poyaa wauɗakau naeɗe wauɗa Jesusba Caná puuruɗe Galilea druaɗe wausii. Mauɗebena ichi chi Mechiu unubisii. Maka ichi baara nibabadaurãba ichi biawãra ijãasiɗau.
12 Mau maaɗakare Jesús Capernaum puuruɗaa wãsii. Ichi nawe, ichi ãbarã mauɗe ichi baara nibabadaurã ichi baara ãbua wãsiɗau. Aria ãrea panaɗaabasii.
Jesusba ne kaebea nedobʉibadaurã duabʉikaɗa
Mateo 21:12-13; Marcos 11:15-18; Lucas 19:45-46
13 Judiorã Pascua* ewari ʉ̃rʉ ba ɓuasii. Mauɗeeba Jesús Jerusalenɗaa wãsii.
14 Aria Dachi Akõre de mechiuɗe wãbariimare paka, oeja mauɗe paloma nedobʉibadaurã unusii. Mauɗe chi drua ãyarebena nejarra eneeduu nedobʉibadaurã mesaɗe akʉ panuu unusii.
15 Maka unusiiɗe, Jesusba soa jʉ̃kara aɓa wau adaupeɗa, maabae awara joma duabʉikasii ãchi oeja mauɗe paka baara. Chi nejarra nedobʉibadaurã ãchi sẽetao ʉrikuasii mauɗe chi mesa jãwarikuapeɗa,
16 maabae chi paloma nedobʉibadaurãmaa jarasii:
—Chi ne kaebea joma ãyaa adoésturu. Chacha de ne kaebea nedobʉibadau de waurã́sturu.
17 Mauɗe ichi baara nibabadaurãba kĩrabasiɗau Dachi Akõre beɗeaɗe naka ɓʉ kuɓuu: «Bichi de mechiu mʉʉba ãrea kʉ̃ria ɓuuɗeeba mʉ biui».*
18 Maka ɓuuɗe paare mechiurã aria panasiɗau. Maarãba Jesusmaa jarasiɗau:
—Daimaa unubiáse Dachi Akõreba bichimaa jãka waubi ɓuu.
19 Jesusba panausii:
—Nau de mechiu ãriiduubʉrã, mʉʉba ewari õbeaɗe waya waui.
20 Mauɗe paare mechiurãba jarasiɗau:
—Nau Dachi Akõre de mechiu 46 año ba ɓuasii joma wauɗai baita. Mau bichiba ¿saka ewari õbeaɗe joma waui a ɓuma?
21 Jesusba nau de mechiu asiiɗe ara ichi ʉ̃rʉbena jara ɓuasii.
22 Ichi chokae jiradusiiɗe ichi baara nibabadaurãba kĩrabasiɗau ichiba maka jaraɗa baɗa. Mauɗe ãchiba Dachi Akõre beɗeaɗe ɓʉ kuɓuu mauɗe Jesusba jaraɗa biawãra ijãasiɗau.
Jesusba ẽbẽrarã saka nuree kuitaaɗa
23 Judiorã Pascua ewariɗe Jesús Jerusalenɗe ɓuasii. Mauɗe ãrea ẽbẽrarãba ne poyaa wauɗakau wausiiɗe, ãreaba ichiɗe ijãasiɗau.
24 Maamina Jesusba jomaurã kʉ̃risia kuitaa niiɗeeba ijãabasii ãchiba biawãra ijãa panuu.
25 Jomaurã sõ kuitaa niiɗeeba aɓau biɗa ichimaa ẽbẽrarã saka nuree jaraɗaabai panasiɗau.
Notas
^ 2:4 Mʉ ewari. Chi nureemaarã Jesusba jara ɓuasii ichi beaɗai ʉ̃rʉbena maebʉrã chi ichiba unubiaɗa chi Dachi Akõreba Karibabarii deai jaraɗa ʉ̃rʉbena.
^ 2:6 20 maebʉrã 30 galón. Chi ɓee kartaɗe ɓʉsiɗau 80 maebʉrã 100 litros. Griego beɗeaɗe naka ɓʉ kuɓuu: metreta ome maebʉrã õbea.
^ 2:13 Pascua. Egiptoɗebena wãɗai naeɗe, judiorãba decha oeja aɓa beasiɗau maabae chi oa ãchi de poraa wãtomaa purusiɗau. Maka wausiɗau Dachi Akõreba Egiptobiɗarã kastikai ewariɗe biurãaɗamera. Jãabae Jesusba jara ɓuu ichi oeja ara ichi oa cruzɗe eaɓari wãaruu kĩra nii. Maka wausii, Dachi Akõremaa ichiɗe ijãabadaurã nau iujãa jomaɗebena kastikarãaɗamera. Éxodo 12:1-27.
^ 2:17 Griego beɗeaɗe ɓʉ kuɓuu: Bichi de mechiu mʉʉba ãrea kʉ̃ria ɓuuɗeeba mʉ baai. Salmos 69:9.
