Juan 4:1-54
4 Mau ewariɗe fariseorãba ũrisiɗau Jesusba Juan audeara ẽbẽrarã ãrea ua ɓuu mauɗe boro eakua ɓuu.
2 (Biawãra Jesusba ẽbẽrarã boro eaka basii. Ichi baara nibabadaurã́buru boro eabachiɗau).
3 Fariseorãba mau ũripeɗaaɗa Jesusba kuitaasiiɗe Judea druaɗe ɓuaɗa Galilea druaɗaa waya wãsii.
4 Maamina araa wãi baita Samaria druare wãi ɓuasii.
5 Wãaruuɗe Samariaɗe puuru Sicar abadaumaa neesii. Mau puuru Jacoba ichi warr Josemaa deaɗa drua kaita ɓuu.*
6 Aria Jacobɗe bania juibadau choɓea nuɓuasii. Ʉmada jipa baburuuɗe Jesús niiɗe kakua ãkaa ɓuasii. Mauɗeeba mau bania juibadau choɓea jãkaa akʉ ɓeesii.
7 Jesús baara nibabadaurã puuruɗaa wãsiɗau chiko nedoɗe. Maka ɓuuɗe Samariaɗebena wẽra bania juiɗe neesii. Jesusba mau wẽramaa jarasii:
—Mʉʉmaa bania dease.
8 —.
9 Maabae chi wẽraba Jesusmaa jarasii:
—Mʉ Samariaɗebena wẽrabʉ. ¿Sakãe bichi judio niiba mʉʉmaa bania iɗi ɓuma?
Mau wẽraba maka jarasii judiorãba Samariaɗebenarã kʉ̃riaɗakauɗeeba.*
10 Jesusba panausii:
—Dachi Akõreba dea ɓuu bichiba kuitaaibʉrã mauɗe cha bania iɗi ɓuu kai kuitaaibʉrã, bichiba mʉʉmaa bania iɗii basii. Maabae mʉʉba bania chokae ɓuabibarii deai basii.
11 Wẽraba jarasii:
—Nau bania iɗu nuɓuuɗe, bichiba ¿kãareba chi bania juuima? Mau chokae ɓuabibarii bania ¿bichiba samabena juiima?
12 Dai nabẽra Jacoba nau bania dachi baita ɓuisii. Nauɗebena dobachii. Ichi warrarãba, ichi ãnimara biɗa dobachiɗau. ¿Makarã bichi Jacob audeara mechiu nika?
13 Jesusba panausii:
—Barikiuba nau bania dooruubʉrã, waya obisiai.
14 Maamina chi mʉʉba dea ɓuu bania dooruubʉrã waa obisiabai. Chi mʉʉba dea ɓuu bania ichiɗe ewaricha che ɓuu mauɗe mau ẽbẽra Dachi Akõre ome ewaricha chokae ɓuai.
15 Mauɗe wẽraba jarasii:
—Maka ɓuubʉrã mau bania mʉʉmaa dease waa obisiabai baita, mauɗe waa nama bania juiɗe neebayua.
16 Mauɗeeba Jesusba jarasii:
—Bichi kima iuɗe wãpeɗa namaa nésturu.
17 Chi wẽraba jarasii:
—Mʉ kima wãꞌãe nii.
Jesusba jarasii:
—Bichiba jara ɓuu biawãrabʉ. Bichi kima wãꞌãe nii.
18 Biawãra bichiba kima jua aɓa uru ɓuasii. Mauɗe bichiba chi ʉ̃rauɗe uru ɓuu bichi kimawãe. Bichiba jara ɓuu biawãrabʉ.
19 Mauɗeeba chi wẽraba jarasii:
—Mʉʉmaarã bichi Dachi Akõre baita berreabariibʉ.
20 Dai nabẽrarãba nau eaɗe Dachi Akõremaa biꞌia berreabachiɗau, maamina machi judiorãba jarabadau ichimaa biꞌia berreaɗai panuu Jerusalenɗe. ¿Samaa wãɗai panuma Dachi Akõremaa biꞌia berreaɗai baita?
21 Jesusba panausii:
—Mʉʉba jara ɓuu ijãase. Ewari aɓa neeruuɗe machiba biawãra Dachi Akõremaa biꞌia berreaɗai. Maamina maka wauɗaabai nau eaɗe maebʉrã Jerusalenɗe biɗa.
22 Machi Samariaɗebenarã Dachi Akõremaa biꞌia berreabadamina ichi adua panuu. Dai judiorãba ichi kuitaa panuu, judiorãɗeeba Dachi Akõreba saka ẽbẽrarã karibabarii kuitaabia ɓuuɗeeba.*
23 Maamina chi ewari neei ɓuaɗa neesii. Iɗibae Dachi Akõreba kʉ̃ria ɓuu ẽbẽrarãba chi nureemarebenaɗeeba ichimaa ichi Jauriɗeeba biꞌia berreaɗai mauɗe biawãra kuitaa panuuɗeeba. Aɓa makaburu ichimaa arakʉɗe biꞌia berreaɗai.
24 Dachi Akõre jauríturu nii. Mauɗeeba ẽbẽrarãba ichimaa biꞌia berreaɗai panuubʉrã maka wauɗai panuu ichi Jauriɗeeba mauɗe biawãra kuitaa panuuɗeeba.
25 Chi wẽraba jarasii:
—Mʉʉba kuitaa ɓuu Dachi Akõreba Dachi Karibabarii deai jaraɗa biawãra neei. Mau neeruuɗe dachimaa ne joma kuitaabiai.
26 Mauɗeeba Jesusba jarasii:
—Mʉ, chi bichi ome berrea ɓuu ichibʉ.
27 Maka ɓuuɗe chi Jesús baara nibabadaurã puuruɗebena waya neesiɗauɗe Jesús wẽra nii ome berrea ɓuu unusiɗauɗe kauwa kʉ̃risiaɗaabasii. Maamina aɓau biɗa Jesusmaa iɗiɗaabasii «¿Kãare kʉ̃ria ɓuasii?» maebʉrã «¿Kãare jãu wẽra ome berrea ɓuasii?»
28 Maabae chi wẽraba ichi choko ɓuipeɗa puuruɗaa wãsii. Neepeɗa ẽbẽrarãmaa jarasii:
29 —Ichiaɗe wã́duru, chi mʉʉba unuɗa ẽbẽra. Mauba mʉʉmaa jarasii joma mʉʉba naeɗe wauɗa baɗa. ¿Mau Dachi Akõreba Dachi Karibabarii deai jaraɗawãeka?
30 Ara makʉɗe ẽbẽrarã puuruɗebena Jesús ɓuumaa wãsiɗau.
31 Maumisa Jesús baara nibabadaurãba ichimaa chi chuburia iɗi panasiɗau komera.
32 Maamina Jesusba jarasii:
—Kowẽma, mʉʉba koi baita uru ɓuu machiba adua panuu.
33 Ichi baara nibabadaurãba ãchicha jarasiɗau:
—¿Aɓauba jãumaa chi kobii enee sãaka?
34 Mauɗeeba Jesusba jarakuasii:
—Mʉ bʉiɗaba waubi ɓuu joma wau ɓuu, mau mʉ chiko kĩra ɓuu.
35 Machiba jarabadau: “Wabiɗa jeɗako kimare eseɗaui ɓuu ne uu nuɓuu junai baita”. Maamina mʉʉba jaraaruu: ichiásturu, ẽbẽrarã jãabae mʉʉmaa needuu drua uuɗa junaiɗe nuɓuu kĩra panuu.
36 Chi uu nuɓuu junaɗai ewari neesii. Uu nuɓuu junaaduu kĩra machi trajaɗai ẽbẽrarãba mʉʉɗe ijãaɗamera. Maka ãchi Dachi Akõre baara ewaricha chokae duanaɗai. Chi uu nuɓuu junabarii kĩrajʉʉbarii chi ichimaa paaduu adaui baita. Ara mau kĩra machi kĩrajʉʉɗai ẽbẽrarãba mʉʉɗe ijãaduu kakua. Chi uu nuɓuu junabarii chi uubarii ome kĩrajʉʉ panaɗai.
37 Dachiba jarabadau biawãrabʉ: “Aɓaba uui ɓuu mauɗe aɓauba junai ɓuu”.
38 Ara mau kĩra mʉʉba machi bʉikasii waabenarãba uupeɗaaɗa junaɗamera. Maarãba ãrea uupeɗaaɗa machiba bari au juna panuu.
39 Ãrea Samariabiɗarã mau puuruɗebenarãba Jesusɗe ijãasiɗau, wẽraba naka jarasiiɗeeba: «Ichiba mʉʉmaa jarasii joma mʉʉba naeɗe wauɗa baɗa».
40 Samariaɗebenarã Jesusmaa neeɗapeɗa chi chuburia iɗisiɗau ãchi baara ɓeemera. Maabae Jesús ãchi puuruɗe ewari ome ɓeesii.
41 Ichiba jaradea ua ɓuuɗe ãchi maucha ãreaba ijãasiɗau.
42 Ãchiba chi wẽramaa jarasiɗau:
—Daiba aɓaburu bichiba jaraɗa kakua ijãa panuuwãe, maumaarã ijãa panuu ichiba jaradea ɓuu ũrisiɗauɗeeba. Daiba kuitaasiɗau ichi biawãra jomaurã karibabarii.*
Jesusba Galileaɗe warr aribiabiɗa
43 Samariaɗe ewari ome ɓuapeɗa Jesús Galilea druaɗaa wãsii.
44 Mau naeɗe ichiba jarasii Dachi Akõre baita berreabarii ara ichi druaɗebenarãba wapeadee nii aɗakau.*
45 Jesús Jerusalenɗe ɓuasiiɗe Galileaɗebenarã siɗa duanasiɗau Pascua ewari wauɗai baita. Aria Jesusba ẽbẽrarãba ne poyaa wauɗakau wau ɓuu unusiɗau. Mauɗeeba ichi Galileaɗe neesiiɗe ãchiba biꞌia irsibisiɗau.
46 Galilea druaɗe ɓuuɗe Jesús waya Caná puuruɗaa wãsii ichiba naeɗe bania uva ɓaa babiɗamaa.* Maumisa Capernaum puuruɗe chi rey ome trajabarii chi mechiu ɓuasii. Chi mau warr ãrea ẽpermo ɓuasii.
47 Mauɗe ichiba ũrisii Jesús Judeaɗebena Galilea druaɗaa neesii. Ara makʉɗe Caná puuruɗaa wãsii Jesús ɓuumaa. Neepeɗa chi chuburia iɗisii ichi warr biumaa ɓuu aribiabiɗe wãmera.
48 Jesusba ichimaa jarasii:
—Machiba ẽbẽrarãba ne poyaa wauɗakau unuɗawẽebʉrã mʉʉba jara ɓuu ijãaɗaabai.
49 Maamina chi ẽbẽraba jarasii:
—Mʉ Mechiu, mʉ warr biui naeɗe isa wãɗa.
50 Jesusba jarasii:
—Deeɗaa wãse. Bichi warr aribiasii.
Chi ẽbẽraba ijãasiiɗeeba ara makʉɗe wãsii.
51 Deeɗaa neeruuɗe ichi baita bari trajabadaurãba irsibiɗapeɗa jarasiɗau:
—Bichi warr aribiasii.
52 Maabae ichiba iɗisii:
—¿Sakaeɗe maka aribiasma?
Ãchimaa panausiɗau:
—Nuiɗa ʉmada wãɗakare chi kʉamia duusii.
53 Mauɗe chi akõreba kuitaasii ara makʉɗe Jesusba bichi warr aribiasii asii. Maabae ichiba mauɗe joma ichi deɗebenarãba Jesusɗe ijãasiɗau.
54 Jesús Judeaɗebena Galileaɗaa waya neeruucha ẽbẽrarãba ne poyaa wauɗakau wau ɓuabachii. Mau ẽbẽrarãba ne poyaa wauɗakau wauɗa ɓes ome basii.
Notas
^ Génesis 33:18-20; 48:21-22; Josué 24:32.
^ 4:9 Judiorãba Samariaɗebenarã kʉ̃riaɗakauɗeeba. Griego beɗeaɗe mauba nau siɗa jara ɓuu «judiorã Samariaɗebena paratuɗe ne koɗakauɗeeba».
^ Isaías 2:2-3.
^ 4:42 Jomaurã karibabarii. Griego beɗeaɗe chi ɓee kartaɗe nau siɗa ɓʉ kuɓuu: Cristo.
^ Mateo 13:57; Marcos 6:4; Lucas 4:24.
^ Juan 2:1-11.
