Lucas 12:1-59
12 Maka panuuɗe ẽbẽra ãrea pĩchuka koɓeesii. Ãrea pĩchuka kuɓuuɗeeba waabenarã jʉ̃rʉ ʉ̃rʉ tʉabachiɗau. Mauɗe Jesusba naa ichi baara nibabadaurãmaa naka jarasii: «Fariseorã masa ẽesãabibarii kauwa panásturu. Ara ãchiba jarabadau kĩra wauɗakau.
2 Joma chi bia kauwa ũriɗawẽa panuu mera ɓuabai. Chi dachiba kauwa ũriɗawẽa panuu Dachi Akõreba biꞌia kauwa ũribiai.
3 Machiba pãriuɗe jarapeɗaaɗa ẽbẽrarãba ʉ̃ɗaaɗe joma ũriɗai. Machi deɗe waabenarã kʉʉrʉmaa jaraɗa de ʉ̃rʉʉba jĩwa jarai jomaurãba ũriɗamera.
¿Kai wapeaɗai panuma?
Mateo 10:26-31
4 »Mʉ kõpaerorã, mʉʉba machimaa jaraaruu: nau chi kakua beabadaurã wapearã́sturu, jãarãba beapeɗaaɗakare waa poyaa wauɗaabaiɗeeba.
5 Mʉʉba machimaa jaraaruu kai biawãra wapeaɗai panuu. Machiba wapeaɗai panuu nau kakua beapeɗa poyaa dachi jauri tʉbʉchia aoko kuɓuu kiikauɗaa bʉi ɓuu. Mʉʉba biawãra jaraaruu mau wapeaɗai panuu.
6 »¿Sẽetao omeeba ibana chekerã jua aɓa nedoobai ɓuka? Maamina Dachi Akõreba ibana joma nubarii.
7 Mau awara Dachi Akõreba kuitaa ɓuu machiba buɗa sãabe uru panuu. Dachi Akõre baita machi ibana ãrea audeara biꞌia nureeɗeeba wapeaɗawẽa panásturu.
Jesús kakua kĩrakayaɗaabai panuu
Mateo 10:32-33; 12:32; 10:19-20
8 »Mʉʉba nau jaraaruu: Aɓauba ẽbẽrarã daaɗe mʉʉɗe ijãa ɓuaɗe aaruuɗe, Dachi Akõre angelerã bajãaɗebena daaɗe mʉ, chi Ẽbẽra Ba Ɓuaɗaba mau mʉʉɗe ai.
9 Ara mau kĩra aɓauba ẽbẽrarã daaɗe mʉ unukau aaruuɗe, Dachi Akõre angelerã bajãaɗebena daaɗe mʉʉba mau unukau ai.
10 »Aɓauba mʉ, chi Ẽbẽra Ba Ɓuaɗa ʉ̃rʉbena kachirua berrearuubʉrã, Dachi Akõreba mau perdonai. Maamina aɓaba Dachi Akõre Jauri ʉ̃rʉbena kachirua berrearuubʉrã Dachi Akõreba mau perdonaabai.
11 »Machi mʉʉɗe ijãa panuu kakua judiorã araa ãbua imibadau deemaa adoepeɗaaɗakare, maebʉrã chi juezrã daaɗe maebʉrã chi jaradea ua ɓuabadaurãmaa jideai baita, jirukaraarã́sturu saka panauɗayu maebʉrã kãare jaraɗayu.
12 Jideaduuɗe Dachi Akõre Jauríburu machimaa kuitaabiai kãare jaraɗai panuu».
Chi nejarra barau nii ʉ̃rʉbena nebʉrʉɗa
13 Mauɗe araa imi nuɓuuɗebena aɓauba naka jarasii:
—Jaradeabarii, mʉ ãbamaa jarase dai akõreɗebena ɓeeɗa mʉʉmaa biɗa deamera.
14 Maamina Jesusba ichimaa jarasii:
—Kõpaero, ¿kaiba mʉ ɓusma machi nebʉra ichiamera?
15 Mauɗe ichiba jomaurãmaa jarasii:
—¡Kauwa panásturu! Chi nejarra uru panaɗai kʉ̃ria panarã́sturu. Barau niiɗeeba dachi chokae ɓuakau.
16 Mauɗe Jesusba naka nebʉrʉsii jaradeai baita:
«Ẽbẽra ne ãrea bara nii ɓuasii. Mau ẽbẽraba ne uuɗa ãrea chausii.
17 Mauɗeeba naka kʉ̃risiasii: “¿Mʉʉba saka wauima? Nau pe nuɓui baita de wãꞌãe”.
18 Maabae kʉ̃risiasii: “Naka waui. Mʉʉba netaa pebarii de ãripeɗa aude waiɓʉa waui. Aria eɗa ne joma mʉʉba uru ɓuu pe nuɓui.
19 Mau maaɗakare biawãra mʉ du aɓa jaraaruu: mʉʉba pe nuɓuɗa uru ɓuu año ãrea dauchia jãadua ɓuai. Jãabae ãrea kʉ̃risiaswãe ɓuai. Mʉʉba kʉ̃ria ɓuu ko ɓuai, do ɓuai mauɗe kĩrajʉʉ ɓuai”.
20 Maamina Dachi Akõreba ichimaa jarasii: “¡Bichi kʉ̃risia adua nii! Biawãra nau ẽsabuɗe bichi biui. Maabae bichiba pe nuɓuɗa uru ɓuu ¿kai baita ɓeeima?”
21 »Aɓauba nau iujãaɗebena audeara adooi kʉ̃risia ɓuubʉrã maamina Dachi Akõre ʉ̃rʉbena kʉ̃risiaswãe ɓuubʉrã, mau kĩra makai».
Dachi Akõreba ichiɗirã nubarii
Mateo 6:25-34
22 Mauɗeeba Jesusba ichi baara nibabadaurãmaa jarasii:
«Machi saka panaɗai kʉ̃risiarã́sturu, koɗai ʉ̃rʉbena mauɗe paru jʉ̃ɗai ʉ̃rʉbena.
23 Dachi chokae panaɗai dachi chiko kobadau audeara biꞌia ɓuu. Dachi kakua chi paru jʉ̃badau audeara biꞌia ɓuu.
24 Ichiásturu, ibanarãba ne uuɗakau, ne junaɗakau mauɗe ne peɗakau. Ne pebarii de siɗa wauɗakau. Maamina Dachi Akõreba ãchi kobiabarii. ¿Dachi Akõre baita machi ibana audeara biꞌia nureewãeka?
25 ¿Kai machiɗebena ãrea kʉ̃risia niiɗeeba waa chokae nibaima?*
26 Waa chokae nibaiwẽebʉrã, ¿sakãe koɗai baita mauɗe paru jʉ̃badau baita ãrea kʉ̃risiabadama?
27 »Ichiásturu nepono saka waribarii. Trajakau mauɗe paru kakau. Maamina mʉʉba jaraaruu: dachi nabẽraeɗebena rey Salomón ãrea chi nejarra barau nibasmina nepono kĩra mipitaa jʉ̃ka basii.*
28 Iɗibae sirua modeɗe unubadau. Norema baabadamina Dachi Akõreba biꞌia ponobibarii. Mauɗeeba ¿ichiba machimaa paru bibuara ɓuu deawẽka machiba mau jʉ̃ɗamera? ¿Sakãe machiba ijãaɗawẽma ichiba karibai ɓuu?
29 Mauɗeeba jʉrʉrã́sturu koɗai ʉ̃rʉbena mauɗe doɗai ʉ̃rʉbena. Mauɗe ãrea kʉ̃risiarã́sturu.
30 Joma mau nau iujãaɗebenarãba jʉrʉbadau, maamina Dachi Akõreba kuitaa ɓuu machiba kãare nista panuu.
31 Mauɗeeba machiba jʉrʉ́sturu Dachi Akõreba machi ichi juaɗe ua ɓuai, ichiɗirã baara. Mauɗe ichiba mau deai.
Ne bia bajãaɗe uru ɓuai ʉ̃rʉbena
Mateo 6:19-21
32 »Machi ãrea panuuwãemina ne wapea panarã́sturu.* Dachi Akõreba machi ichi juaɗe ua ɓuai kʉ̃ria ɓuu, ichiɗirã baara.
33 Mauɗeeba machiba uru panuuɗebena nedobʉiɗapeɗa chi nejarr barauwãe nureerãmaa deásturu. Ne bia bajãaɗe uru panaɗai baita jʉrʉ́sturu. Chi ne bajãaɗebena wãꞌãekau. Ara simiaba sĩkau mauɗe nechirurã biɗa poyaa chiruaɗakau.
34 Machiba machi sõɗeeba chi aude bibuara ɓuu kʉ̃riabadau.
Chi chibari baita bari trajabarii bia ʉ̃rʉbena
35 »Chi chibari baita bari trajabarii bia kĩra Dachi Akõreba jara ɓuu ijãa wauɗai baita panásturu.* Mau trajabarii bia niiba ʉ̃ɗaa koabarii koa uru ɓuabarii ichi chibari neeruuɗe bia berreai baita. Kãibadau kĩrajʉʉ bara ɓuabarii ewari wau panuuɗebena neepeɗa chi chibariba iuruuɗe chi ichi baita bari trajabarii bia niiba ara mauɗe deɗe eɗa wãbadau ewai.
36 —.
37 Chi chibari neepeɗa, ichi baita bari trajabadaurã chokae panuu unuubʉrã, maarã bia ichiai. Mʉʉba biawãra jaraaruu: ara mauɗe ichi chibariba chi ichi baita bari trajabarii paru jʉ̃peɗa ichi baita bari trajabadaurã chi mesaɗe akʉ ɓeebiai kobiai baita.
38 Chi ichi baita bari trajabadaurã bia nureerãba ãchi chibari nubadau ẽsabuɗe ẽsa maebʉrã ewarimaa biɗa neeruuɗe. Chi chibariba maarã nu panuu unuɗe neeruubʉrã maarã biꞌia ichiai.
39 »Nau kuitásturu: de chibariba nechiru sakaeɗe neei kuitaa ɓuaɗa basirã, kãi ɓeewẽa ɓuai basii deɗe eɗa wãbiamaaba.
40 Ara mau kĩra machi siɗa dau kuitaa panásturu machiba mʉ, chi Ẽbẽra Ba Ɓuaɗa sakaeɗe neei adua panuuɗeeba».
Trajabadaurã bia mauɗe kachirua ʉ̃rʉbena
Mateo 24:45-51
41 Pedroba Jesusmaa iɗisii:
—Dai Akõre Mechiu, ¿mau bichiba daimaa jara ɓuu kĩra, maebʉrã jomaurãmaa jara ɓuka?
42 Jesusba panausii:
—Chibari baita bari trajabariiba kʉ̃risia kuitaa ɓuuɗeeba jipa wau ɓuubʉrã, chi de chibariba chi waabenarã chibari baita bari trajabadaurã mau chibari baita bari trajabarii juaɗe ɓui chi koɗai baaruuɗe kobia ɓuamera.
43 Chibari baita bari trajabariiba maka wau ɓuu ichi chibariba unuɗe neeruubʉrã, ichi ãrea kĩrajʉʉ ɓuai.
44 Mʉʉba biawãra jaraaruu: chi chibariba joma ichiba uru ɓuu mau chibari baita bari trajabarii juaɗe ɓui.
45 Maamina mau chibari baita bari trajabariiba ichi sõɗe mʉ chibari isa neebai aaruubʉrã, mauba sĩ koɓeebarii chi chibari baita bari trajabadaurã mauɗe wẽrarã bari trajabadaurã. Mau awara kopeɗa, dopeɗa mauɗe ituaba biu nibai.
46 Aɓaeɗe ichi chibari neei kʉ̃risiaswãe ɓuuɗe ara makʉɗe neei. Mau chibari baita bari trajabarii ãrea kastikapeɗa chi ijãaɗakau nuree ome biꞌiwãe ɓui.
47 »Chi chibari baita bari trajabariiba ichiba waubi ɓuu kuitaaruubʉrã, maamina maka wauwẽebʉrã chi chibariba mau ichi baita bari trajabarii ãrea pebewai.
48 Maamina chi chibari baita bari trajabariiba aduawãe ɓuuɗeeba chi chibariba jara ɓuu biawãe wauruubʉrã mau ichi baita bari trajabarii ãrea pebewai. Biawãra Dachi Akõreba waabenarãmaa ãrea dea ɓuu ichi baita wauɗamera. Chi ãrea adoeɗarãba ichi baita ãrea wauɗai panuu.
Jesús kakua nebʉra neei ʉ̃rʉbena
Mateo 10:34-36
49 »Mʉ neesii nau drua kastikai baita.* Ara ʉ̃rauɗaa maka wauruubarã ãrea ɓuai basii.
50 Maamina mau naeɗe mʉ ãrea biꞌiwãe ɓuu.* Mauɗeeba ãrea kĩra nomaa ɓuabarii aɓa mau ewari neeruuɗaa.
51 ¿Mʉʉba ẽbẽrarã ãbua jirukaraayuwãe ɓuai baita neesii kʉ̃risia panuka? Mʉʉba jaraaruu mau baita neewẽa ɓuu, maumaarã nee ɓuu ẽbẽrarã ãbua panarãaɗamera.
52 Iɗiiɗeeba araɓau deɗebenarã mʉ baita chi kĩramaa duanaɗai. Ẽbẽrarã jua aɓa panuuɗe omeɗebena waabena õbea panuu ome chi kĩramaa duanaɗai.
53 Chi akõre chi warr ome chi kĩramaa duanaɗai. Chi warr chi akõre ome chi kĩramaa duanaɗai. Chi nawe chi kau ome chi kĩramaa duanaɗai, chi kau chi nawe ome chi kĩramaa duanaɗai. Chi pakõre chi ãyu ome chi kĩramaa duanaɗai. Mauɗe chi ãyu chi pakõre ome chi kĩramaa duanaɗai.
Ewari saka ɓuai kuitaa jaraɗa
Mateo 5:25-26; 16:1-4; Marcos 8:11-13
54 Mau awara Jesusba ẽbẽrarãmaa naka jarasii:
—Machiba jʉ̃rʉara paimaa ʉmada ɓaebariare unuuduuɗe jarabadau kui chei kuɓuu. Mauɗe biawãra kui neebarii.
55 Maamina pũaturã drua sirua wãꞌãeɗe surɗebena pũatuuruuɗe jarabadau jẽradruuruu abadau. Mauɗe ewari biawãra jẽradrubarii.
56 Machi chi setaa ẽbẽra bia nuree abadaurãba bajãa maka ichiaduuba kuitaa panumina Dachi Akõreba nau iɗibaebena wau ɓuu kuitaaɗakau.
57 »Machiba ¿sakãe poyaa kuitaaɗakau kãare jipa ɓuma?
58 Bichi chi kĩramaabariiba bichi chi juezmaa adoeruubʉrã, wãaduuɗe biꞌia berreáse ichi ome biꞌia paneeɗai baita. Maka wauwẽebʉrã, ichiba juez juaɗe ɓui. Maabae chi juezba chi nubariimaa jarai chi jʉ̃abadauɗe jʉ̃a ɓumera.
59 Mʉʉba jaraaruu: bichi jãmabena wãabai aɓa bichiba deai ɓuu chi nejarra joma dearuuɗaa.
Notas
^ 12:25 Waa chokae nibaima. Waabenarãmaarã, mau jara ɓuu «deseroa wari ɓuabai».
^ 1 Reyes 10:4-7,23-25.
^ 12:32 Machi ãrea panuuwãemina ne wapea panarã́sturu. Griego beɗeaɗe naka ɓʉ kuɓuu: Mʉ oejarã wapearã́sturu.
^ 12:35-36 Ijãa wauɗai baita panásturu. Griego beɗeaɗe naka ɓʉ kuɓuu: Kʉrr ãrea trãajʉ̃ ɓuaɗa kuɓústuru.
^ 12:49 Griego beɗeaɗe naka ɓʉ kuɓuu: Mʉ neesii tʉbʉ aoko nau druaɗaa ɓatai baita.
^ 12:50 Mʉ ãrea biꞌiwãe ɓuu. Griego beɗeaɗe naka ɓʉ kuɓuu: Mʉ wabiɗa boro eai ɓuu.
