Marcos 1:1-45
1 Nau chi beɗea bia Dachi Akõre Warr Jesucristo ʉ̃rʉbena ɓʉʉruu. Naeɗe Dachi Akõre baita berreabarii Isaiasba naka ɓʉsii:
«Chi mʉ baita beɗea jarabarii mʉʉba bichi naa bʉii bichi o jaremera.*
2 —.
3 Ẽbẽra drua sirua wãꞌãe ɓuuɗe jĩwa berrea ɓuu:“O jarésturu Dachi Mechiu biꞌia irsibiɗamera.O ichi baita jipa wirua wáusturu”».*
4 Ara mau kĩra Juan chi Boro Eabarii drua sirua wãꞌãe ɓuuɗe ẽbẽrarãmaa jaradea ɓeesii ãchi kachirua ida ɓuɗapeɗa Dachi Akõremaa neeɗamera. Ichiba jarasii maka wauduubʉrã Dachi Akõreba ãchi kachirua perdonai. Maabae boro eaɗai panuu abachii.
5 Mauɗe ẽbẽrarã Jerusalenɗebenarã mauɗe joma Judea druaɗebenarã Juanmaa wãbachiɗau. Ãchiba kachirua waupeɗaaɗa ichi daaɗe jarabachiɗau. Maabae Juanba ãchi Jordán doɗe boro eakuabachii.
6 Juanba paru camello kara wauɗa jʉ̃bachii. Kʉrrɗe ãnimara e wauɗa jʉ̃bachii.* Sisi kobachii mauɗe modeɗebena nidurr kũaɓari ɓaa dobachii.
7 Mauɗe naka jaradeabachii: «Mʉare aɓa neei chi mʉ aude mechiu nii. Mauɗeeba mʉ siniɓarikau koɓeepeɗa ichiba jʉ̃rʉɗe jʉ̃barii poyaa enai ɓuuwãe.
8 Biawãra mʉʉba baniaba machi boro easii maamina ichiba Dachi Akõre Jauriɗeeba boro eai».
Juanba Jesús boro eaɗa
Mateo 3:13-17; Lucas 3:21-22
9 Mau ewariɗe Jesús Nazaret puuruɗebena Juan ɓuumaa wãsii. Nazaret puuru Galilea druaɗe ɓuu. Jesús wãsiiɗe Juanba ichi Jordán doɗe boro easii.
10 Jesús doeɗabena wãaruuɗe bajãa ewaaruu unusii. Mauɗe Dachi Akõre Jauri paloma kĩra ichi ʉ̃rʉ neeruu unusii.
11 Bajãaɗebena mimi aɓa ũrisiɗau. Naka jarasii: «Bichi mʉ Warr chi mʉʉba kʉ̃ria inii. Bichi kakua mʉ ãrea kĩrajʉʉ ɓuu».*
Jʉbawãe niiba Jesús kachiruaɗe ɓaebii chaaɗa
Mateo 4:1-11; Lucas 4:1-13
12 Maaɗakare Dachi Akõre Jauriba Jesús drua sirua wãꞌãe ɓuuɗaa wãbisii.
13 Aria Jesús ãnimara kachirua nuree tãeɗe 40 ewari ɓuasii. Satanasba ichi kachiruaɗe ɓaebii chaa ɓuasii kachiruaɗe ɓaemera. Mauɗe angelerãba ichi aiɗabachiɗau.
Jesusba jaradea ɓeeɗa
Mateo 4:12-17; Lucas 4:14-15
14 Juan chi Boro Eabarii jʉ̃a ɓuasiiɗe Jesús Galilea druaɗaa wãpeɗa chi beɗea bia Dachi Akõre ʉ̃rʉbena jaradeabachii.*
15 Naka jarabachii: «Ewari neesii. Dachi Akõreba ichiɗirã ichi juaɗe ua ɓeei.* Machiba kachirua waubadau ida ɓuɗapeɗa mau beɗea bia ijã́sturu».
Jesusba ɓeda jidaubadaurã iuɗa
Mateo 4:18-22; Lucas 5:1-11
16 Jesús Galilea mar iikaa wãaruuɗe Simón mauɗe chi ãba Andrés unusii. Mau ẽbẽrarã ɓeda jidaubadaurã basiiɗeeba, marɗe ɓata nibasiɗau.
17 Maka panuuɗe Jesusba ãchimaa jarasii:
—Mʉ baara wã́duru. Machiba ɓeda jidaubadau kĩra mʉʉba machimaa jaradeai ẽbẽrarã mʉʉmaa eneeɗamera.
18 Ara makʉɗe ãchi ãtarraya ida ɓuɗapeɗa Jesús baara wãsiɗau.
19 Mau naabe wãaruuɗe Jesusba Santiago mauɗe chi ãba Juan unusii. Maarã Zebedeo warrarã basii. Jãbaɗe chi ãtarraya kõaɗa jʉ̃ʉkamaa panasiɗau.
20 Mauɗe Jesusba ãchi iusii ichi baara wãɗamera. Ara makʉɗe Santiago mauɗe Juanba ãchi akõre Zebedeo mauɗe chi ichi baita trajabadaurã jãbaɗe ɓʉiɗapeɗa, Jesús baara wãsiɗau.
Jesusba jai kachirua duabʉiɗa
Lucas 4:31-37
21 Maarã Capernaum puuruɗaa wãsiɗau. Maabae bari panabadau ewari bakare Jesús judiorã araa ãbua imibadau deeɗaa wãpeɗa Dachi Akõre beɗea jaradea ɓeesii.
22 Jaradea ɓuuɗe jomaurãba kuitaa kʉ̃risiaɗaabasii. Chi Moisesba ɓʉɗa jaradeabadaurã kĩra jaradeaka basii. Maumaarã ãrea kuitaa ɓuuɗeeba arakʉɗe jaradea ɓuasii.
23 Aria panuuɗe, mau judiorã araa ãbua imibadau deɗe, jai kachirua bara ɓuu ẽbẽra naka jĩwa jarasii:
24 —¡Jesús Nazaretɗebena! ¡Dai ida ɓuse! ¿Dai kenaɗe neeska?* Mʉʉba kuitaa ɓuu bichi kai: ¡Bichi Dachi Akõreba bʉiɗa!
25 Jesusba ichimaa naka jarasii:
—¡Chũpea ɓuase! Jãu mukĩra kakuaɗebena awara wãse.
26 Ara makʉɗe chi jai kachiruaba chi mukĩra wawabipeɗa, ãrea ɓiapeɗa awara wãsii.
27 Mauɗeeba jomaurãba kuitaa kʉ̃risiaɗaabasii. Ãchiba chiya iɗi kopaneesiɗau: «¿Nau kãarema? Jesusba jaradea ɓuu chi wiɗibʉ, ãrea kuitaa arakʉɗe jaradeabariiɗeeba. Chi jai kachiruarã biɗa ichiba jaraaruu ũri panuu».
28 Mauɗeeba joma Galilea druaɗe kãꞌãabariwãeɗe Jesús trʉ̃ poa koɓeesii.
Jesusba Simón Pedro pakõre aribiabiɗa
Mateo 8:14-17; Lucas 4:38-41
29 Mauɗe judiorã araa ãbua imibadau deɗebena wãɗapeɗa Simón deeɗaa wãsiɗau Jesús, Santiago mauɗe Juan. Simón ãba Andrés siɗa aria ɓuabachii.
30 Mauɗe Jesusmaa jarasiɗau Simón pakõre kʉamiaba kʉɗaɗe ɓuu.
31 Mau ɓuumaa wãpeɗa, juaɗe jidaupeɗa jiradubisii. Ara makʉɗe chi kʉamia duusii. Maabae Simón pakõreba ãchimaa kobiasii.
32 Kiusiiɗe ẽbẽrarãba barikiu ẽpermo nuree mauɗe jai kachirua uru nuree Jesusmaa adoesiɗau.
33 Puuruɗebenarã joma chi poraamare pĩchua orro nuɓeesii.
34 Mauɗe Jesusba ẽpermo nuree ãrea aribiabiasii mauɗe jai kachiruarã ãrea duabʉikuasii. Jauri kachiruarãba ichi kuitaa panaɗaɗeeba Jesusba chũpeabiabachii.
Galileaɗe jaradea nibaɗa
Lucas 4:42-44
35 Dapeɗeeɗe Jesús jiradusii. Wabiɗa pãriu ɓuuɗe ẽbẽra wãꞌãemare Dachi Akõremaa ʉtaa iɗiɗe wãsii.
36 Mauɗeeba Simonba mauɗe ichi ome panuurãba Jesús jʉrʉ panasiɗau.
37 Unusiɗauɗe jarasiɗau:
—Jomaurãba bichi jʉrʉ panuu.
38 Mauɗe Jesusba jarasii:
—Waabenarã puururãɗaa wãɗai mʉʉba aria biɗa jaradeai ɓuuɗeeba. Mʉ mau kakua neesii.
39 Maka joma Galilea druaɗe nibasii. Judiorã araa ãbua imibadau decha jaradeabachii. Ichi wãaruumaa jai kachirua duabʉikabachii.
Jesusba kakua chau nii aribiabiɗa
Mateo 8:1-4; Lucas 5:12-16
40 Maka ɓuuɗe ẽbẽra kakua chau nii Jesusmaa neesii.* Mau ẽbẽra õdarrɗe koɓeepeɗa naka chi chuburia iɗisii:
—Bichiba kʉ̃ria ɓuubʉrã, mʉ poyaa aribiabii.
41 Jesusba miichuburi nii unuɗaɗeeba ichi jua ʉ̃rʉ kuɓuuruuɗe jarasii:
—Maka wau kʉ̃ria ɓuu. ¡Aribiáse!
42 Ara makʉɗe chi kakua chau ɓuaɗa wãꞌãesii, mauɗe chi ẽbẽra anisii.
43 Mauɗe Jesusba ichimaa kĩruɗeeba jarasii:
—Bichi chi kakua aniɗa aɓaumaa biɗa jararã́se. Maumaarã judio paaremaa wãse bichi kakua aniɗa unumera. Maabae Dachi Akõre daaɗe biꞌia ɓeei baita Moisesba jaraɗa kĩra ne kaebea dease.* Maka ẽbẽrarãba kuitaaɗai bichi chi kakua biawãra aniɗa.
Maka jarapeɗa Jesusba ichi wãbisii.
44 —.
45 Maamina chi ẽbẽraba Jesusba ichi aribiabiɗa ʉ̃rʉbena jomaurãmaa nebʉrʉɗe wãsii. Mauɗeeba Jesús aɓa puuruɗe biɗa wãabai ɓuasii. Maumaarã awara nibabachii ẽbẽrarã wãꞌãemare. Maamina ẽbẽrarã puuruchaɗebena ichimaa wãbachiɗau.
Notas
^ Malaquías 3:1.
^ Isaías 40:3.
^ 1:6 Juan chi Boro Eabariiba paru jʉ̃bachii, chi nabẽra Dachi Akõre baita berreabarii Eliasba jʉ̃bachii kĩra.
^ Isaías 42:1.
^ 1:14 Beɗea bia Dachi Akõre ʉ̃rʉbena. Griego beɗeaɗe chi ɓee kartaɗe ɓʉ kuɓuu: Beɗea bia Dachi Akõreba ichiɗirã ichi juaɗe ua ɓuu ʉ̃rʉbena.
^ Daniel 2:44.
^ 1:24 ¿Dai kenaɗe neeska? Jesusba ãchi beabai basii, maumaarã ãchi kastikai basii, ewaricha biꞌiwãe panaɗamera.
^ 1:40 Jesús ewariɗe chi lepra saka ɓuasii dachiba kuitaaɗawẽa panuu. Maamina judiorãmaarã aɓa Dachi Akõréburu poyaa aribiabii ɓuasii. Números 12:9-12; 2 Reyes 5:7. Mau awara aɓauba lepra jidauruubʉrã ãyaa ɓuaɗe wãi ɓuasii. Levítico 13:45-46.
^ Levítico 14:1-32.
