Marcos 10:1-52
10 Maabae Jesús Capernaum puuruɗebena Judea druaɗaa wãsii Jordán do kĩaraa. Ẽbẽrarã ãrea waya ichimaa imisiɗauɗe ichiba waubarii kĩra ãchimaa jaradea koɓeesii.
2 Maka ɓuuɗe waabenarã fariseorã neesiɗau. Ichi kachirua berreabiɗai baita naka iɗisiɗau:
—¿Mukĩraba chi wẽra amaai biꞌia ɓuka?
3 Jesusba panausii:
—¿Moisesba kãare ɓʉsma?
4 Chi fariseorãba panausiɗau:
—Moisesba mau ida kabisii. Chi mukĩraba chi wẽra amaai baita karta ɓʉpeɗa maabae wẽramaa deapeɗa, amaai ɓuu.*
5 Mauɗe Jesusba jarasii:
—Moisesba mau waubi ɓuu beɗea ɓʉsii machi sõ chaarea nureeɗeeba.
6 Maamina nau iujãa wausiiɗe Dachi Akõreba mukĩra mauɗe wẽra wausii.*
7 Mauɗeeba mukĩraba chi akõre mauɗe chi nawe ɓʉipeɗa ichi wẽra ome ãbua ɓeei.
8 Maka kakua aɓa nii kĩra nibaɗai.* Ãchi ome panuu kĩrawãe, maumaarã aɓa ɓuu kĩra nureaɗai.
9 Mauɗeeba Dachi Akõreba chi araa ãbua ɓuɗa aɓau biɗa amaabai.
10 Maaɗakare deeɗa ãstu panuuɗe, chi Jesús baara nibapeɗaaɗaba waya ara mau ʉ̃rʉbena iɗi kopaneesiɗau.
11 Mauɗe Jesusba panausii:
—Mukĩraba ichi wẽra amaapeɗa junebena wẽra ome miakãiruubʉrã chi nabena wẽramaa kachirua wau ɓuu.
12 Araɓauɗe wẽraba chi kima amaapeɗa, junebena mukĩra ome miakãiruubʉrã mau wẽraba chi kima ome kachirua wau ɓuu.
Jesusba warrarãmaa biꞌia jaraɗa
Mateo 19:13-15; Lucas 18:15-17
13 Mauɗe ẽbẽrarãba warrarã Jesusmaa adoesiɗau ichi jua maarã ʉ̃rʉ kuɓupeɗa biꞌia jaramera. Maamina Jesús baara nibabadaurãba chi mau warrarã adoepeɗaaɗarã iadaasiɗau.
14 Ãchiba makapeɗaaɗa Jesusba unusiiɗe, kĩrupeɗa naka jarasii:
—Warrarã mʉʉmaa ida neebísturu, Dachi Akõreba ichiɗirã ichi juaɗe ua ɓuuɗerã naarã kĩra nureeɗeeba.
15 Mʉʉba biawãra jaraaruu: warr ichi akõre ome nibabarii kĩra aɓa biɗa Dachi Akõre ome niiwãebʉrã, mau ẽbẽra Dachi Akõre juaɗe ɓuabai ichiɗirã baara.
16 Maka jarapeɗa Jesusba chi warrarã juaɗe orepeɗa ichi jua ʉ̃rʉ kuɓusiiɗe biꞌia jarasii.
Chi nejarra barau nii Jesús ome berreaɗa
Mateo 19:16-30; Lucas 18:18-30
17 Maaɗakare Jesús wãaruuɗe ẽbẽra ichimaa pira neesii. Mau ẽbẽra Jesús daaɗe õdarrɗe koɓeepeɗa iɗisii:
—Jaradeabarii bia nii, Dachi Akõre ome ewaricha chokae ɓuai baita ¿mʉʉba kãare waui ɓuma?
18 Jesusba panausii:
—¿Sakãe mʉʉmaa biꞌia nii a ɓuma? Mae, aɓa biɗa chi bia nii wãꞌãe, aɓaburu Dachi Akõréturu chi bia nii.
19 Bichiba kuitaa ɓuu Dachi Akõreba waubi ɓuu beɗea: mia bearã́se, junebena miakãiɗa ome kãi ɓeerã́se, nechiruarã́se, setaa jararã́se waabenarã ʉ̃rʉbena, waabenarã setaa kũruarã́se, bichi akõre mauɗe bichi nawe wapeadee ɓuase.
20 Mauɗe ẽbẽraba jarasii:
—Jaradeabarii, kũudrãaeɗe mʉʉba joma mau wau ɓuu.
21 Mauɗe Jesusba ẽbẽra kʉ̃riaɗeeba ichiapeɗa jarasii:
—Wabiɗa bichiba ne aɓa waui ɓuu. Bichiba uru ɓuu joma nedobʉiɗe wãpeɗa chi nejarr barauwãe nureerãmaa deaɗakase. Maka bajãaɗe ne bia uru ɓuai. Maabae mʉ baara nibaɗe neese.*
22 Chi ẽbẽraba mau ũripeɗa miamaasii mauɗe kĩra nomaa wãsii ãrea chi nejarra barau niiɗeeba.
23 Mauɗe Jesusba aɗu purra ichiapeɗa ichi baara nibabadaurãmaa jarasii:
—Biawãra ãrea chaarea ɓuu ẽbẽra chi nejarra barau nii Dachi Akõre juaɗe ɓuai baita, ichiɗirã baara.
24 Ichi baara nibabadaurãba kuitaa kʉ̃risiaɗaabasii.* Mauɗeeba Jesusba waya jarasii:
—Warrarã, biawãra ãrea chaarea ɓuu ẽbẽra chi nejarra barau nii Dachi Akõre juaɗe ɓuai baita, ichiɗirã baara.
25 Chaarea ãrea ɓuu barau nii Dachi Akõreba ichi juaɗe ua ɓuuɗe ɓuayu, camello aɓa ãkusa dauɗe wãi baɗamaarã.
26 Ichi baara nibabadaurãba waya kuitaa kʉ̃risiaɗaabasii. Mauɗe chiya iɗisiɗau:
—Makarã Dachi Akõreba ¿kai karibaima?
27 Jesusba ãchi ichiapeɗa jarasii:
—Ẽbẽraba mau poyaa waukau maamina Dachi Akõre báitara makawãe. Dachi Akõrebarã poyaa joma waui.
28 Mauɗe Pedroba Jesusmaa jarasii:
—Daiba joma ɓʉisiɗau bichi baara wãɗai baita.
29 Jesusba jarasii:
—Mʉʉba biawãra jaraaruu: mʉ kakua mauɗe chi beɗea bia mʉ ʉ̃rʉbena kakua ichi de, ãbarã, neekaurã, akõre, nawe, kima, warrarã mauɗe chi drua ɓʉiruubʉrã,
30 ichiba ɓʉiɗa audeara nau ewariɗe 100 adaui: de, ãbarã, neekau, nawe, warrarã mauɗe ichi drua. Ẽbẽrarãba ichi kachirua wauɗai baita wãraaɗai maamina kaaɗebena ewariɗe Dachi Akõre ome ewaricha chokae ɓuai.
31 Maamina chi kaaɗeare nuree naa panaɗai, mauɗe chi naa nuree kaaɗeare panaɗai.
Jesusba ichi beaɗai ʉ̃rʉbena waya jaraɗa
Mateo 20:17-19; Lucas 18:31-34
32 Jerusalenɗaa wãsiɗauɗe Jesús ãchi naa wãsii. Aria wãaduu niɗauɗe chi ichi baara nibabadaurãba kuitaa kʉ̃risiaɗaabasii. Joma chi ichi baara wãaduurã siɗa wapea panasiɗau. Maka panuuɗe Jesusba waya ichiba jʉrʉ adauɗa 12 panuu ãyaa adoesii. Maabae ichi sakaɗai ʉ̃rʉbena jarasii:
33 —Ũrísturu, dachi Jerusalenɗaa wãaduu. Jamaria aɓaba mʉ, chi Ẽbẽra Ba Ɓuaɗa jidaubii paare mechiurãba mauɗe Moisesba ɓʉɗa jaradeabadaurãba jidaumera. Mʉ biui ɓuu jaraɗapeɗa judiowãerãmaa deaɗai.
34 Maarãba mʉ atua jaraɗapeɗa, mʉʉmaa iɗuɗapeɗa, soaba peɗapeɗa beaɗai. Maamina ewari õbeaɗe mʉ chokae jiradui.
Zebedeo warrarãba iɗipeɗaaɗa
Mateo 20:20-28
35 Zebedeo warrarã Santiago mauɗe Juan Jesusmaa neeɗapeɗa jarasiɗau:
—Jaradeabarii, daiba kʉ̃ria panuu daiba iɗiiduu bichiba waumera.
36 Jesusba iɗisii:
—¿Kãare kʉ̃ria panuma mʉʉba machi baita waui?
37 Ãchiba panausiɗau:
—Bichiɗirã bichi juaɗe ua ɓeeruuɗe, dai bichi jãkaa akʉ ɓeebiáse, aɓa bichi jua biare, aɓa bichi jua sordoare.*
38 Mauɗe Jesusba ãchimaa jarasii:
—Machiba adua panuu kãare iɗi panuu. Mʉ ãrea biꞌiwãe ɓuai. ¿Machi siɗa ara mau kĩra ãrea biꞌiwãe panaɗai kʉ̃ria panuka?*
39 Ãchiba panausiɗau:
—Maerã, poyaa biꞌiwãe panaɗai panuu.
Mauɗe Jesusba jarasii:
—Machi siɗa biawãra mʉ kĩra ãrea biꞌiwãe panaɗai.*
40 Maamina mʉʉba poyaa jaraabai kairã mʉ jua biare maebʉrã jua sordoare akʉ paneeɗayu. Dachi Akõréburu mau jarai.
41 Mauɗe chi Santiagoba mauɗe Juanba iɗiiduu waabenarã 10 panuuba ũrisiɗau. Mauɗeeba ãchi ome kĩrusiɗau.
42 Mauɗe Jesusba ãchi iukuapeɗa jarasii:
—Machiba kuitaa panuu nau druaɗebenarã jaradea ua ɓuabadaurãba ãchi ẽbẽrarã ãrea jaradea ua ɓuabadau. Ãchiba unubiabadau ãchiba jaraaduu jomaurãba wauɗai panuu.
43 Maamina machi maka nureaɗaabai panuu. Machiɗebena chi mechiu nibai kʉ̃ria ɓuubʉrã waabenarã baita bari trajabarii ɓuai ɓuu.
44 Chi mechiu nibai kʉ̃ria ɓuu jomaurã audeara kaebeu ɓuai ɓuu.
45 Mauɗeeba mʉ, chi Ẽbẽra Ba Ɓuaɗa neewẽa ɓuu ẽbẽrarã mʉ baita bari trajabadaurã nureaɗamera. Maumaarã nee ɓuu ẽbẽrarã baita bari trajabarii ɓuai baita. Maka mʉ biui ãrea ẽbẽrarã karibai baita.
Jesusba dau pãriu nii aribiabiɗa
Mateo 20:29-34; Lucas 18:35-43
46 Jesús, ichi baara nibabadaurã mauɗe waabenarã ãrea panuu Jericó puuruare wãsiɗau. Wãaduuɗe ẽbẽra dau pãriu nii mau o jãkaa chi nejarra iɗi ɓuu akʉ ɓuasii. Mau ẽbẽra Bartimeo basii, Timeo warr.
47 Bartimeoba ũrisii Jesús Nazaretɗebena wãaruu. Mauɗeeba ɓia jarasii:
—¡Jesús, Davidɗebena neeɗa, mʉ kĩra chuburiáse!
48 Mauɗe ãreaba ichi chũpeamera iadaasiɗau maamina ichiba waya aude ɓiasii:
—¡Jesús, Davidɗebena neeɗa, mʉ kĩra chuburiáse!
49 Mau ũrisiiɗe Jesús ɓari nuɓeepeɗa, naka jarasii:
—Jãu iústuru.
Mauɗe chi dau pãriu nii iuɗapeɗa jarasiɗau:
—Kĩrajʉʉse. Jiraduse. Jesusba bichi iu ɓuma.
50 Ara makʉɗe Bartimeoba ichiba anaɓari jʉ̃barii jʉ̃ ɓuaɗa enapeɗa isa jiradupeɗa Jesusmaa wãsii.
51 Mauɗe Jesusba ichimaa iɗisii:
—¿Kãare kʉ̃ria ɓuma mʉʉba waui?
Chi dau pãriu niiba jarasii:
—Jaradeabarii, mʉʉba unui kʉ̃ria ɓuu.
52 Mauɗe Jesusba jarasii:
—Wãse. Bichiba ijãasiiɗeeba aribiasii.
Ara makʉɗe chi dau pãriu nibaɗa unu koɓeesii. Maabae Jesús baara oɗe wãsii.
Notas
^ Deuteronomio 24:1-4.
^ Génesis 1:27; 5:2.
^ Génesis 2:24.
^ 10:21 Griego beɗeaɗe chi ɓee kartaɗe nau siɗa ɓʉ kuɓuu: Bichi cruz adaui.
^ 10:24 Kuitaa kʉ̃risiaɗaabasii. Chi Jesús baara nibabadaurãba kʉ̃risia panasiɗau Dachi Akõreba chi nejarra barau nuree aude bia paneebiasii.
^ 10:37 Bichiɗirã bichi juaɗe ua ɓeeruuɗe. Griego beɗeaɗe naka ɓʉ kuɓuu: Bichi biꞌia ɓuuɗe.
^ 10:38 Griego beɗeaɗe naka ɓʉ kuɓuu: ¿Machi mʉ boro eaɗai kĩra boro eaɗaika? ¿Mʉʉba doi ɓuu machia biɗa poyaa doɗaika?
^ 10:39 Jesusba jaraɗa kĩra biawãra makasii. Hechos 12:1-3; Apocalipsis 1:9.
